Daily Nawa-i-Ajam Lahore

Wednesday, 29 November 2023

آسمانی بجلی گرنے سے 24 افراد ہلاک اور 23 زخمی

ان واقعات میں 2 درجن افراد ہلاک اور تقریباً اتنے ہی زخمی ہوچکے ہیں۔بھارتی میڈیا کے مطابق ریاست گجرات میں 24 گھنٹوں میں 144 ملی میٹر بارش ریکارڈ کی گئی۔ طوفانی بارشوں نے کئی مکانات کو تباہ کردیا جب کہ مال مویشی کو بھی نقصان پہنچا۔آج دوپہر کے بعد سے بارشوں کا سلسلہ تھم گیا ہے لیکن بھارتی محکمۂ موسمیات نے گجرات کے کچھ علاقوں میں بارشوں کا سلسلہ جاری رہنے کی پیشن گوئی کی ہے۔آسمانی بجلی گرنے کے واقعات زیادہ تر کھیتوں اور میدانی علاقوں میں پیش آئے۔ ان علاقوں میں بارشوں کے دوران آسمانی بجلی گرنے کے واقعات عام ہیں تاہم پہلی بار اتنی ہلاکتیں ہوئی ہیں۔ریاستی حکومت نے آسمانی بجلی گرنے کے واقعات میں جانی اور مالی نقصان کا اندازہ لگانے کے لیے سروے کمیٹی تشکیل دیدی ہے جس کی بنائی گئی رپورٹ کی بنیاد پر متاثرین کی مالی مدد کی جائے گی۔یاد رہے کہ گجرات میں اگست 2020 میں موسلا دھار بارش اور سیلاب سے 14 افراد جب کہ اگست 2019 میں 31 افراد ہلاک ہوگئے تھے۔ ان دونوں واقعات میں آسمانی بجلی سے ہلاک ہونے والے بھی شامل تھے۔

لاہور؛ خود کو محسن نقوی کا رشتہ دار بتاکر وارڈنز کو دھمکانے والے گرفتار

لاہور پولیس نے خود کو وزیراعلیٰ پنجاب محسن نقوی کا رشتہ دار بتاکر ٹریفک وارڈنز اور صحافی کو ڈرانے دھمکانے والے

2 ملزمان کو گرفتار کرلیا۔ٹریفک وارڈنز کو دھمکانے کے کیس میں پیش رفت ہوگئی۔ پولیس نے دونوں ملزمان کو گرفتار کرکے حوالات میں بند کردیا۔ملزمان نے چند روز قبل چالان کرنے پر وارڈنز کو دھمکایا تھا اور خود کو محسن نقوی کا رشتے دار بھی ظاہر کیا تھا۔ ملزمان نے بغیر نمبر پلیٹ کار ڈرائیو کرنے والی ایک کم عمر لڑکی کو بھی پولیس حراست سے چھوڑنے کا کہا تھا۔اس واقعے کی ویڈیو بھی وائرل ہوگئی جس میں موقع پر موجود اعلیٰ پولیس افسران ملزمان کی دھمکیوں اور اثر و رسوخ کے دباؤ میں نظر آئے، جس پر صارفین نے شدید تنقید کی۔ سی ٹی او لاہور مستنصر فیروز نے واقعہ کا سخت نوٹس لیا تھا۔

اداکارہ مدیحہ امام کا بھارت میں ولیمہ، تصاویر وائرل

پاکستان شوبز انڈسٹری کی معروف اداکارہ مدیحہ امام شادی کے بھارت میں ہونے والے ولیمے کی تقریب کی تصاویر سوشل میڈیا پر وائرل ہوگئیں۔حال ہی میں مدیحہ امام اپنے شوہر موجی بسر کے ہمراہ پہلی بار بھارت میں اپنے سُسرال پہنچی ہیں جہاں اس جوڑے کا ولیمہ منعقدد کیا گیا جس کی تصاویر اداکارہ نے اپنے انسٹاگرام اکاوْنٹ کی اسٹوری میں پوسٹ کیں۔مدیحہ امام نے اپنے ولیمے کی تقریب میں گلابی رنگ کے لباس کا انتخاب کیا جس کے ساتھ اُنہوں نے لائٹ میک اپ اور نازک جیولری پہنی جبکہ اُن کے شوہر موجی بسر روایتی سیاہ تھری پیس سوٹ میں ملبوس تھے۔ولیمے کی تقریب میں مدیحہ امام کے شوہر موجی بسر نے ڈانس بھی کیا جس کی ویڈیو اداکارہ نے اپنی انسٹاگرام اسٹوری میں پوسٹ کی۔واضح رہے کہ مدیحہ امام نے رواں سال خاموشی سے دبئی میں شادی کرکے سب کو حیران کر دیا تھا، تاہم اداکارہ کے شوہر کو دیکھ کر سوشل میڈیا پر قیاس آرائیاں کی جارہی تھیں کہ موجی بسر نیپالی ہیں یا بھارتی؟

مدیحہ امام کے شوہر کا تعلق بھارت سے ہے اور وہ بھی شوبز انڈسٹری کا ہی حصہ ہیں، موجی بسر بھارتی فلم میکر اور پروڈیوسر ہیں جنہوں نے گریجویشن کے بعد 2017 میں اپنے بالی وڈ کیریئر مقبول فلمز دی سک اور لکا چھپی میں بطور اسسٹنٹ پروڈیوسر کام کیا۔یاد رہے کہ مدیحہ امام نے 2017 میں بالی ووڈ کی فلم ’ڈیئر مایا‘ میں اداکاری کے جوہر دکھائے تھے اس فلم میں ان کے ساتھ منیشا کویرالا نے ماں کا کردار ادا کیا تھا۔

"عامر لیاقت پر فخر ہے، روزانہ اُن کی قبر پر جاتا ہوں"؛ ساحر لودھی

پاکستان کے معروف میزبان اور اداکار ساحر لودھی نے کہا ہے کہ اُنہیں نامور ٹی وی شو میزبان اور اسکالر مرحوم عامر لیاقت حسین پر فخر ہے، وہ روزانہ اُن کی قبر پر بھی جاتے ہیں۔ساحر لودھی نے حال ہی میں اداکار و میزبان احمد علی بٹ کے پوڈ کاسٹ میں شرکت کی جہاں اُنہوں نے اپنے کیریئر، سوشل میڈیا ٹرولنگ سمیت مختلف موضوعات پر بات کی۔پوڈکاسٹ میں ساحر لودھی نے سوشل میڈیا ٹرولنگ کے حوالے سے بات کرتے ہوئے کہا کہ “میں نے کبھی تنقید پر توجہ نہیں دی، اسی طرح شائستہ بھی ٹرولنگ کو نظر انداز کرتی ہے”۔ساحر لودھی نے کہا کہ “کوئی مجھے جتنا مرضی بُرا یا غلط کہے، مجھ پر تنقید کرے، مجھے فرق نہیں پڑتا لیکن ایک بار میری 2 سال کی بیٹی کو ناقدین نے گالی دی تھی جو مجھ سے برادشت نہیں ہوئی اور اُس دن سے مجھے سوشل میڈیا سے نفرت ہوگئی”۔اُنہوں نے مرحوم اسکالر اور ٹی وی شو میزبان عامر لیاقت حسین کے بارے میں بات کرتے ہوئے کہا کہ “عامر لیاقت کے انتقال سے 15 دن پہلے اُن سے ملاقات ہوئی تھی اور جب اُن کا انتقال ہوا تو یقین نہیں آیا اور لگا جیسے میں نے اپنا بھائی کھو دیا ہے”۔ساحر لودھی نے کہا کہ “عامر لیاقت میرے بہت اچھے دوست تھے، میں اُن کے بارے میں وہ باتیں بھی جانتا ہوں جو کوئی دوسرا نہیں جانتا، میں نے لوگوں میں اُنہیں پیسے بانٹتے ہوئے بھی دیکھا ہے، میں روزانہ اُن کی قبر پر بھی جاتا ہوں”۔اُنہوں نے کہا کہ “مجھے اپنی زندگی میں دو لوگوں پر ہمیشہ فخر رہا ہے، ایک امجد صابری اور دوسرے عامر لیاقت حسین، دونوں سچے انسان تھے اور میرے بہترین دوست تھے”۔ساحر لودھی نے عامر لیاقت پر ہونے والی تنقید سے متعلق کہا کہ “ہم انسان ہیں اور ہر انسان سے ہی کہیں نہ کہیں غلطی ہوتی ہے لیکن جب کسی سے کوئی غلط کام ہوجاتا ہے تو ہم خود کو نیک سمجھنے لگ جاتے ہیں اور پھر دوسروں کی غلطیوں پر اُنہیں پرکھنا شروع کردیتے ہیں، ایسا ہی عامر لیاقت کے ساتھ لوگوں نے کیا”۔اُنہوں نے مزید کہا کہ “لوگوں نے عامر لیاقت کے خلاف باتیں کیں جوکہ بہت غلط ہے، ہمیں کسی کے خلاف باتیں نہیں کرنی چاہیے کیونکہ غلطیاں ہم سب ہی کرتے ہیں”۔یاد رہے کہ ڈاکٹر عامر لیاقت حسین 9 جون 2022 کی دوپہر کو کراچی میں اپنے گھر میں مردہ پائے گئے تھے انہیں اسپتال منتقل کیا گیا جہاں ان کے انتقال کی تصدیق کی گئی تھی۔

فواد چوہدری کو جیل میں اہلیہ سے تنہائی میں ملاقات کی اجازت مل گئی

سابق وفاقی وزیر فواد چوہدری کو اڈیالہ جیل میں بہتر کلاس، فیملی اور وکلا جبکہ اہلیہ سے تنہائی میں ملاقات کی بھی اجازت مل گئی۔چیف کمشنر نے عمل درآمد رپورٹ اسلام آباد ہائیکورٹ میں جمع کروا دی۔ جسٹس میاں گل حسن اورنگزیب نے کہا کہ آصف زرداری اور بینظیر بھٹو کو بھی جیل میں فیملی اور وکلا سے ملاقات پر روکا جاتا تھا، ایسے واقعات آپ کے افسران کے لیے شرمندگی کا باعث بنتے ہیں۔فواد چوہدری کو جیل میں سہولیات اور وکلا و فیملی سے ملاقات کی درخواست پر سماعت جسٹس میاں گل حسن اورنگزیب نے کی۔ عدالتی حکم پر چیف کمشنر اسلام آباد کیپٹن ریٹائرڈ انوار الحق عدالت میں پیش ہوئے اور عمل درآمد رپورٹ جمع کروائی۔رپورٹ میں بتایا گیا ہے کہ فواد چوہدری کو جیل میں بہتر کلاس فراہم کردی گئی ہے جبکہ انہیں فیملی اور وکلا سے ملاقات کی بھی اجازت ہوگی اور فواد چوہدری کو اہلیہ سے جیل میں تنہائی میں ملاقات کرنے کی اجازت ہوگی۔عدالت نے ڈپٹی سپریڈنٹ جیل کو فواد چوہدری کو جیل مینوئل کے مطابق طبی سہولیات بھی فراہم کرنے کا حکم دیتے ہوئے کہا کہ درخواست گزار کے وقار کو ملحوظ خاطر رکھا جائے، جیل میں فیملی اور وکلا سے ملاقات پر آصف علی زرداری اور بینظیر بھٹو کو بھی روکا جاتا تھا، ایسے واقعات آپ کے افسران کے لیے شرمندگی کا باعث بنتے ہیں۔عدالتی استفسار نے وکیل فیصل چوہدری نے بتایاکہ فواد چوہدری ایک کیس میں گرفتار ہیں باقی پتہ نہیں کتنے کیسز ہیں۔ ہماری اطلاعات کے مطابق ایک کیس جہلم میں درج ہے اور ایک اور کیس پنجاب کے کسی شہر میں درج ہے۔اس پر عدالت نے کہا کہ جیل سپریڈنٹ سے کیسوں کی تفصیلات منگوا لیتے ہیں۔ ہائیکورٹ نے فواد چوہدری کی درخواست ہدایات کے ساتھ نمٹا دی۔

نگراں وزیراعظم انوارالحق کاکڑ2 روزہ دورے پر ابوظہبی پہنچ گئے

اسلام آباد: نگراں وزیراعظم انوار الحق کاکڑ متحدہ عرب امارات کے دو روزہ دورے پر ابو ظہبی پہنچ گئے۔ ابو ظہبی کے البطین ہوائی اڈے پر متحدہ عرب امارات کے وزیر انصاف عبداللہ سلطان بن عواد النعیمی اور پاکستانی سفارتی اہلکاروں نے وزیراعظم کا استقبال کیا۔ترجمان دفتر خارجہ کے مطابق نگراں وزیراعظم متحدہ عرب امارات کے صدر شیخ محمد بن زاید سے ملاقات کریں گے۔ ملاقات سیاسی، اقتصادی، تجارتی، سرمایہ کاری، ثقافتی، دفاع کے شعبوں میں تعلقات کو آگے بڑھانے کا موقع فراہم کرے گی۔نگراں وزیراعظم کے دورے میں توانائی، پورٹ آپریشنز پروجیکٹس، ویسٹ واٹر ٹریٹمنٹ، فوڈ سیکیورٹی، لاجسٹک، کان کنی، ایوی ایشن اور بینکنگ اینڈ فنانشل سروسز میں سرمایہ کاری کی مفاہمتی یادداشتوں پربھی دستخط کیے جائیں گے ۔ترجمان دفتر خارجہ کے مطابق پاکستان اور متحدہ عرب امارات کے دیرینہ تعلقات وقت کی متعدد آزمائشوں پر پورا اترے ہیں۔

رنبیر کپور کا جادو چل گیا، ’انیمل‘ کے آٹھ گھنٹوں میں 20 ہزار ٹکٹ فروخت

ممبئی: بالی وڈ سپر اسٹار رنبیر کپور کی نئی فلم ’انیمل‘ کا جادو سر چڑھ کر بولنے لگا اور صرف 8 گھنٹوں میں فلم کے 20 ہزار سے زائد ایڈوانس ٹکٹ فروخت ہوگئے۔ بھارتی میڈیا ذرائع کے مطابق کرونا وبا کے بعد کسی فیچر فلم کیلئے یہ سب سے بڑا رسپانس ہے اور توقع کی جارہی ہے کہ پہلے دن ٹکٹ کی فروخت 50 ہزار تک پہنچ جائے گی۔رنبیر کپور کو نئی فلم میں اپنے والد (انیل کپور) کی محبت میں جنونی دکھایا گیا ہے اور وہ اپنے والد کے دشمنوں سے بدلہ لینے کیلئے آخری حد تک جانے کو تیار نظر آتے ہیں۔’انیمل‘ میں رنیبر کے مقابلے میں بوبی دیول ولن کا کردار ادا کررہے ہیں اور ٹریلر میں ان کی انٹری کہانی کے ماحول کو یکسر تبدیل کردیتی ہے۔سندیپ ریڈی وانگا کی ہدایت کاری میں بننے والی فلم میں رنبیر کپور کے مدمقابل راشمیکا مندانا مرکزی کردار ادا کررہی ہیں۔فلم ’انیمل‘ یکم دسمبر 2023 کو پوری دنیا میں پانچ زبانوں ہندی، تیلگو، تامل، کناڈا اور ملیالم میں ریلیز کیلئے پیش کی جائے گی۔

ریاست کو ایک موقع اور دے رہے ہیں وہ آئینی ترمیم سے عوام کو بااختیار بنائے، کنونیئر ایم کیو ایم

کراچی: متحدہ قومی مووم

نٹ (ایم کیو ایم) پاکستان کے کنونیئر خالد مقبول صدیقی نے کہا ہے کہ ہم ریاست کو ایک موقع دے رہے ہیں کہ وہ آئینی ترمیم کے ذریعے عوام کو بااختیار بنائے۔یہ بات انہوں نے ایم کیو ایم پاکستان کے زیر اہتمام کورنگی ٹاؤن میں عظیم و شان جلسے سے خطاب کرتے ہوئے کہی۔ جلسے کا آغاز تلاوت قرآن پاک اور ہمد باری تعالیٰ سے کیا گیا۔ جس کے بعد جلسے سے کنوینئر ڈاکٹر خالد مقبول صدیقی،سینئر ڈپٹی کنوینئر سید مصطفی کمال، ڈاکٹر فارق ستار، نسرین جلیل نے خطاب کیا۔ جبکہ ڈپٹی کنوینئر انیس احمد قائم خانی، خواجہ اظہار الحسن،عبدالوسیم و اراکین رابطہ کمیٹی نے شرکت کی۔اس موقع پر کنوینئر ایم کیو ایم ڈاکٹر خالد مقبول صدیقی نے کہا کہ ’اگر ریاست نے اقتدار عوام کو نہیں دیا تو ہم اقتدار کو سڑکوں پر سجائیں گے اور اگر اس ملک کی تقدیر عوام کے ہاتھوں میں نہیں دی تو ہم جاگیر دار اور وڈیروں سے چھین کر تقدیر عوام کو دیں گے۔انہوں نے کہا کہ تاریخ نے ایسا جبر اور ظلم نہیں دیکھا جو کورنگی نے برداشت کیا، یہاں غسل سے لے کر دفنانے کا کام خواتین نے انجام دیا، کورنگی کو ایک دور میں نوگو ایریا بنایا گیا، چھاپے مارے گئے ظلم و بربیت کا بازار گرم کیا گیا یہاں بہنے والے خون سے بننے والی لکیروں کا تعاقب کیا جائے تو اس میں مادر ملت،قائد اعظم اور شید ملت اور1857کے شہیدوں کے خون کے نشان نظر آئیں گے۔خالد مقبول صدیقی نے کہا کہ آج کورنگی نے الیکشن کا فیصلہ دیدیا اور یہاں سے کامیاب نمائندے کل سے کام شروع کردینگے۔انہوں نے کہا کہ اگر مملکت نے اقتدار عوام کے ہاتھ میں نہیں دیا تو کورنگی اسے ہاتھ میں لینے کیلئے آج یہاں جمع ہے، عوام کو با اختیار نہ کیا گیا تو پھر پاکستان کو کراچی کی سڑکوں سے چلایا جائیگا، ہم ریاست کو ایک موقع اور دے رہے ہیں کہ وہ آئینی ترمیم کے زریعے عوام کو با اختیار بنائے۔خالد مقبول صدیقی کا کہنا تھا کہ اس شہر کو لوٹنے والے ایک طرف اور پانی بیچنے والے اور دوسری جانب اس شہر کے پیاسے شہری ہیں، ہم صاحب اقتدار کو یہ آخری پیغام دیکر جا رہے ہیں کہ آپ سے ہر ظلم کا حساب لینا ہے۔اس موقع پر سینئر ڈپٹی کنوینئر سید مصطفی کمال نے کہا کہ جو لوگ دلوں کو جیت نہیں سکتے وہ قبضہ کرنا چاہتے ہیں اور انکے لئے یہ جلسہ ایک جواب ہے، تمہارے پاس پچھلے 15 سالوں سے حکومت رہی اگر ہمیں صرف ایک بار پانچ سالوں کیلئے حکومت دو اور پھر دیکھو کہ ہم کتنا کام کرتے ہیں کہ تمہاری ضمانتیں ضبط ہوجائینگی۔انہوں نے کہا کہ اب ہمیں وزارتیں نہیں چاہئیں بلکہ اختیار وزیر اعظم اور وزیر اعلیٰ کے گھروں سے نکال کر عوام کی دہلیز پر لانا ہے، ہمیں اپنے مسائل کے حل کا اختیار اپنی گلی محلوں میں چاہیے اور ہم پاکستانی عوام کو با اختیار بنانا چاہتے ہیں۔ مصطفیٰ کمال نے کہا کہ 5افراد کے پاس اختیار ہے جس سے عوام کے مسائل حل نہیں ہورہے ہیں، ہمیں اختیار عوام کے ہاتھوں میں چاہیے۔ایم کیو ایم کے سینئر ڈپٹی کنونیئر نے کہا کہ یہ بات ہم صرف کراچی کیلئے نہیں بلکہ سندھ، پنجاب، بلوچستان اور کے پی کے کی گلی محلو ں کیلیے بھی کررہے ہیں، صوبائی خودمختاری کا شور فلاپ ہوگیا ہے اس سے صرف وزیر اعلیٰ با اختیار ہوا ہے، جس کے باعث صوبائی خودمختاری ناکام ہوگئی ہے۔انہوں نے کہا کہ ظلم کی یہ سیاہ رات کو اب ختم ہونا ہوگا اور یہ پاکستان ہم نے اس لئے نہیں بنایا تھا کہ اس میں ہم ظلم برداشت کریں، میں ارباب اختیار سے کہتا ہوں کہ کراچی والوں کو موقع دو یہ ایک سال میں آئی ایم ایف کا قرضہ اتار دے گا اور پاکستان چلا کر دکھائے گا۔انہوں نے کہا کہ ان حکمرانوں کو ایک موقع اور دے رہے ہیں کہ وہ آئینی ترمیم کر کہ اختیارات اور عوام کو حق حکمرانی دیں، اگر ہماری آئینی ترمیم کو نہیں مانا گیا اور ضلعی خودمختاری نہیں دی گئی تو پھر فیصلہ روڈ پر ہوگا۔ مصطفیٰ کمال نے مزید کہا کہ اس موقع پر بلاول بھٹو کو ایک پیغام دیتا ہوں کہ آپ نے جن لوگوں کے ہاتھ میں کراچی کی باگ دوڑ دی ہے وہ آپ کی وزارت عظمیٰ کے راستے میں بارودی سرنگیں بچھا رہے ہیں، آپ 15سال تک حکمران رہے آپ کو ہمارے دل جیتنے چاہیے تھے لیکن آپ نے قبضہ کرنے کی کوشش کی، آپ کو نہ تو کسی صورت قبضہ نہیں کرنے دیں گے۔سینئر ڈپٹی کنوینرڈاکٹر فارق ستار نے کورنگی کے عوام سے خطاب کرتے ہوئے کہا کہ میں یہاں آنے والے شرکا کا دل کی گہرائیوں سے شکریہ ادا کرتا ہوں کہ جنہوں نے اس جلسے کو کامیاب بنانے کیلئے اپنا بھر پور کردار ادا کیا، لوگ ہم سے پوچھتے ہیں کہ ایم کیو ایم کا مقابلہ کس سے ہے تو میں کہتا ہوں کہ اس جلسے نے یہ ثابت کردیا کہ ایم کیو ایم کا مقابلہ کسی سے نہیں کیونکہ کوئی ہمارے برابر بھی نہیں آ سکتا اور یہ جلسہ اس بات کا ثبوت ہے۔انہوں نے کہا کہ 8 فروری کو سندھ پر قابض جاگیرداروں اور وڈیروں کی سیاسی موت کا دن ہے۔ 5فیصد ووٹ لیکر میئر بننے والے بھی 8 فروری کو ختم ہوجائیں گے، گیس کا بحران ہو یا بجلی کا مہنگائی کا طوفان ہو یا بڑھتے ہوئے اسٹریٹ کرائم، اس مسائل نے عوام سے جینے کا حق چھین لیا ہے، نہ مضبوط مرکز اور نا ہی مضبوط صوبے پاکستان کی حفاظت کی ضمانت نہیں بن سکے۔فاروق ستار نے کہا کہ وفاق اور صوبے کی خودمختاری نہیں بلکہ با اختیار شہری اور خودمختار مقامی حکومت ہی پاکستان کی حفاظت کی ضمانت ہے اور اسی فارمولے سے قائد اعظم کے پاکستان کی تشکیل کرینگے، ایک آئینی پیکج تیار کیا جا رہا ہے جو آئندہ چند روز میں پیش کیا جائیگا جو شہریوں کو خود مختار بنانے کی ضمانت دے گا۔سینئر ڈپٹی کنوینر نسرین جلیل نے خطاب کرتے ہوئے کہا کہ کورنگی کو یہ انفرادیت حاصل ہے کہ یہاں کی ماؤں بہنوں نے جنازے اٹھائے اور جنازے لحد میں اتارے اور یہ فرض بھی ادا کئے اور جب بھائیوں کو گھر میں نہ رہنے کو مجبور کیا تو ماؤں اور بہنوں نے ذمہ داری سنبھالی۔ میں سلام پیش کرتی ہوں کورنگی کے عوام کو کہ جو ظلم و زیادتی ہم نے برداشت کی وہ آپ نے بھی کی۔انہوں نے کہا کہ کورنگی کے کئی افراد آج بھی لاپتہ ہیں۔ میں ارباب اختیار سے کہتی ہوں کہ انہیں بازیاب کروائیں۔

شمالی وزیرستان میں سیکیورٹی فورسز کی کارروائی میں 8 دہشت گرد ہلاک

راولپنڈی: شمالی وزیرستان کے ضلع سراروغہ میں سیکیورٹی فورسز نے ایک کارروائی کے دوران 8 دہشت گردوں کو ہلاک کردیا۔پاک فوج کے شعبہ تعلقات عامہ (آئی ایس پی آر) کے مطابق 26 نومبر کو سیکیورٹی فورسز نے دہشت گردوں کی موجودگی کی اطلاع پر جنوبی وزیرستان کے ضلع سراروغہ میں انٹیلی جنس کی بنیاد پر آپریشن کیا۔آئی ایس پی آر کے مطابق آپریشن کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں 8 دہشت گرد مارے گئے، جن کے قبضے سے اسلحہ، گولہ بارود اور دھماکا خیز مواد برآمد ہوا۔ترجمان پاک فوج کے مطابق مارے گئے دہشت گرد سیکورٹی فورسز کے ساتھ ساتھ معصوم شہریوں کے خلاف دہشت گردی کی متعدد کارروائیوں میں ملوث تھے۔آئی ایس پی آر کا کہنا ہے کہ علاقے میں پائے جانے والے دہشت گردوں کے خاتمے کیلیے آپریشن جاری ہے اور پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔

190 ملین پاؤنڈز کیس میں نیب کی عمران خان سے 13 گھنٹے طویل تفتیش

راولپنڈی: قومی احتساب بیورو کی ٹیم نے اڈیالہ جیل میں عمران خان سے 190 ملین پاؤنڈز کیس میں 13 گھنٹے طویل تفتیش کی ہے۔تفصیلات کے مطابق اڈیالہ جیل میں نیب و دیگر کیسز میں قید عمران خان سے نیب کی ٹیم نے 190 ملین پاؤنڈ کیس میں 13 گھنٹے تک مسلسل تفتیش کی۔ نیب کے مختلف افسران دن بھر وقفے وقفے سے تفتیش کے لیے جیل پہنچتے رہے جبکہ ذرائع نے بتایا کہ نیب کے تفتیشی آفسر اسسٹنٹ ڈائریکٹر محسن علی خان اتوار کی صبح ساڑھے نو بجے اڈیالہ جیل پہنچے۔اس کے بعد صبع 11 بج کر 30 منٹ پر ڈپٹی ڈائریکٹر میاں عمر ندیم اور اسسٹنٹ ڈائریکٹر محمد وقاص جیل پہنچے اور تفتیش میں حصہ لیا۔ پھر شام 4.30 منٹ پر نیب کے ایک اور اسسٹنٹ ڈائریکٹر عذیر احمد سینٹرل جیل اڈیالہ پہنچے اور تفتیشی ٹیم کے ساتھ مل کر تفتیش کی۔

اس کے بعد رات 9 بچے نیب کے اسسٹنٹ ڈائریکٹر عبد الرحمان طیب سینڑل جیل اڈیالہ پہنچے اور تفتیشی ٹیم کو جوائن کیا اور پھر شام کی شفٹ کے انچارج اسسٹنٹ ڈائریکٹر وزیر احمد جیل سے واپس روانہ ہوگئے۔نیب کی ٹیم نے دن بھرتقریباً 12 گھنٹے سے زائد وقفے وقفے سے چیئرمین پی ٹی آئی سے 190 ملین پاؤنڈز اور القادر ٹرسٹ کیس میں پوچھ کچھ کی۔ بعد ازاں تفتیش مکمل کرکے نیب ٹیم ڈپٹی ڈائریکٹر میاں عمر ندیم، اور اسسٹنٹ ڈائریکٹر محمد وقاص اتوار کی پونے گیارہ بجے جیل سے روانہ ہوگئے۔واضح رہے کہ القادر ٹرسٹ کیس کی سماعت پیر کو اڈیالہ جیل میں ہوگی جس میں نیب کو پیشرفت رپورٹ جمع کرانی ہے۔

انڈین باکس آفس پر تہلکہ مچانے کے بعد نیٹ فلکس پر ’جوان‘ کی حکمرانی برقرار

ممبئی: بالی وڈ سپر اسٹار شاہ رخ خان کی فلم ’جوان‘ نے انڈین باکس آفس پر تہلکہ مچانے کے بعد او ٹی ٹی پلیٹ فارم پر اپنی حکمرانی کو برقرار رکھا ہوا ہے۔ ’جوان‘ 7 ستمبر کو سینما میں ریلیز کیلئے پیش کی گئی اور وہ اب تک ہندی سینما کی سب سے زیادہ کمائی والی فلم بن چکی ہے۔

شاہ رخ خان کی سالگرہ کے موقع پر ایٹلی کی بلاک بسٹر فلم کو نیٹ فلکس پر ہندی، تامل اور تیلگو میں پوری دنیا کے ناظرین کیلئے پیش کیا گیا تھا۔

اب اداکار نے ایک سوشل میڈیا پوسٹ میں اعلان کیا ہے کہ ’جوان‘ دو ہفتوں کے دوران نیٹ فلکس پر سب سے زیادہ دیکھے جانے والی فلم بن چکی ہے۔شاہ رخ خان نے پوسٹ کے ساتھ لکھا کہ نیٹ فلکس پر ’جوان‘ کی کامیابی انڈین سینما کی عمدگی کو پوری دنیا میں اجاگر کرتی ہے۔واضح رہے کہ فلم میں شاہ رخ خان کے ساتھ تامل سپر اسٹار نین تارا، دیپیکا پڈوکون اور وجے سیتھو پتی نے بھی اہم کردار ادا کیے ہیں۔