Daily Nawa-i-Ajam Lahore

Tuesday, 5 December 2023

اکشے کمار کی کامیڈی فلم ’ہاؤس فل 5‘ کی ریلیز ملتوی

ممبئی: بالی وڈ سپر اسٹار اکشے کمار کی کامیڈی فلم ’ہاؤس فل 5‘ کی ریلیز ملتوی کردی گئی۔فلم میکرز کی طرف سے پہلے اعلان کیا گیا تھا کہ ’ہاؤس فل5‘ دیوالی 2024 میں ریلیز ہوگی لیکن اب اسے 6 جون 2025 تک بڑھا دیا گیا ہے۔اکشے کمار نے انسٹاگرام پر ریلیز کے ملتوی ہونے کا اعلان کرتے ہوئے لکھا کہ فلم کو معیاری وی ایف ایکس کی ضرورت ہے جس کیلئے مزید وقت کی ضرورت ہوگی۔فلم کو ترن منشکھانی ہدایت کاری دیں گے اور ساجد نادیاوالا پروڈیوس کریں گے، ’ہاؤس فل 5‘ میں معروف بالی وڈ اداکار رتیش دیش مکھ کی واپسی ہوئی ہے جبکہ باقی کاسٹ کے حوالے سے تفصیلات جلد سامنے آئیں گی۔اکشے کمار اور رتیش دیش مکھ ہاؤس فل سیریز کے مرکزی ستون سمجھے جاتے ہیں، سیریز کے پہلے اور دوسرے پارٹ کو ساجد خان نے ہدایت کاری دی تھی۔تیسرے پارٹ کو ساجد خان اور فرہاد سمجی نے مل کر ڈائریکشن دی جبکہ چوتھے پارٹ کو فرہاد سمجی نے اکیلئے ہدایت کاری دی تھی۔

بھارت میں ایک بار پھر فسادات پھوٹ پڑے؛ مزید 13 افراد ہلاک

گوہاٹی: بھارتی ریاست منی پور میں دو مسلح گروہوں کے تصادم میں کم از کم 13 افراد ہلاک اور درجنوں زخمی ہوگئے۔بھارتی میڈیا کے مطابق ریاست منی پور میں نسلی فسادات ایک بار پھر پھوٹ پڑے۔ 7 ماہ قبل شروع ہونے والے ان فسادات میں مجموعی طور پر 200 کے قریب افراد ہلاک اور 2 ہزار سے زائد زخمی ہوچکے ہیں۔آج تازہ جھڑپ میں اکثریتی نسلی گروپ میتھی اور اقلیتی نسل کوکی برادری نے آتشیں اسلحے کا بے دریغ استعمال کیا، ایک دوسرے کی املاک کو نذر آتش کیا اور اندھا دھند فائرنگ کی گئی۔آج ہونے والے فسادات میں 13 افراد ہلاک اور دو درجن سے زائد زخمی ہوگئے جن میں سے 9 کی حالت نازک ہونے کے باعث ہلاکتوں میں اضافے کا خدشہ ہے۔پولیس کا کہنا ہے کہ ملنے والوں کی لاشوں کی شناخت کا عمل جاری ہے۔ ابھی یہ معلوم نہیں ہوسکا کہ کس برادری کے کتنے لوگ ہلاک ہوئے اور جھگڑے کی ابتدا کس نے کی۔یاد رہے کہ منی پور میں فسادات کا آغاز اس وقت ہوا تھا جب وزیر اعظم نریندر مودی نے دونوں برادری کو حاصل حکومتی مراعات اور کوٹے کی تقسیم میں بڑی تبدیلی کی تھی۔ان فسادات میں بھارتیہ جنتا پارٹی کے وزرا کے گھروں کو بھی نذر آتش کیا گیا تھا اور مودی کی جماعت کو منہ چھپانے کی بھی جگہ نہیں مل رہی ہے۔ اس قتل وغارت گری پر چپ سادھے مودی کو عالمی تنقید کا بھی سامنا ہے۔

ن لیگ اور جے یو آئی کا عام انتخابات ملکر لڑنے اور مشترکہ صداراتی امیدوار لانے پر اتفاق

لاہور: نواز شریف اور فضل الرحمان کے درمیان اہم ملاقات ہوئی ہے جس میں انتخابات میں سیٹ ایڈجسمنٹ کے فارمولے پر بات ہوئی جبکہ دونوں جماعتوں نے عام انتخابات ملکر لڑنے مشترکہ صدارتی امیدوار لانے پر اتفاق ہوا ہے۔ایکسپریس نیوز کے مطابق پاکستان مسلم لیگ (ن) کے قائد محمد نواز شریف اور پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمن کے درمیان مسلم لیگ ن کے سیکرٹریٹ ماڈل ٹاون میں ملاقات کی۔اس موقع پر دونوں پارٹیوں کے دیگر رہنما بھی موجود تھے جن میں مریم نواز شریف، سینیٹر اسحاق ڈار، احسن اقبال، خواجہ سعد رفیق، مریم اورنگزیب اور دیگر رہنما شامل ہیں۔ملاقات میں ملکی کی مجموعی سیاسی صورتحال کے حوالے سے تبادلہ خیال کیا گیا، آئندہ عام انتخابات سمیت دونوں جماعتیں کی سیاسی حکمت عملی پر غوروخوض کیا گیا۔ ن لیگ اور جے یو آئی کے درمیان سیٹ ایڈجسمنٹ سے متعلق فارمولے پر بات ہوئی۔سلم لیگ (ن) کے ذرائع نے بتایا کہ دونوں جماعتوں کے قائدین نے عام انتخابات، مشترکہ صدارتی امیدوار لانے سمیت دیگر اہم امور پر اتفاق کیا۔ذرائع کا کہنا ہے کہ دونوں جماعتوں کے مابین وفود کی سطح پر تفصیلی مذاکرات ہوئے جبکہ خواجہ سعد رفیق نے سندھ میں ایم کیو ایم کے ساتھ ہونے والے سیاسی مذاکرات بارے اجلاس کو بریفنگ دی۔ ایم کیو ایم کے مجوزہ ملک گیر بلدیاتی نظام پر تفصیلی مشاورت کی اور ایم کیو ایم کے مجوزہ بلدیاتی نظام پر مکمل اتفاق رائے کیا۔ اجلاس میں اتفاق کیا گیا کہ آئندہ پارلیمان میں اس بلدیاتی نظام بارے آئینی ترمیم لائی جائے گی۔نواز شریف نے مولانا فضل الرحمان کو مسلم لیگ ن اور ایم کیو ایم کے مابین طے پائے جانے والے انتخابی معاہدے پر اعتماد میں لیا، دونوں جماعتوں نے سندھ میں ایم کیو ایم اور دیگر ہم خیال جماعتوں سے مل کر انتخابی اتحاد بنانے پر بھی اتفاق رائے ہوا۔ ذرائع کے مطابق اجلاس میں فیصلہ کیا گیا کہ سندھ میں تینوں جماعتیں دیگر اتحادیوں سے مل کر سیٹ ایڈجسٹمنٹ کر کے انتخابی میدان میں اتریں گی، سندھ میں امیدواروں کا فیصلہ لیگی صوبائی صدر بشیر میمن، جمعیت کے سیکرٹری راشد سومرو اور ایم کیو ایم کے نامزد رہنما کریں گے۔ذرائع نے بتایا کہ بلوچستان اور خیبر پختونخوا میں بھی مسلم لیگ ن اور جمعیت علمائے اسلام ف میں مکمل سیٹ ایڈجسٹمنٹ پر اتفاق ہو گیا ہے، دونوں صوبوں میں ہر قومی و صوبائی نشستوں پر امیدواروں باہمی اتفاق رائے سے اتارنے کا فیصلہ کیا گیا اور یہ بھی طے پایا کہ جس نشست پر جس پارٹی کا امیدوار مضبوط ہو گا اسی کی نامزدگی اور حمایت کی جائے گی، کسی اتفاق رائے پر نہ پہنچا جا سکا تو ایک جماعت کا امیدوار قومی اور دوسری کا صوبائی نشست پر نامزد کیا جائے گا۔دونوں جماعتوں کا آئندہ انتخابات کے بعد مل کر حکومت بنانے اور تمام امور پر مشترکہ حکمت عملی اپنانے پر اتفاق کیا اور مشترکہ صدارتی امیدوار لانے پر بھی مشاورت کی۔ نواز شریف نے صدارتی امیدوار کے معاملے پر آئندہ پارلیمان کے وجود میں آنے کے بعد فیصلہ کرنے کا عندیہ دے دیا۔

کراچی؛ خنکی بڑھ گئی، پیر کورواں موسم سرما کا سرد ترین دن ریکارڈ

کراچی: شہرمیں خنکی میں مزیدا ضافہ ہوگیا، پیرکوموسم سرما کا اب تک کا سرد ترین دن ریکارڈ ہوا، گذشتہ روز کے مقابلے میں پارہ 2.4ڈگری کمی سے 15.1ڈگری سینٹی گریڈ ریکارڈ ہوا، ہلکی دھند کی وجہ سے حدنگاہ بھی کم ہوکر3 کلومیٹر رہ گئی۔محکمہ موسمیات کے مطابق پیرکو رواں موسم سرما کا اب تک کا سرد ترین دن ریکارڈ ہوا، سرکاری ڈیٹا مرتب کرنے کے حامل ویدراسٹیشن پرکم سے کم پارہ گذشتہ روز کے مقابلے میں 2.4 ڈگری کمی سے15.1 ڈگری سینٹی گریڈ ریکارڈ ہوا (اتوارکوصبح کے وقت کم سے کم درجہ حرارت 17.5ڈگری ریکارڈ ہواتھا)۔شہرکا زیادہ سے زیادہ درجہ حرارت 30.5اورنمی کاتناسب 37فیصد رہا، شہر کی فضاؤں پرصبح کے وقت ہلکی دھند چھانے کے سبب حدنگاہ کم ہو کر3کلومیٹرریکارڈ ہوئی۔محکمہ موسمیات کے مطابق رواں ماہ کے وسط میں سردی کی شدت میں اضافہ متوقع ہے، دیہی سندھ کے مختلف اضلاع میں بھی سردی کی شدت بڑھ گئی، پیرکو سب سے کم پارہ موہنجودڑو میں 9 ڈگری سینٹی گریڈ ریکارڈ ہوا۔محکمہ موسمیات ارلی وارننگ سینٹر کی پیش گوئی کے مطابق اگلے3 روز تک شہر میں خنک/ سرد موسم برقرار رہے گا، جبکہ منگل اوربدھ کو کم سے کم پارہ مزید ایک ڈگری کمی سے 14 ڈگری سینٹی گریڈ تک گرسکتا ہےجبکہ زیادہ سے زیادہ پارہ 28 سے 30 ڈگری کے درمیان ریکارڈ ہوسکتا ہے۔شہرمیں بدستور سمندری ہوائیں بند رہنے اور بلوچستان کی شمال مشرقی ہواؤں کے چلتے رہنے کی توقع ہے، صوبے کے بیشتر اضلاع میں موسم دن میں خشک اور رات میں سرد رہنے کا امکان ہے،میدانی علاقوں میں صبح کے وقت دھند چھاسکتی ہے۔

کراچی میں ڈکیتی مزاحمت پر معروف ذاکر زخمی

کراچی: شہر قائد میں پھرتے دندناتے ڈاکوؤں نے ملیر میں معروف ذاکر علامہ سید جواد حیدر زیدی کو مزاحمت پر زخمی کردیا۔تفصیلات کے مطابق ملیر سٹی کے علاقے میں موٹر سائیکل سوار ڈاکوؤں نے ڈکیتی کے دوران مزاحمت پر 58 سالہ علامہ سید جواد حیدر زیدی کو فائرنگ کر کے زخمی کر دیا اور لوٹ مار کے بعد موقع سے فرار ہوگئے۔پولیس کے مطابق فائرنگ کا واقعہ جعفر طیار سوسائٹی امامیہ مسجد کے قریب پیش آیا، جس میں زخمی ہونے والے 58 سالہ سید جواد حیدر زیدی کو طبی امداد کے لیے اسپتال منتقل کردیا گیا اور اُن کی حالت خطرے سے باہر ہے۔ ڈاکٹرز کے مطابق جواد حیدر کی ران پر گولی لگی ہے۔اس حوالے سے پولیس نے علاقے میں نصب کلوز سرکٹ کیمروں کی فوٹیجز حاصل کرنے کی کوششیں شروع کردیں تاکہ واردات میں ملوث ڈاکوؤں کی شناخت میں مدد مل سکے۔آئی جی سندھ رفعت مختار راجہ نے علامہ سید جواد حیدر زیدی کو ڈکیتی کے دوران مزاحمت پر فائرنگ کا نشانہ بنا کر زخمی کرنے کے واقعہ کا نوٹس لیتے ہوئے ڈی آئی جی ایسٹ کو واردات میں ملوث ملزمان کو گرفتار کرنے کی ہدایت جاری کردی ہیں۔

اشنا شاہ نے عمرے کی سعادت حاصل کرلی، فسلطینیوں کیلئے خصوصی دعائیں

ریاض / مکہ مکرمہ: پاکستان کی معروف اداکارہ اشنا شاہ نے عمرے کی سعادت حاصل کرلی اور انہوں نے خانہ کعبہ میں تمام مسلمانوں اور غزہ کے مظلوم فلسطینیوں کیلئے خصوصی دعائیں مانگی ہیں۔ اداکارہ نے انسٹاگرام اور ایکس پر اپنی تصاویر اور ویڈیو شیئر کی جس میں انہیں حرم کعبہ کے اندر اپنے شوہر حمزہ امین کے ساتھ دیکھا جاسکتا ہے۔اشنا شاہ نے اپنی شوہر کے ساتھ عمرے کیلئے سفر کیا اور انہوں نے مداحوں کو خبر دی کہ ان کے شوہر نامور گالفر حمزہ امین کا یہ پہلا عمرہ ہے۔سماجی رابطے کی ویب سائٹ ایکس پر اداکارہ کی طرف سے پوسٹ کی گئی ایک ویڈیو میں لوگ طواف کررہے ہیں اور اشنا شاہ نے اس موقع پر مظلوم فلسطینیوں کی آزادی کیلئے اللہ تعالیٰ سے خصوصی دعائیں مانگی ہیں۔انسٹاگرام پوسٹ پر اشنا شاہ نے ترکیہ ویب سیریز ’فاتح صلاح الدین ایوبی‘ کے پروڈیوسر ڈاکٹر کاشف انصاری کا شکریہ بھی ادا کیا اور تاریخی ویب سیریز کا حصہ بننے پر مسرت کا اظہار کیا۔

گیس کی قیمت بڑھنے اور عدم فراہمی پر صنعتوں کی ہڑتال، ایکسپورٹ روکنے کی دھمکی

کراچی: صنعت کاروں نے گیس کی قیمت بڑھنے اور عدم فراہمی کے خلاف پیر کو شہر بھر میں ہڑتال کی اور صنعتوں کو تالے ڈال دیئے اور مسائل حل نہ ہونے پر صنعتوں کی بندش میں توسیع اور ایکسپورٹ بند کرنے کی دھمکی دے دی۔آل انڈسٹریل آلائنس کی جانب سے اعلان کردہ ہڑتال پر آج پیر کو کراچی سمیت سندھ اور بلوچستان کی صنعتیں بند کردی گئیں، فیکٹریوں کے باہر سیاہ بنیرز آویزاں کردیے گئے جن پر نعرے درج تھے، ایکسپورٹ انڈسٹری نے بھی اپنی فیکٹریاں بند رکھیں۔اس حوالے سے صنعت کاروں میں سائٹ ایسوسی ایشن میں پریس کانفرنس بھی کی جس میں آل انڈسٹریل آلائنس کے چیف کوآرڈی نیٹر جاوید بلوانی، نکاٹی کے صدر فیصل معز، سائٹ ایسوسی ایشن کے صدر کامران عربی اور دیگر موجود تھے۔ صنعت کاروں نے حکومت کو خبردار کیا کہ گیس ٹیرف کا مسئلہ حل نہ کیا گیا تو وہ ہڑتال کے دورانیے کو ایک ہفتے تک توسیع دے دیں گے اور صنعتیں بند کرنے کے ساتھ ایکسپورٹ بھی روک دی جائے گی۔جاوید بلوانی نے کہا کہ حکومت ہمارے ساتھ بیٹھے اور بات کرے، اگر آئی ایم ایف کے کہنے پر گیس کی سبسڈی ختم کرنی ہے تو پہلے فرٹیلائزر اور آئی پی پیز کو دی جانے والے کراس سبسڈی ختم کی جائے، آج ہم نے صرف دکھانے کے لیے کراچی کی تمام صنعتیں بند کی ہیں اور تمام 11 ایسوسی ایشنز میں آج ایکسپورٹ اور پیداوار بند رکھی گئی ہے لیکن اگر حکومت نے ہمارے مطالبات نہ مانے تو پھر ہم مشاورت کے بعد ایک ہفتے کی مسلسل ہڑتال کریں گے۔ان کا کہنا تھا کہ اتنی مہنگی گیس کے لیے انڈسٹری کسی صورت نہیں چل سکے گی، اگر گیس کی قیمت پر نظر ثانی نہ ہوئی تو صنعتیں اس پیداواری لاگت پر نہیں چلا سکیں گے اور ایکسپورٹ ختم ہوکر رہ جائے گی کیونکہ پاکستان کی مجموعی ایکسپورٹ میں کراچی کا حصہ 60 فیصد سے بھی زائد ہے۔انہوں نے اس بات کا اعادہ کیا کہ تاجر برادری حکومت سے گیس نرخ کو 1350 روپے فی ایم ایم بی ٹی یو تک لانے کی اپیل کرتی ہے جس کا تعین اوگرا نے گیس کی 100 فیصد قیمت کے طور پر کیا ہے اور اس میں ایس ایس جی سی کا تقریباً 22 فیصد منافع بھی شامل ہے جبکہ صنعتیں اوگرا کے طے کردہ نرخ پر ادائیگی کے لیے تیار ہیں۔تمام صنعت کاروں نے گیس کی قیمت میں اضافے کو مسترد کرتے ہوئے کہا کہ اگر حکومت نے گیس کی قیمت کے حوالے سے کوئی فیصلہ نہ کیا تو پھر مزید سخت لائحہ عمل کا اعلان کریں گے۔جاوید بلوانی نے کہا کہ المیہ تو یہ ہے کہ 20 کروڑ کی سبسڈی لینے والوں نے ایک یونٹ نہیں بنایا، گیس کی اسمگلنگ کو بند کرنے کا مطالبہ ہم نے کیا، وسطی ایشیاء ممالک کو گیس دی جارہی ہے، دنیا بھر میں گیس لائن لاسز 1 سے 2 فیصد ہے مگر ہمارے ملک میں لائن لاس 40 فیصد ہے، لائن لاسز کے پیسے بھی یہ ہم سے وصول کررہے ہیں، ہم مسئلے کے حل کے لیے صرف حکومت کے فیصلہ ساز لوگوں سے بات کرنا چاہتے ہیں۔صنعت کاروں کا کہنا تھا کہ کراچی سمیت سندھ اور بلوچستان کے صنعت کار جاوید بلوانی کی قیادت میں متحد ہیں، حکومت کو سنجیدگی سے سوچنا چاہیے کہ اگر صنعتوں کو مہنگی گیس ملی تو پیداواری لاگت بڑھے گی جس سے ایکسپورٹ کم ہوگی اور زرمبادلہ ملک میں کم آئے گا اس لیے حکومت فوری توجہ دے۔

حارث رؤف سمیت تین پاکستانی کرکٹرز کو بگ بیش لیگ کا این او سی جاری

لاہور: پی سی بی نے فاسٹ بولرز حارث رؤف، زمان خان اور اسپنر اسامہ میر کو بگ بیش لیگ کیلئے محدود این او سی جاری کردیا۔تینوں کرکٹرز کو پورے ایونٹ کے بجائے 7 سے 28 دسمبر کے درمیان محدود میچز میں شرکت کی اجازت دی گئی ہے۔ پی سی بی نے حارث رؤف اور اسامہ میر کو پانچ، پانچ جبکہ زمان خان کو چار میچوں کے لیے این او سی جاری کیا ہے۔پاکستان کرکٹ بورڈ کے مطابق محدود این او سی دینے کا فیصلہ پی سی بی کی جانب سے کھلاڑیوں پر ورک لوڈ کو کم کرنے اور انکے مستقبل کے شیڈول کو دیکھتے ہوئے کیا گیا ہے۔ بگ بیش لیگ میں فاسٹ بولر حارث رؤف اور اسامہ میر میلبورن اسٹارزجبکہ زمان خان سڈنی تھنڈرز کا حصہ ہیں۔کرکٹ آسٹریلیا کے زیر اہتمام بگ بیش لیگ کا 13 واں ایڈیشن 7 دسمبر سے آسٹریلیا میں شروع ہوگا۔ ٹورنامنٹ میں کُل 44 میچز کھیلے جائیں گے۔ فائنل 24 جنوری 2024 کو ہوگا۔ ٹورنامنٹ میں پرتھ اسکارچرز کی ٹیم اپنے اعزاز کا دفاع کرے گی۔واضح رہے کہ فاسٹ بولر حارث رؤف کی دورہ آسٹریلیا سے معذرت کے بعد پی سی بی کی جانب سے انہیں بگ بیش لیگ کے لیے این او سی نہ ملنے اور سینٹرل کنٹریکٹ میں تنزلی کا امکان ظاہر کیا جارہا تھا۔

(ن) لیگ کا سندھ میں حلقہ بندیوں کے خلاف عدالت جانے کا اعلان

کراچی: مسلم لیگ (ن) نے الیکشن کمشنر سندھ پر عدم اعتماد کا اظہار کرتے ہوئے حلقہ بندیوں کے خلاف عدالت جانے کا اعلان کردیا۔اس بات کا اعلان مسلم لیگ (ن) سندھ کے صدر بشیر میمن، لیگی رہنمائوں کھیل داس کوہستانی ، نہال ہاشمی، قادر بخش کلمتی اور سلمان خان نے پیر کو کراچی پریس کلب میں پریس کانفرنس کرتے ہوئے کیا۔رہنماؤں نے کہا ہے کہ مسلم لیگ ن سندھ میں حالیہ حلقہ بندیوں کو مسترد کرتی ہے اور ہم اس کے خلاف عدالت جائیں گے، ہم صوبائی الیکشن کمشنر پر عدم اعتماد کرتے ہیں، چیف الیکشن کمشنر اس صورتحال کا نوٹس لیں۔بشیر میمن نے کہا کہ سندھ میں غلط حلقہ بندیاں کی گئیں، نوشہرو فیروز کو بھی توڑا گیا اور چار تعلقوں کو ملا کر ایک حلقہ بنایا گیا، ایسا ہے جیسے فرمائش پر حلقہ بنایا گیا ہے۔لاڑکانہ میں بھی ایسا کیا ہے۔ہم صوبائی الیکشن کمشنر پر عدم اعتماد کا اظہار کرتے ہیں۔جس نے بھی ایسا کیا ہے اس کو سزا ملی چاہیے۔ہم عدالتوں میں جائیں گے اور ہمیں عدالتوں سے انصاف ملے گا۔بشیر میمن نے کہا کہ یہ سب کچھ کس کی سفارش پر ہورہا ہے؟ مقبول باقر انصاف پسند ہیں خدا کا واسطہ ہے ہماری درخواست سنیں، میرے اوپر کوئی الزام نہیں ہے، سعید غنی پیپلز پارٹی کے ورکر ہیں مجھے صرف یہ بتا دیں میں نے کس کو دھمکیاں دی ہیں؟قادر بخش کلمتی نے کہا کہ حلقہ بندیوں میں ملیر میں آبادی کا خیال نہیں رکھا گیا،ایک یوسی کو اٹھا کر دوسری یوسی میں شامل کردیا گیا اپنی من مانی کی گئی، کلاک وائز حلقہ بندیوں کی بھی دھجیاں اڑائی گئیں، پیپلز پارٹی کے تمام فرمائشی پروگرام کو پورا کیا گیا ہے پیپلز پارٹی کی کارکردگی سڑے ہوئے کیک کی طرح ہے اس میں آنے والے دن تبدیلی کے ہیں۔نہال ہاشمی نے کہا کہ حلقہ بندیوں کی دھجیاں اڑا دی گئی ہیں، پری پول دھاندلی شروع ہوچکی ہے، پیپلز پارٹی نے سرکاری ملازمین کے ساتھ مل کر پری پول دھاندلی کا سلسلہ شروع کردیا ہے ہم چند روز میں عدالت میں جائیں گے۔

عمران خان کے راز کھولے تو منہ نہیں چھپا سکیں گے، عون چوہدری

اسلام آباد: استحکام پاکستان پارٹی (آئی پی پی) کے رہنما اور سابق وفاقی وزیر عون چوہدری نے عمران خان کے بشریٰ بی بی کا چہرہ نہ دیکھنے کے دعوے کو صدی کا سب سے بڑا جھوٹ قرار دے دیا۔تفصیلات کے مطابق پاکستان تحریک انصاف کے سابق چیئرمین نے اڈیالہ جیل میں صحافیوں سے گفتگو کرتے ہوئے دعویٰ کیا تھا کہ میں نے بشریٰ بی بی کا چہرہ نکاح کے بعد دیکھا، قسم کھا کر کہتا ہوں کہ اس سے پہلے کبھی چہرہ نہیں دیکھا۔اس پر عون چوہدری نے ردعمل دیتے ہوئے کہا کہ عمران خان کا بشری بی بی کو نکاح سے پہلے نہ دیکھنے کادعویٰ اس صدی کا سب سےبڑا جھوٹ ہے ، قوم کے لیڈر کا خود بولنے والا جھوٹ بولے تو میرا فرض ہے کہ سچ سامنے لاؤں، سابق چیئرمین پی ٹی آئی کے پول کھولے تو انہیں شرم سے سرچھپانے کی جگہ نہیں ملے گی۔استحکام پاکستان پارٹی کے رہنما نے کہا کہ سابق چیئرمین پی ٹی آئی بشری بی بی سے نکا ح سے پہلے درجنوں بارے ملے اور دونوں نے ایک دوسرے کو دیکھا بھی تھا، بشری بی بی قران پرحلف دیدیں کہ انہوں نے سابق چیئرمین پی ٹی آئی کونکاح سے پہلے چہرہ نہیں دکھایا، میں خود سابق چیئرمین پی ٹی آئی کو ملاقات کے لئے لیکر جاتا رہا، سابق چیئرمین جھوٹ میں کتنا گریں گے کہ جھوٹا قران اٹھانے تک پہنچ گئے۔عون چوہدری نے کہا کہ سابق تعلق کا لحاظ رکھ رہا ہوں ورنہ ایسے راز کھولوں کہ سابق چیئرمین پی ٹی آئی کا گند دنیا کے سامنےآجائے، سابق چیئرمین بشری بی بی کو ایک بار نہیں کئی بار نکاح سے پہلے ملے، گھنٹوں ملاقات کرتے رہے، سابق چیئرمین کی سیاست جھوٹ پر مبنی ہے اللہ کاشکر ہے کہ انکو وقت پر ہی چھوڑ دیا۔اُن کا کہنا تھا کہ نئے چیئرمین پی ٹی آئی کے لئے بیرسٹر گوہر علی کی نامزدگی بھی انکے اندر کے خوف کی عکاس ہے، سابق چیئرمین پی ٹی آئی پارٹی کے کسی اہل شخص کو پارٹی میں مقام دینا ہی نہیں چاہتے، ملک میں شر پھیلانے اوراداروں سے تصاد م کرنے والے کے خلاف آواز بلندکرنا ملک سے وفا کے مترادف ہے۔

رنبیر کپور کی نئی میگا ایکشن فلم ’انیمل‘ کے ڈیلیٹ مناظر سوشل میڈیا پر لیک

ممبئی: بالی وڈ سپر اسٹار رنبیر کپور کی نئی فلم ’انیمل‘ کے ڈیلیٹ مناظر سوشل میڈیا پر لیک کردیئے گئے۔ یکم دسمبر کو ریلیز ہونے والی رنبیر کپور کی فلم ’انیمل‘ نے صرف تین دن میں پوری دنیا میں مجموعی طور پر 360 کروڑ روپے کا بزنس کرلیا ہے۔تین سو کروڑ کا سنگِ میل عبور کرکے ’انیمل‘ نے بالی ووڈ کنگ شاہ رخ خان کی فلم ‘پٹھان’ کو پیچھے چھوڑ دیا ہے، ‘پٹھان’ کا باکس آفس پر تین دن کا کلیکشن 313 کروڑ تھا جبکہ یہ بھی کہا جارہا ہے کہ شاید رنبیر کپور کی ‘انیمل’ شاہ رخ خان کی دوسری سُپر ہٹ فلم ‘جوان’ کو بھی مات دے سکتی ہے۔سندیپ ریڈی وانگا کی ہدایت کاری میں بننے والی اس فلم میں رنبیر کپور، انیل کپور، بوبی دیول اور رشمیکا مندانا سمیت دیگر اداکاروں کو کاسٹ کیا گیا۔مداحوں کو فلم ’انیمل‘ کا بےصبری سے انتظار تھا کیونکہ اس فلم کے سنسنی خیز ٹریلر نے ریلیز سے پہلے ہی رنبیر کپور کے کردار کی دہشت پھیلا رکھی تھی، ٹریلر میں رنبیر کپور کو بےرحمی سے قتل کرتے ہوئے دکھایا گیا تھا۔اب ریلیز کے بعد فلم ’انیمل‘ کو مداحوں کی جانب سے خوب پذیرائی مل رہی ہے اور اس فلم نے باکس آفس پر طوفان برپا کیا ہوا ہے۔’انیمل‘ میں رنبیر کپور کے مقابلے میں بوبی دیول نے ولن کا کردار ادا کیا ہے جبکہ رشمیکا مندانا نے فلم میں خاتون اداکارہ کا مرکزی کردار نبھایا ہے۔