ٹیم دورہ آسٹریلیا کیلئے پرجوش ہے، محمد حفیظ

 ٹیم دورہ آسٹریلیا کیلئے پرجوش ہے، محمد حفیظ

 لاہور: پاکستان کرکٹ ٹیم کے ڈائریکٹر محمد حفیظ نے کہا ہے کہ ٹیم دورہ آسٹریلیا کیلئے پرجوش ہے، تمام کھلاڑیوں میں کارکردگی دکھانے کی بھوک ہے۔لاہور کے قذافی اسٹیڈیم میں پریس کانفرنس کرتے ہوئے محمد حفیظ نے کہا کہ ہمیں ماضی کے ریکارڈز کو دیکھنے کی ضرورت نہیں بلکہ صرف آگے دیکھنا ہے کیونکہ ہم صرف اپنے جوابدہ ہیں۔ ٹیم آسٹریلیا کے چیلنج کا مقابلہ کرنے کے لیے پُرجوش ہے۔ ہم جیت کے ذہن کے ساتھ جا رہے ہیں۔ ہم فی الحال کسی اور چیز کے بارے میں نہیں سوچ رہے ہیں۔محمد حفیظ نے کہا کہ بطور ٹیم ڈائریکٹر میرا کام ٹیم کی حکمت عملی کو دیکھنا ہے۔ کوچنگ اسٹاف اس میں سہولت فراہم کرے گا تاکہ یہ یقینی بنایا جا سکے کہ کھلاڑی اپنی صلاحیتوں اور منصوبوں کے مطابق بہترین کارکردگی دکھا سکیں۔محمد حفیظ نے کہا کہ ہمیں فی الحال ہیڈ کوچ کی ضرورت نہیں لیکن اگر ہمیں مستقبل میں کسی کی ضرورت ہوئی تو ہم ہیڈ کوچ کو بھی طلب کریں گے۔ ہم نے کوچنگ میں کچھ اور نام بھی شامل کیے ہیں جو وقت آنے پر سامنے لائیں گے۔انہوں نے کہا کہ آسٹریلیا میں کھلاڑی بہترین نتائج دیں گے۔ تمام کھلاڑی اچھی پرفارمنس دینے کےلیے بےتاب ہیں۔ سب کا مائنڈ سیٹ کلیئر ہے، بہتر نتائج لے کر آئیں گے۔کپتان کی تبدیلی سے ڈریسنگ روم پر پڑنے والے اثرات سے متعلق محمد حفیظ نے کہا کہ اس سے کوئی فرق نہیں پڑتا کہ آپ کو کپتان بنایا جاتا ہے یا نہیں بلکہ ٹیم کیلئے آپ کی پرفارمنس ضروری ہے۔محمد حفیظ نے کہا کہ بابر اعظم بدستور ٹیم کے سب سے اہم کھلاڑی ہیں اور وہ ٹریننگ کے دوران شان مسعود کی مدد بھی کرتے رہے ہیں۔ پاکستان کرکٹ ٹیم کے لیے بابراعظم کی خدمات سے انکار نہیں کیا جا سکتا۔محمد حفیظ نے کہا ہمیں جدید دور کی کرکٹ کو اپنانا اور جارحانہ کھیل  پیش کرنا ہوگا۔ ہمیں اپنے کمفرٹ زون سے نکل کر جدید دور کی کرکٹ کھیلنے کی ضرورت ہے۔

شعیب اختر بیس بال کے ایمبیسیڈر بن گئے

 شعیب اختر بیس بال کے ایمبیسیڈر بن گئے

 لاہور: راولپنڈی ایکسپریس شعیب اختر بیس بال کے ایمبیسیڈر بن گئے۔ پاکستان کے کھلاڑیوں نے بھی پہلی بار پروفیشنل لیگ میں قدم رکھ دیا۔پاکستان بیس بال فیڈریشن کے صدر سید فخر شاہ کا لاہور میں پریس کانفرنس میں کہنا تھا کہ ہمارے دو لڑکے انٹرنیشنل بیس بال چیمپئن شپ میں حصہ لے رہے ہیں جو پاکستان کے لیے ایک اعزاز ہے۔انہوں نے کہا کہ دبئی انٹرنیشنل اسٹیڈیم میں ہونے والی یونائیٹڈ بیس بال لیگ میں خیبر پختونخوا کے واحد لال جان اور محمد نامی کھلاڑی نے حصہ لیا اور پہلا رن بنانے کا اعزاز حاصل کیا۔صدر پاکستان بیس بال فیڈریشن کا کہنا تھا کہ ہمارے پاس ٹیلنٹ کی کمی نہیں لیکن سہولیات نہیں ہیں۔ سابق قومی فاسٹ باؤلر شعیب اختر کو اس لیگ کا ایمبیسیڈر مقرر کیا گیا ہے، شعیب اختر کے بیس بال میں قدم رکھنے سے پاکستان بیس بال کھلاڑیوں کو بھی فروغ دینے میں بہت مدد ملے گی۔انہوں نے مزید بتایا کہ قومی ٹیم یکم دسمبر کو تائیپے جا رہی ہے جہاں ایشین بیس بال چیمپئن شپ میں حصہ لے گی۔ چار دسمبر کو قومی ٹیم جاپان کے خلاف ان ایکشن ہوگی۔فخر شاہ نے واضح کیا کہ 18 ویں ترمیم کے بعد سب سے زیادہ نقصان کھیلوں کا ہوا ہے۔ ہمارے ملک میں کوئی اسپورٹس پالیسی نہیں۔

انٹرا پارٹی الیکشن میں عمران خان کی دستبرداری کا فیصلہ

 انٹرا پارٹی الیکشن میں عمران خان کی دستبرداری کا فیصلہ 

 لاہور: پاکستان تحریک انصاف کے ترجمان نے انٹرا پارٹی انتخابات میں عمران خان کے حصہ نہ لینے کی تردید کی ہے جبکہ عمران خان کے وکیل اور پی ٹی آئی کے مرکزی نائب صدر نے کہا ہے کہ توشہ خانہ کیس میں نااہلی کی وجہ سے چیئرمین پی ٹی آئی انٹرا پارٹی الیکشن میں حصہ نہیں لیں گے۔پاکستان تحریک انصاف کے انٹرا پارٹی انتخابات کے انعقاد اور چیئرمین عمران خان کے نئی مدت کیلئے انتخاب میں حصہ لینے کے معاملے پر میڈیا میں چلنے والی خبروں کی سختی سے تردید کردی۔سینئر رہنما نے دعویٰ کیا کہ انٹرا پارٹی انتخابات الیکشن کمیشن کے حکم اور عمران خان کی ہدایت پر کروائے جارہے ہیں، اس میں عمران خان کے بطور چیئرمین حصہ لینے کے حالے سے ابھی فیصلہ نہیں ہوا۔تحریک انصاف کے ترجمان نے کہا کہ انٹرا پارٹی انتخاب کے انعقاد کے حوالے سے تمام اہم امور پر غور کیا جارہا ہے، چیئرمین عمران خان کی انتخابات سے دستبرداری یا کسی اور رہنما کی نامزدگی کا ہرگز کوئی فیصلہ نہیں کیا گیا۔ترجمان نے کہا کہ انٹراپارٹی انتخابات کے انعقاد، تاریخ و طریقۂ کار اور امیدواران کے تعین سمیت تمام اہم معاملات پر جوں ہی قیادت کسی نتیجے پر پہنچے گی اسے باضابطہ طور پر جاری کیا جائے گا۔واضح رہے کہ الیکشن کمیشن آف پاکستان کے حکم پر پاکستان تحریک انصاف کی جانب سے ہفتہ دو دسمبر کو انٹرا پارٹی انتخابات کے انعقاد کا فیصلہ کیا گیا ہے۔ اس سے قبل خبر سامنے آئی تھی کہ عمران خان نے چیئرمین کے عہدے سے دستبرداری کا فیصلہ کیا ہے اور وہ کسی بھی عہدے پر الیکشن نہیں لڑیں گے جبکہ یہ بھی بتایا گیا تھا کہ چیئرمین پی ٹی آئی کی فیملی میں سے بھی کوئی کسی عہدے پر حصہ نہیں لے گا۔عمران خان کے وکیل اور پاکستان تحریک انصاف کے مرکزی نائب صدر شیر افضل مروت ایڈوکیٹ نے سماجی رابطے کی سائٹ ایکس پر جاری پیغام میں واضح کیا کہ عمران خان نے چیئرمین پی ٹی آئی کا الیکشن نہ لڑنے کا فیصلہ کیا ہے، وہ قانونی موشگافیوں کے باعث انٹرا پارٹی الیکشن میں حصہ نہیں لیں گے۔شیر افضل مروت نے کہا کہ توشہ خانہ کیس میں نااہلی کے باعث عمران خان قانونی طور پر الیکشن نہیں لڑ سکتے، نااہلی کا فیصلہ عدالت سے ختم ہوتے ہی خان صاحب کو دوبارہ چیئرمین پی ٹی آئی منتخب کر لیا جائے گا۔

عالمی بینک نے پاکستان میں بجلی کی قیمتوں میں مزید اضافے کی مخالفت کردی

 عالمی بینک نے پاکستان میں بجلی کی قیمتوں میں مزید اضافے کی مخالفت کردی

 اسلام آباد: عالمی بینک نے پاکستان میں بجلی کی قیمتوں میں مزید اضافے کی مخالفت کردی اور اس کی جگہ لائن لاسز کو کم کرنے پر زور دیا ہے۔

یہ بات عالمی بینک کے نائب صدر مارٹن ریزر نے پاکستان کے بہتر مستقبل کے حوالے سے عالمی بینک کے پالیسی نوٹ کے اجراء سے متعلق منعقدہ تقریب سے خطاب میں کہی۔ اس موقع پر عالمی بینک کے پاکستان کے لیے کنٹری ڈائریکٹر ناجی بن حسین نے بھی خطاب کیا۔عالمی بینک کے نائب صدر مارٹن ریزر نے کہا کہ بجلی کی قیمتوں میں مزید اضافے کی ضرورت نہیں ہے بلکہ بجلی کے لائن لاسزکو کم کیا جائے۔ انہوں نے مقامی قرضوں کو موٴخرکرنے پر بھی اعتراض کیا اور کہا کہ مقامی قرضے موٴخرکرانے سے بینکنگ سیکٹر اور سرمایہ کاری متاثر ہوسکتی ہے اس لیے پاکستان کو مقامی قرضے موٴخرکرانے کے عمل میں محتاط رہنا ہوگا۔نائب صدر عالمی بینک کا کہنا تھا کہ الیکشن سے قبل سیاسی جماعتوں سے معاشی اصلاحات پر بات چیت ہوئی ہے، معاشی اصلاحات کا عمل جاری رہنا چاہیے، معاشی پالیسیوں پر عمل درآمد ضروری ہے۔مارٹن ریزر نے مزید کہا کہ پاکستان کو ٹیکس ٹو جی ڈی پی ریشو 2 سے 3 فیصد تک بڑھانا ہوگا، محض ٹیکس وصولیاں کافی نہیں، اخراجات اورٹیکس اصلاحات پر مل کر کام کرنے کی ضرورت ہے، زرعی شعبے کو سہولیات دیے بغیر ٹیکس ریونیو میں اضافہ مشکل ہوگا۔علاوہ ازیں عالمی بینک کے کنٹری ڈائریکٹر ناجی بن حسین نے کہا کہ عالمی بینک کے بورڈ آف ڈائریکٹرز کا اجلاس دسمبرکے آخر میں ہوگا، رواں مالی سال پاکستان کو2 ارب ڈالرقرض دیا جائے گا۔

سانجھ پریت آرگنائزیشن کی جانب سے سیلاب متاثرہ اسکولوں کی بحالی کے حوالے سے بہت بڑے اقدامات کیے جارہے ہیں

 راجن پور میں تعلیم کے حوالے سے سانجھ پریت ، یونیسیف اور محکمہ تعلیم  کا بہت بڑے اقدامات ، مکمل سولر سسٹم ، رومز ، 90 ہزار بچوں میں اسکول بیگز ، کاپیاں ، پینسلیں ، شاپنر ریزر ،  سمیت ضروریات کی تمام چیزیں تقسیم کی گئیں بچیوں کی ایلیمنٹری کلاسسز کا قیام کیا گیا ہے ۔ 

سانجھ پریت آرگنائزیشن کی جانب سے سیلاب متاثرہ اسکولوں کی بحالی کے حوالے سے بہت بڑے اقدامات کیے جارہے ہیں 297 متاثرہ اسکولوں میں  مکمل سولر سسٹمز ، رومز ، بنیادی سہولیات کی فراہمی سمیت متاثرہ اسکولوں کے 90 ہزار بچوں میں اسکول بیگز ، کاپیاں پنسلیں ، ودیگر ضروری سامان تقسیم کیا گیا اس موقع پر سردار جاوید یوسف  ڈسٹرکٹ مینیجر سانجھ پریت کا کہنا تھا کہ ہم تعلیم کے نظام میں بہتری کے لیے اقدامات اٹھا رہے ہیں تاکہ سیلاب متاثرہ علاقوں کے بچے اسکول سے باہر نہ رہیں کوئی بچہ تعلیم سے محروم نہیں رہے گا بچوں کو تمام سہولیات فراہم کررہے ہیں ضلع بھر کے سیلاب  اسکولوں میں جمعہ کے دن ہم نصابی سرگرمیوں کا انعقاد کیا جارہا ہے جن میں رائٹنگ ایکٹویٹی بھی شامل ہے اس ایکٹویٹی کے تحت سانجھ پریت آرگنائزیشن نے یونیسف اور محکمہ ایجوکیشن کے تعاون سے ضلع بھر کے سرکاری اسکولوں کے بچوں میں ڈرائنگ اور رائٹنگ کے مقابلوں کا انعقاد کیا جس کے تحت پوزیشن ہولڈرز کے اعزاز میں سی او آفس میں تقریب کا انعقاد کیا گیا ۔  فرسٹ ، سیکینڈ اور تھرڈ پوزیشن ہولڈرز کی حوصلہ افزائی کے لیے ٹرافی نقد انعامات تقسیم کیے گئے اس موقع سی او ایجوکیشن محمد بلال عباسی کا کہنا تھا کہ سانجھ پریت اور یونیسف  تعلیم کے حوالے سے گراں قدر خدمات سر انجام دے رہے ہیں جس سے اسکولوں کی حالت اور کارکردگی بہتر ہوئی ہے جس پر ہم۔سانجھ پریت اور یونیسف کے مشکور ہیں ۔

جسے اللہ رکھے؛ غزہ میں گھر کے ملبے سے37 دن بعد نومولود زندہ مل گیا

جسے اللہ رکھے؛ غزہ میں گھر کے ملبے سے37 دن بعد نومولود زندہ مل گیا

غزہ میں ایک عمارت کے ملبے سے 37 دن بعد نومولود کو نیم مردہ حالت میں برآمد کیا گیا تھا اور اسے 3 گھنٹے تک طبی امداد دی گئی جس کے بعد بچے نے سانسیں لینا شروع کردیں۔عرب میڈیا کے مطابق اس گھر پر اسرائیل نے جنگ کے پہلے ہفتے میں بمباری کی تھی جس میں گھر مکمل طور پر تباہ ہوگیا تھا۔ اس دن سے یہ علاقہ مسلسل بمباری کا نشانہ ہونے کے سبب ریسکیو کا کام نہیں ہوسکا تھا۔تاہم جب 4 روزہ جنگ بندی کی گئی تو اس امدادی کاموں کا آغاز ہوا اور اس دوران گھر کے ملبے سے سول ڈیفنس کے اہلکاروں کو ایک نومولود ملا جس میں بظاہر زندگی کی رمق باقی نہ تھی۔امدادی کاموں کے دوران وہاں موجود زیادہ تر افراد نے نومولود کو مردہ قرار دیا۔ امدادی ٹیم میں شامل ڈاکٹرز اور پیرا میڈیکل اسٹاف کی 3 گھنٹوں کی محنت کے بعد نومولود نے سانسیں لینا شروع کردیں اور فضا اللہ اکبر اور سبحان اللہ کے نعروں سے گونج اُٹھی۔تاحال نومولود کے والدین کے بارے میں کچھ نہیں پتا چل سکا۔ ملبے سے اب تک کسی اور کو نہیں نکالا جا سکا ہے۔

 

 مریم نواز نے عوام کیلئے بڑا اعلان کردیا

 

پاکستان مسلم لیگ ن کی چیف آرگنائزر و سینیئر نائب صدر مریم نواز نے کہا ہے کہ 2024 پاکستان اور عوام کے لیے نئی امید اور ترقی کا نیا دور لے کر آ رہا ہے، نوازشریف کی قیادت میں نئے سال سے پاکستان کی معاشی ترقی کا تیز رفتار دور شروع ہوگا۔مسلم سٹوڈنٹس فیڈریشن (ایم ایس ایف) اور مینارٹی ونگ کے عہدیداروں اور کارکنوں کے اجلاس سے خطاب کرتے ہوئے مریم نواز نے کہاکہ قائد نواز شریف چاہتے ہیں کہ نوجوان عام انتخابات میں سیاسی سرگرمیوں کا ہراول دستہ بنیں کیوں کہ نوجوان ہی مستقبل کی قیادت ہیں۔انہوں نے کہاکہ نوجوانوں اور اقلیتوں کو سیاست کی اولین صفوں میں لانا چاہتے 

ہیں، ان کے کردار میں بتدریج اضافہ کریں گے، نوجوانوں کی ترقی ملک کی ترقی ہے۔چیف آرگنازئر ن لیگ نے کہاکہ آم آس آف کے پل?ٹ فارم سے ملک بھر سے نوجوانوں کو عملی س?اسی میں شمول?ت کا موقع ملے گا، انتخابی سرگرمیوں میں اقلیتوں کے فعال کردار سے جمہوری کلچر مزید مضبوط ہو گا۔اجلاس میں 8 فروری کو ہونے والے عام انتخابات کے حوالے سے آم آس آف اور مینارٹی ونگ کی کارکردگی کا جائزہ لیا گیا اور ان کی کارکردگی پر اطمینان کا اظہار کیا گیا۔اجلاس میں عام انتخابات م?ں نوجوانوں اور مینارٹی ونگ کی بھرپور شرکت اور شمولہیت کو یقینی بنانے کی تاکید کی گئی اور ملک بھر میں انتخابی سرگرمیاں تیز کرنے کا فیصلہ کیا گیا۔اجلاس میں فیصلہ کیا گیا کہ وفاق سمیت چاروں صوبوں، گلگت بلتستان اور آزاد جموں و کشمیر میں نوجوانوں کو متحرک کیا جائے گا۔اس موقع پر ایم ایس ایف اور مینارٹی ونگ نے سیاسی مواقع بڑھانے اور پارٹی سرپرستی پر مریم نواز شریف کا شکریہ ادا کیا۔عہدیداروں نے کہاکہ پارٹی کے اعتماد پر پورا اتریں گے، پاکستان کی ترقی کے مشن میں قائد نواز شریف کے سپاہی بن کر کام کریں گے۔

 بنگلادیش کرکٹ ٹیم کے کپتان شکیب الحسن کا الیکشن لڑنے کا فیصلہ

ڈھاکا: بنگلا دیش کرکٹ ٹیم کے کپتان شکیب الحسن نے الیکشن لڑنے کا اعلان کردیا۔غیرملکی میڈیا کے مطابق  کرکٹ ٹیم کے کپتان شکیب الحسن وزیراعظم حسینہ واجد کی حکمران جماعت عوامی لیگ کے ٹکٹ پرانتحابات میں حصہ لیں گے۔ شکیب الحسن 7 جنوری کو ہونے والے انتخابات میں اپنے آبائی ضلع ماگورا-1 حلقے سے الیکشن لڑیں گے۔

شکیب الحسن  فی الحال ورلڈ کپ میں سری لنکا کے خلاف میچ کے دوران ہونے والی انجری سے صحت یاب ہو رہے ہیں اور ابھی یہ واضح نہیں کہ وہ کھیل کے میدان میں کب واپس آئیں گے۔ شکیب سے قبل بنگلا دیش کے سابق کپتان مشرفی مرتضیٰ گذشتہ انتخابات میں پارلیمنٹ کے رکن منتخب ہوئے تھے۔

آرمی چیف سے سعودی کمانڈر کی ملاقات، مشرق وسطیٰ میں جاری تنازع پرتبادلہ خیال

 آرمی چیف سے سعودی کمانڈر کی ملاقات، مشرق وسطیٰ میں جاری تنازع پرتبادلہ خیال

 راولپنڈی: آرمی چیف جنرل سید عاصم منیر سے رائل سعودی لینڈ فورسز کے کمانڈر لیفٹیننٹ جنرل فہد بن عبداللہ المطیر نے  جی ایچ کیو میں ملاقات کی۔آئی ایس پی آر کے مطابق ملاقات کے دوران فریقین نے دفاع، سیکورٹی اور فوجی تربیت سمیت دیگرشعبوں میں تعاون، علاقائی صورتحال اور مشرق وسطیٰ میں جاری تنازعات پر تبادلہ خیال کیا۔آئی ایس پی آر کا مزید کہنا ہے کہ  معزز مہمان نے دہشت گردی کے خلاف جنگ میں پاک فوج کے کردار کو سراہا۔خطے میں امن قائم کرنے میں دی گئی قربانیوں کو زبردست خراج تحسین پیش کیا آرمی چیف نے معزز مہمان کا شکریہ ادا کیا۔  آرمی چیف نے کہا کہ پاکستان سعودی عرب کے ساتھ اپنے اسٹریٹجک اور برادرانہ تعلقات کو بہت اہمیت دیتا ہے۔قبل ازیں جی ایچ کیو آمد پر پاک فوج کے چاق و چوبند دستے نے معزز مہمان کو گارڈ آف آنر پیش کیا۔

انسداد دہشت گردی عدالت کا مریم اورنگزیب کو گرفتار کرکے پیش کرنے کا حکم

 انسداد دہشت گردی عدالت کا مریم اورنگزیب کو گرفتار کرکے پیش کرنے کا حکم

 لاہور: انسداد دہشت گردی کی عدالت نے اشتعال انگیز گفتگو میں مریم اورنگزیب کو نو دسمبر کو گرفتار کر کے پیش کرنے کا حکم دے دیا۔ایکسپریس نیوز کے مطابق انسداد دہشت گردی کی عدالت نے عدم پیشی پر مسلم لیگ (ن) کی رہنما مریم اورنگزیب کے ناقابلِ ضمانت وارنٹ گرفتاری جاری کردیے۔ وارنٹ گرفتاری جج عبہر گل نے جاری کیے اور متعلقہ ایس ایچ او کو وارنٹ کی تکمیلِ کرانے کی ہدایت دے دی۔جج نے مریم اورنگزیب کو نو دسمبر کو گرفتار کر کے پیش کرنے کا حکم دیا ہے۔واضح رہے کہ مریم اورنگزیب سمیت دیگر کے خلاف اشتعال انگیز گفتگو کا مقدمہ درج ہے، پولیس نے مریم اورنگزیب، جاوید لطیف سمیت دیگر کے خلاف مقدمہ درج کر رکھا ہے۔

شوہر نے ناراض بیوی کو زندہ جلا کر سسر کو بھی قتل کردیا

 شوہر نے ناراض بیوی کو زندہ جلا کر سسر کو بھی قتل کردیا

نئی دہلی: بھارتی ریاست اتر پردیش میں شوہر نے ناراض ہو کر میکے میں رہنے والی بیوی کو مٹی کا تیل چھڑک کر زندہ جلادیا اور جب بیٹی کو بچانے باپ پہنچا تو سفاک شخص نے سر پر اینٹ مار کر سسر کو قتل کردیا۔بھارتی میڈیا کے مطابق سفاک شوہر نے بیوی اور سسر کو بیدردی سے قتل کرنے کے بعد اپنے دو چھوٹے بچوں کا گلا دبا کر مارنے کی کوشش کی لیکن بڑی بیٹی نے اپنے دونوں چھوٹے بہن بھائیوں کو بچالیا۔بڑی بیٹی نے پولیس کو فون کرکے اپنے باپ کے قتل کی واردات کے بارے میں بتایا تاہم پولیس کے پہنچنے سے قبل ملزم نے خود کو بھی گولی مار کر اپنی زندگی کا خاتمہ کرلیا۔پولیس کا کہنا ہے کہ مقتولہ 39 سالہ انوسیا اپنے شوہر 42 سالہ اوم پرکاش سے ناراض ہوکر باپ کے زیر تعمیر ایک گھر میں دو ماہ سے رہ رہی تھی اور شوہر اپنے دوست کے ہمراہ بیوی کو منانے پہنچا تھا۔دوست کی ضمانت پر سسر اور بیوی نے اوم پرکاش کی بات مان لی اس کے بعد دوست واپس چلا گیا اور اوم پرکاش نے کہا میں رات یہی ٹھہروں گا لیکن جیسے ہی دوست اور سسر گھر سے نکلے اس نے جھگڑا شروع کردیا۔بیٹی نے پولیس کو بتایا کہ باپ نے پہلے والدہ کو آگ لگادی جس پر میں چیخی تو نانا اور ابو کے دوست واپس آگئے۔ نانا نے امی کو بچانے کی کوشش کی تو ابو نے انھیں قتل کردیا۔بیٹی کے بیان کے مطابق ابو کے ساتھ آنے والے دوست نے بھی آگ بجھانے کی کوشش کی جس کے دوران وہ بھی جھلس گئے اور انھیں اسپتال لے جانا پڑا۔پولیس کو دیئے گئے بیان میں بیٹی نے مزید بتایا کہ ابو نے اس پر ہی بس نہیں کیا بلکہ میرے دو چھوٹے بہن بھائیوں کو گلا دبا کر مارنے کی کوشش کی جنھیں میں چھڑانے میں کامیاب ہوگئی اور پولیس کو کال کی۔