Daily Nawa-i-Ajam Lahore

Thursday, 30 November 2023

منی لانڈرنگ کیس؛ مونس الہی کو اشتہاری قرار دینے کی کارروائی شروع

لاہور: ایف آئی اے منی لانڈرنگ مقدمے میں بڑی پیش رفت ہوگئی۔عدالتی حکم پر مونس الہی کو اشتہاری قرار دینے کی کارروائی شروع کردی گئی۔ مختلف جگہوں پر مونس الہی سے متعلق اشتہارات آویزاں کردیے گئے۔ اشتہار کے متن کے مطابق مونس الہی روپوش ہیں اور عدالت میں پیش نہیں ہورہے۔اسپیشل سینٹرل عدالت کے جج نے منی لانڈرنگ کیس میں اشتہاری کی کارروائی شروع کی۔ مونس الہی کو آج عدالت میں پیش ہونے کی مہلت دی گئی تھی۔ ایف آئی اے نے چالان عدالت جمع کرا رکھا ہے۔

ایک بیٹا 3 مائیں، نادرا کا انوکھا کارنامہ

کراچی: ایک بیٹا 3 مائیں، نادرا کا انوکھا کارنامہ، خاتون نے نادرا کیخلاف سندھ ہائیکورٹ سے رجوع کرلیا۔عدالت عالیہ نے نادرا کو نوٹس جاری کردیئے۔ ہائیکورٹ میں نادرا کی جانب سے ایک بیٹے کی تین ماؤں کے ریکارڈ کیخلاف صدف کے درخواست پر سماعت ہوئی۔درخواست گزار کے وکیل نے مؤقف دیا کہ نادرا ریکارڈ کے مطابق 17 سالہ نوجوان عمر رضا کی تین تین مائیں ہیں۔ نوجوان عمر رضا کے والدین میں علیحدگی ہوگئی ہے۔ ایک جگہ دادی ماں ہے، تو دوسری جگہ سوتیلی ماں والدہ ہے۔ نادرا ریکارڈ میں نوجوان کی 3 ماؤں کے غلط ریکارڈ کی وجہ سے مستقبل میں مسئلہ ہوسکتا ہے۔ عدالت نے نادرا کو نوٹس جاری کرتے ہوئے جواب طلب کرلیا۔

190 ملین پاؤنڈز کرپشن کیس؛ عمران خان کی درخواستِ ضمانت بعد از گرفتاری دائر

اسلام آباد: چیئرمین پی ٹی آئی کی جانب سے 190 ملین پاؤنڈز کرپشن کیس میں درخواست ضمانت بعد از گرفتاری دائر کردی گئی۔عمران خان کی جانب سے وکیل لطیف کھوسہ، انتظار پنجوتھہ، علی اعجاز کے ذریعے درخواست احتساب عدالت اسلام آباد میں دائر کی گئی ہے، جس پر جج محمد بشیر نے نوٹسز جاری کردیے ہیں۔ درخواست ضمانت میں چیئرمین نیب اور ڈائریکٹر جنرل نیب کو فریق بنایا گیا ہے ۔درخواست میں مؤقف اختیار کیا گیا ہے کہ درخواست گزار سابق وزیراعظم اور معروف کرکٹر رہ چکے ہیں۔ چیئرمین پی ٹی آئی کے خلاف سیاسی بنیادوں پر ان کی شہرت کو نقصان پہنچایا جارہا ہے۔ عدالت سے استدعا ہے کہ 190 ملین پاؤنڈز اسکینڈل کیس کے فیصلے تک ضمانت بعد از گرفتاری منظور کی جائے۔احتساب عدالت کی جانب سے نوٹسز جاری کیے جانے کے بعد نیب پراسیکیوٹر سہیل عارف نے کمرہ عدالت ہی میں نوٹس وصول کرلیا۔ عدالت نے سماعت 4 دسمبر تک ملتوی کردی۔

نگراں وفاقی وزرا گوہر اعجاز اور عمر سیف کے اثاثے منظر عام پر

اسلام آباد: الیکشن کمیشن نے نگران وفاقی وزراء کے اثاثوں کے تفصیلات جاری کردیں، گوہر اعجاز کے پاس اربوں روپے کے اثاثے ہیں، ان کے کمسن بچے ایک ارب 57 کروڑ 16 لاکھ کے مالک ہیں، وزیر برائے آئی ٹی عمر سیف کے پاس 28 کروڑ کے اثاثے ہیں۔ایکسپریس نیوز کے مطابق الیکشن کمیشن میں جمع کرائی تفصیلات میں نگران وزیر برائے کامرس گوہر اعجاز نے زرعی اراضی میں 3 لاکھ 12 ہزار روپے کا حصہ ظاہر کیا ہے، لاہور میں دس کنال اراضی ہے جس کی مالیت 4 کروڑ 56 لاکھ ظاہر کی ہے، لاہور میں ہی 132 کنال اراضی کی مجموعی مالیت دو کروڑ 91 لاکھ روپے ظاہر کی ہے۔ لاہور میں 8 کنال رقبے کی قیمت ساڑھے 71 لاکھ روپے، لاہور میں 16 کنال اراضی 86 لاکھ روپے ظاہر کی ہے اور 1195 کنال اراضی 1 ارب 19 کروڑ38 لاکھ ظاہر کی۔گوہر اعجاز چنیوٹ میں واقع وارثی گھر میں 50 ہزار روپے کے حصے کے مالک ہیں، لاہور کے وارثتی گھر میں ان کا 1 کروڑ 57 لاکھ روپے مالیت کا حصہ ہے، ماڈل ٹاؤن میں 79 کروڑ 84 لاکھ روپے مالیت کا گھر بھی گوہر اعجاز کی ملکیت ہے۔وہ کراچی میں 68 لاکھ روپے کی دکان کے مالک ہیں، لاہور میں 14 کروڑ مالیت کا پلاٹ بھی اثاثوں میں ظاہر کیا گیا ہے، لاہور میں 35 کنال زمین کی قیمت ساڑھے 17 کروڑ ظاہر کی ہے، لاہور ماڈل ٹاؤن والدہ کے نام پر مکان پونے تین کروڑ روپے مالیت کا ظاہر کیا ہے، اہلیہ کے نام چار جائیدادیں ہیں، اہلیہ کے نام وارثتی مکان میں 1 کروڑ 42 لاکھ کا حصہ ہے، اہلیہ کے نام 19 کنال زمین 1 کروڑ 78 لاکھ روپے کی ہے، ایبٹ آباد مکان کی مالیت 6 کروڑ 87 لاکھ روپے ظاہر کی ہے۔پاکستانی میں پراپرٹی بزنس میں 18 کروڑ 7 لاکھ روپے ظاہر کیے ہیں، اسٹاک مارکیٹ میں 1 ارب 50 کروڑ 56 لاکھ روپے سے زائد کے شئیر کے مالک ہیں، گاڑیوں میں بی ایم ڈبلیو 1 کروڑ دو لاکھ روپے، مرسیڈیز 95 لاکھ اور لینڈ روور 7 کروڑ دس لاکھ روپے کی ہے، جیولری 4 کروڑ 36 لاکھ اور کیش 3 کروڑ 14 لاکھ روپے ظاہر کیا ہے، بینکوں میں 1 کروڑ 60 لاکھ روپے پڑے ہیں، 1 لاکھ دس ہزار روپے کے فرنیچر کے مالک ہیں، 1 کروڑ 32 لاکھ کے گھوڑے اور دیگر سامان کے مالک ہیں، گوہر اعجاز کے کمسن بچے ایک ارب 57 کروڑ 16 لاکھ کے مالک ہیں۔

عمر سیف 28 کروڑ روپے کے اثاثوں کے مالک

الیکشن کمیشن نے نگران وفاقی وزیر برائے آئی ٹی عمر سیف کے اثاثے بھی ظاہر کیے ہیں جو کہ 28 کروڑ روپے سے زائد اثاثوں کے مالک ہیں۔ڈی ایچ اے ملتان میں 1 کنال رہائشی پلاٹ کی مالیت 62 لاکھ 50 ہزار ظاہر کی گئی ہے، ڈی ایچ اے لاہور میں 4 مرلہ کمرشل پلاٹ کی مالیت 3 کروڑ 5 لاکھ 50 ہزار ظاہر کی گئی، لاہور کے علاقے مسلم ٹاؤن میں تجارتی عمارت کی مالیت 70 لاکھ بتائی گئی، ڈی ایچ اے لاہور میں اہلیہ کے نام پر 1 کنال رہائشی پلاٹ کی مالیت 1 کروڑ 43 لاکھ بتائی گئی۔عمر سیف نے ڈی ایچ اے لاہور فیز 9 میں اہلیہ کے نام پر 4 مرلے کے رہائشی پلاٹ کی مالیت 4 کروڑ 35 لاکھ ظاہر کی، اہلیہ کے نام پر ڈی ایچ اے فیز 11 میں 4 مرلے کے کمرشل پلاٹ کی مالیت 2 کروڑ 10 لاکھ 46 ہزار ظاہر کی، اہلیہ کے نام پر نیول اینکریج لاہور میں 4 مرلے کی دو پلاٹوں کی مالیت 1 کروڑ 50 لاکھ ظاہر کی۔نگران وزیر برائے آئی ٹی نے اہلیہ کے نام پر ایل ڈی اے سٹی لاہور میں 10 مرلے کے رہائشی پلاٹ کی مالیت 27 لاکھ روپے ظاہر کی، نیول اینکریج لاہور میں اہلیہ کے نام پر 10 مرلے کے 2 رہائشی پلاٹس کی قیمت 1 کروڑ 19 لاکھ روپے ظاہر کی، اہلیہ کے نام پر اوئسٹر کاؤنٹ گلبرگ 3 لاہور میں اپارٹمنٹ کی قیمت 50 کروڑ ظاہر کی۔انہوں ںے بیرون ملک کاروبار کی مالیت 11 ہزار نو سو 75 ڈالر ظاہر کی، ٹی پی ایل پی میں 4 لاکھ شیئرز کی مالیت 4 کروڑ سے زائد اور ڈیڑھ لاکھ شیئرز کی قیمت 6 لاکھ 74 سے زائد ظاہر کی، آئی ٹی کمپنی میں شیئرز کی مالیت 48 لاکھ سے زائد ظاہر کی ، 110 تولہ سونے کی مالیت 56 لاکھ سے زائد ظاہر کی، نقدی کی صورت میں نگران وزیر آئی ٹی نے 10 لاکھ روپے سے زائد رقم ظاہر کی۔نگران وزیر آئی ٹی عمر سیف نے ایک نجی بینک اکاؤنٹ میں 5 کروڑ 26 لاکھ روپے سے زائد جبکہ دوسرے اکاؤنٹ میں 20 ہزار ڈالر سے زائد رقم ظاہر کی، عمر سیف کی اہلیہ کے اکاؤنٹ میں 97 لاکھ روپے سے زائد رقم موجود ہے۔

پی ایس ایل 9 ؛ افتخار احمد ملتان سلطانز کا حصہ بن گئے

لاہور: پی ایس ایل 9کیلیے ملتان سلطانز نے افتخار احمد کی خدمات حاصل کرلیں، بدلے میں رائلی روسو گلیڈی ایٹرز کے اسکواڈ کا حصہ بن گئے۔فرنچائزز کی ٹریڈنگ کے نتیجے میں ملتان سلطانز نے افتخار احمد اور پہلی پلاٹینم پک جبکہ کوئٹہ گلیڈی ایٹرز نے رائلی رسو اورسلور راؤنڈ پک کا حق حاصل کیا ہے۔افتخار احمد کا کہنا ہے کہ سلطانز کا حصہ بننے پر خوش ہوں، ملتان کی نمائندگی میرے لیے اعزاز کی بات ہے، یہاں کے شائقین میں کرکٹ کا ایک جنون ہے۔ انہوں نے کہا کہ گزشتہ 3 سیزنز میں فرنچائز کی کارکردگی بھی شاندار رہی ہے۔ملتان سلطانز کے کپتان محمد رضوان نے بیٹر کو خوش آمدید کہتے ہوئے کہا کہ ٹیم میں افتخار احمد کا استقبال کرتا ہوں، ان کی مہارت اور تجربہ ٹیم کیلیے کارآمد ثابت ہوگا، ان کی میدان میں پرفامنس ہی نہیں ڈریسنگ روم میں موجودگی بھی خوش آئند ہوگی۔ہیڈ کوچ عبدالرحمان نے کہا کہ پی ایس ایل کی بڑی ٹریڈز میں سے ایک کے نتیجے میں افتخار احمد کی خدمات حاصل ہوئی ہیں، وہ ایک میچ ونر ہیں، اننگز کے کسی بھی مرحلے میں فتح کیلیے ان پر بھروسہ کیا جاسکتا ہے۔

موسم سرما کی تعطیلات کا نوٹیفکیشن جاری

کراچی: محکمہ تعلیم سندھ نے موسم سرما کی تعطیلات کا نوٹیفکیشن جاری کردیا۔محکمہ تعلیم سندھ کے مطابق تمام نجی و سرکاری تعلیمی اداروں میں 22 دسمبر سے 31 دسمبر 2023 تک موسم سرما کی تعطیلات ہوں گی جبکہ تمام تعلیمی ادارے یکم جنوری 2024 سے واپس کھلیں گے۔تعطیلات کا اطلاق تمام سرکاری و نجی اسکولوں پر ہوگا۔ موسم سرما کی 10 روز کی چھٹیوں کے دوران طلباء کو گھر میں پڑھنے کیلئے ہوم ورک بھی دیا جائے گا۔

سالانہ1 لاکھ 41 ہزار بچے ماں کا دودھ نہ ملنے سے جاں بحق ہوجاتے ہیں، سینیٹ کمیٹی میں انکشاف

اسلام آباد: سینیٹ کی قائمہ کمیٹی برائے صحت کے اجلاس میں انکشاف کیا گیا ہے کہ سالانہ ایک لاکھ 41 ہزار بچے ماں کا دودھ میسر نہ ہونے کے باعث موت کے منہ میں چلے جاتے ہیں۔سینیٹ کی قائمہ کمیٹی صحت کا اجلاس چیئرمین کمیٹی ہمایوں مہمند کی زیر صدارت منعقد ہوا، اجلاس میں انجرڈ ٹریٹمنٹ بل 2023 پیش کیا گیا۔نجی اسپتالوں میں حادثات کا شکار مریضوں کے بل حکومت کی طرف سے ادا کیے جانے پر سیکرٹری وزارت صحت نے کہا کہ اس عمل کے لیے بجٹ کی ضرورت ہوگی۔ینیٹر مہر تاج روغانی نے کہا کہ پولی کلینک میں آپریشن ہوتے نہیں تھے اور بجٹ کولیپس بھی ہو گیا تھا ، جہاں بجٹ ملا وہاں کیا اور کہاں استعمال ہوا۔سینیٹر جام مہتاب نے کہا کہ ایمرجنسی میں ہر صورت میں مریضوں کو ٹریٹمنٹ دینے کی ضرورت ہے، یہ بات بل میں بھی موجود ہے، زندگی بچانا اول ہو، میڈیکو لیگل کے سسٹم اور فریم ورک پر غور ترجیح ہونا تشویشناک ہے۔چیئرمین کمیٹی نے کہا کہ عوامی ضرورت کے تحت اس بل کو ہمیں منظور کرنا ہو گا۔ سینیٹر مہر تاج نے کمیٹی میں انکشاف کیا کہ ایک لاکھ41 ہزار بچے ماں کا دودھ نہ ملنے کے باعث مختلف بیماریوں کا شکار ہو کر موت کے منہ میں چلے جاتے ہیں، مصنوعی خوراک سے بچوں میں غذائی ضرورت پوری نہیں ہوتی۔انہوں نے مزید کہاکہ 36 ماہ تک بچوں کو ماں کا دودھ دینا لازم ہے، عالمی ادارہ صحت بھی اس مدت تک مارکیٹ پروڈکٹ کی مخالفت کرتا ہے، 36 ماہ سے کم عمر بچوں کو ڈبے کا دودھ اور خوراک دینے کی حوصلہ شکنی ضروری ہے۔ بل میں تجویز کیاگیا ہے کہ مینوفیکچررز کے خلاف 4 سال قید اور 5 ملین جرمانے کو قانون کا حصہ بنایا جانا چاہیے۔چیئرمین کمیٹی نے کہا کہ یہ کیس عدالت میں مینوفیکچرر لے کر جائیں تو ہمیں کریمنل کورٹ میں دفاع اور سفارشات پیش کرنا ہوں گی۔قائمہ کمٹی میں وزارت کی جانب سے اسپتالوں کو بجٹ سے انکار کا معاملہ بھی زیر غور آیا جس پر وزارت صحت کے حکام نے بتایا کہ بجٹ کے لیے فنڈز موجود نہیں ہیں، فنڈز ریلیز ہوں گے تو مہیا کیے جائیں گے ۔

سال 2023؛ پاکستان میں سب سے زیادہ سنے جانے والے سنگرز کی فہرست جاری

دنیا بھر میں نغموں کو سننے کے لیے سب سے زیادہ استعمال ہونے والی میوزک اسٹریمنگ سروس Spotify نے پاکستان میں سال 2023 کے دوران مداحوں کے دلوں پر راج کرنے والے ممتاز گلوکاروں کی عالمی فہرست جاری کردی جس میں پاکستانی گلوکار بھی شامل ہیں۔ عالمی خبر رساں ادارے کے مطابق اسپاٹی فائی (Spotify) کے Wrapped 2023 کے تحت پاکستان میں سب سے زیادہ سنے جانے والے گلوکاروں کی فہرست جاری کردی۔رواں برس کے اختتام پر پاکستانی گلوکار عاطف اسلم اور طلحہ انجم نے ایک بار پھر موسیقی کی دنیا میں اپنی صلاحیتوں کا لوہا منوانے میں کامیاب رہے ہیں اور پاکستان کے سب سے زیادہ اسٹریم کیے جانے والے گلوکاروں کی فہرست میں شامل ہیں۔مجموعی طور پاکستان میں سب سے زیادہ اسٹریم کیے جانے والے گلوکار بھارتی ارجیت سنگھ ہیں۔ ان کے علاوہ پریتم، اے پی ڈھلن، عاطف اسلم، طلحہ انجم، ٹیلر سوئفٹ،نصرت فتح علی خان، آنجہانی موسیٰ والا، راحت فتح علی خان اور عاصم اظہر وغیرہ بھی شامل ہیں۔پاکستان میں گلوکاراؤں میں پسوڑی سے عالمی شہرت حاصل کرنے والی شائی گل اوّل نمبر پر ہیں۔ ان کے بعد مومنہ مستحسن اور عابدہ پروین کو سب سے زیادہ سنا گیا۔ فہرست میں قرۃ العین بلوچ، نصیبو لال اور آئمہ بیگ بھی شامل ہیں۔اسی طرح 23 سال قبل انتقال کرجانے والی نازیہ حسن اب بھی سب سے زیادہ سنے جانے والی گلوکاراؤں کی فہرست میں شامل ہیں۔نوجوان گلوکار عمیر اور عبدالحنان بھی 10 زیادہ سنے جانے والے پاکستانی گلوکاروں کی فہرست میں جگہ بنانے میں کامیاب ہوگئے۔مقبول پاکستانی گانوں کی بات کی جائے تو کیفی کے گانے ’’کہانی سنو‘‘ کو کوئی اور نغمہ مقبولیت میں شکست نہیں دے سکا تاہم نئے گلوکار عبد الحنان کے تین نغموں ’’ارادے، بکرا اور سیا‘‘ نے بھی مقبولیت کے جھنڈے گاڑ دیے۔اگر بات کی جائے میوزک البم کی تو طلحہ انجم کے ’’اوپن لیٹر‘‘ نے پاکستانی گلوکاروں کے البمز میں میدان مار لیا ہے۔ اس البم کی مقبولیت کا اندازہ اس بات سے لگایا جا سکتا ہے کہ اسے صرف شبھ کے اسٹیل رولن نے پیچھے چھوڑا۔

جو لیڈر ملک کو آگے لے جائے بعض قوتیں اسے پیچھے کھینچتی ہیں، آصف زرداری

کوئٹہ: پیپلز پارٹی کے شریک چیئرمین آصف زرداری نے کہا ہے کہ پیپلز پارٹی بلوچستان کے عوام کو صوبے کا مالک بنائے گی، یہاں پر گیس، پیٹرول اور معدنیات جو کچھ بھی ہے عوام کا ہے اس پر کسی اور کا کوئی حق نہیں۔پاکستان پیپلز پارٹی کے یوم تاسیس کے موقع پر کوئٹہ میں جلسے سے خطاب کرتے ہوئے شریک چیئرمین پیپلز پارٹی آصف علی زرداری نے کہا کہ بلوچستان پاکستان کا دل ہے لیکن افسوس ہے کہ اسلام آباد کو اور پاکستان کے دوسرے صوبوں کو پاکستان کا یہ دل نظر نہیں آتا لیکن ہمیں نظر آتا ہے اس دل کو جیتے ہوئے ہم پاکستان کو درست نہیں کرسکتے۔آصف زرداری نے کہا کہ بلوچستان کی دھرتی پر ایک دکھ پھیلا ہوا ہے جس پر ہمیں مرہم رکھنا ہے، پاکستان پیپلز پارٹی یہاں کے عوام کو بلوچستان کا مالک بنائے گی، اس صوبے میں جو کچھ ہے آپ کا ہے کسی اور کا نہیں چاہے وہ گیس ہو، پیٹرول ہو یا کوئی بھی معدنیات سب پر عوام کا حق ہے، سارے صوبوں کی زمین ایک طرف بلوچستان کی زمین ایک طرف ہم یہاں پانی فراہم کریں گے۔انہوں نے کہا کہ بلاول نے کم عمر وزیر خارجہ بن کر پاکستان کی عزت بلند کردی، ہمیں ہر بلاول کو سپورٹ کرنا ہے اس کی تربیت کرنی ہے، آپ بھی دیکھیں گے میں بھی دیکھوں گا، ہم پاکستان کو دوبارہ ری ڈیفائن کریں گے۔آصف علی زرداری نے مزید کہا کہ بلاول کو یوتھ کا آج کل اور مستقبل کا لیڈر بنانا ہے، بلاول کو نوجوان لیڈر بنانا ہے، قوم کو لیڈر چلاتے ہیں، ہمیں جو آتا ہے بلاول بھٹو کو منتقل کرنا ہے۔انہوں نے مزید کہا کہ ہمارے ہاں جو لیڈر ملک کو آگے لے جانا چاہتا ہے تو بہت سی قوتیں اسے پیچھے کھینچتی ہیں، لیکن ہمیں ان قوتوں سے ڈر نہیں، ہمیں عوام پر بھروسہ ہے۔

ماں کی لاش کیساتھ ایک سال تک رہنے والی 2 بیٹیاں گرفتار

وارانسی: بھارتی ریاست اترپردیش میں دو خواتین کو گھر میں ایک سال تک ماں کی لاش کے ساتھ رہنے کے جرم میں حراست میں لے لیا گیا۔بھارتی میڈیا کے مطابق اترپردیش کے شہر وارانسی کے ایک گھر سے پولیس نے دو بہنوں 27 سالہ پلاوی ترپاٹھی اور 18 سالہ ویشوک ترپاٹھی کو گرفتار کرکے لاک اپ کردیا جب کہ گھر سے ان کی ماں کی ایک سال پرانی لاش بھی برآمد کرلی۔پولیس کا کہنا ہے کہ مردہ خاتون کی شناخت 52 سالہ اوشا ترپاٹھی کے نام سے ہوئی ہے جو طویل علالت کے بعد دسمبر 2022 میں انتقال کرگئی تھیں لیکن ان کی بیٹیوں نے آخری رسومات ادا نہیں کیں اور لاش کے ساتھ ہی رہ رہی تھیں۔پولیس کے مطابق 15 دن سے دونوں بہنیں گھر سے باہر نہیں نکلی تھیں جس کی وجہ سے پڑوسیوں کو شک ہوا اور انھوں نے تھانے میں اطلاع دی تھی جب گھر پہنچے تو دونوں بہنیں نیم بے ہوش تھیں۔بعد ازاں پولیس نے دونوں بہنوں کو طبی اور ذہنی معائنے کے لیے اسپتال بھیج دیا جب کہ لاش کو فرانزک کے لیے منتقل کردیا گیا۔

مقدمات سے بریت؛ شریف برادران کے لاڈلے ہونے میں کوئی شک باقی ہے؟ پرویز الٰہی

لاہور: پی ٹی آئی کے مرکزی صدرچوہدری پرویز ا

لٰہی نے کہا ہے کہ مقدمات سے بری ہونے پر شریف برادران کے لاڈلے ہونے میں کوئی شک باقی رہ گیا ہے؟۔عدالت میں پیشی کے موقع پر صحافیوں سے غیر رسمی گفتگو کرتے ہوئے سابق وزیراعلیٰ پنجاب اور پاکستان تحریک انصاف کے مرکزی صدر چوہدری پرویز الٰہی نے کہا کہ نوازشریف کی فوری بریت کے بعد بھی ان کے لاڈلے ہونے میں کوئی شک باقی رہ گیا ہے؟۔ لاڈلے نوازشریف اور شہبازشریف عوامی عدالت میں اپنے کرتوتوں کا حساب دینے کے لیے تیار رہیں۔پرویز الٰہی کا کہنا تھا کہ ہیرا پھیری کے چمپئن شریف برادران اللہ اور عوام کی عدالت سے کیسے بچیں گے۔ لاڈلے نوازشریف اور شہبازشریف ایسا تاثر پیدا کر رہے ہیں جیسے یہ چار بار عوام کو دھوکا دینے کے بعد پھر آ جائیں گے۔ اس بار قوم انہیں الیکشن میں آٹے دال کا بھاؤ یاد کروا دیں گے۔ مہنگائی کے شہنشاہ شہبازشریف کو الیکشن میں لگ پتا جائے گا۔انہوں نے کہا کہ یہ جو بھی ہتھکنڈے استعمال کر لیں عوامی غیض وغضب سے نہیں بچ سکیں گے۔ وہ دن دور نہیں جب عوام ان شا اللہ ان لاڈلوں کو ووٹ کی پرچی کے ذریعے باہر نکالیں گے اور یہ منہ چھپاتے پھریں گے۔ ن لیگ ہر بار عوام کو گمراہ کر کے اقتدار حاصل کرتی ہے، اب ان لاڈلوں کو چاہیے کہ عوام کی جان چھوڑ دیں۔سابق وزیراعلیٰ پنجاب کا کہنا تھا کہ نوازشریف اور شہبازشریف دونوں اپنے کیس ختم کروا کے بھی سرخرو نہیں ہو سکتے، عوام کو جواب دینا ہو گا۔ شہبازشریف نے 16 ماہ کی حکومت میں سوائے لیول پلیئنگ فیلڈ حاصل کرنے کے کچھ نہیں کیا۔ اس کے بدلے لاڈلوں نے پاکستان کو مہنگائی اور بیروزگاری کا نہ ختم ہونے والا سلسلہ دیا۔مرکزی صدر پی ٹی آئی نے مزید کہا کہ تحریک انصاف بلے کے نشان کے ساتھ الیکشن میں اترے گی اور کامیابی بھی حاصل کرے گی۔ فری اینڈ فیئر الیکشن ہوں گے، تحریک انصاف پورے پاکستان میں ہر سیٹ پر اپنا امیدوار کھڑا کرے گی۔ پنجاب کا خزانہ سیاسی عیاشیوں پر اڑانے والے نگراں، بچوں کے لیے قرآنی سپارے نہیں چھاپ رہے جب کہ ہماری حکومت نے بارہویں جماعت تک ناظرہ قرآن کی تعلیم لازمی قرار دی تھی۔