آئی جی پنجاب کی سربراہی میں انسپکٹر سے ڈی ایس پیز کی ترقیوں کا اجلاس ہوا۔اجلاس میں 40 انسپکٹر کو ڈی ایس پیز کے عہدے پر ترقیاں دے دی گئیں۔ اجلاس میں ایڈیشنل آئی جی سلطان چوہدری، ڈی آئی جی اسٹیبلشمنٹ ون انعام وحید، ڈی آئی جی اسٹیبلشمنٹ 2 ذیشان اصغر سمیت دیگر افسران موجود تھے۔جن سینئر انسپکٹر کا ریکارڈ مکمل تھا انکو ڈی ایس پیز کے عہدے پر ترقیاں دی گئی ہیں۔ ترقیاں پانے والے ڈی ایس پیز کو آئندہ چند روز تک آئی جی پنجاب نئی پوسٹنگ دیں گے۔
محکمہ ٹرانسپورٹ نے غیر قانونی موٹرسائیکل رکشہ بنانے والوں کیخلاف کریک ڈاؤن کا آغاز کر دیا۔سیکرٹری ٹرانسپورٹ ڈاکٹر احمد جاوید قاضی نے حکومت پنجاب کی ہدایات پر RTAs کو غیر قانونی موٹرسائیکل رکشہ بنانے والوں کیخلاف سخت ایکشن لینے کا حکم دے دیا جس پر عمل درآمد کرتے ہوئے 77 ورکشاپس کو سیل کر دیا گیا۔ڈاکٹر احمد جاوید قاضی نے کہا کہ قانونی طور پر موٹر سائیکل رکشہ کی خرید و فروخت پر کوئی پابندی نہیں، غیر قانونی موٹر سائیکل رکشہ بنانے والے افراد کے خلاف مقدمات کا اندراج اور غیر قانونی موٹر سائیکل رکشہ چلانے والوں سے متعلق پالیسی کا مسودہ منظوری کے مراحل میں ہے۔
آئی جی پنجاب ڈاکٹر عثمان انور کا کہنا ہے کہ سیف سٹیز منصوبے کو دوسرے شہروں تک بڑھایا جائے گا۔آئی جی پنجاب ڈاکٹر عثمان انور کا لاہور نیوز سے گفتگو کرتے ہوئے کہنا تھا کہ سیف سٹیز منصوبے کا دائرہ کار وسیع کر رہے ہیں، لاہور کے بعد فیصل آباد، گوجرانوالہ اور راولپنڈی میں سیف سٹیز پراجیکٹ شروع کیا جا رہا ہے، منصوبے پر 13 ارب روپے لاگت آئے گی۔آئی جی پنجاب نے بتایا کہ جدید ممالک کی طرح پاسبان سافٹ ویئر کے ذریعے گاڑی چوری ہوتے ہی ٹریکر کے ذریعے تمام فورسز ایکٹو ہو کر گاڑی چور کو پکڑیں گی۔خراب کیمروں کے حوالے سے آئی جی پنجاب کا کہنا تھا کہ لاہور میں ساڑھے 6 ہزار کیمرے رواں ماہ میں ٹھیک ہو جائیں گے۔
کمشنر لاہور محمد علی رندھاوا کی زیر صدارت کینال روڈ انڈر پاسز کی تزئین و آرائش بارے پیشرفت کا اہم جائزہ اجلاس ہوا۔اجلاس میں ہائیکورٹ کے احکامات کی روشنی میں انڈرپاسز کی بیوٹیفکیشن کا کام جلد ازجلد مکمل کرنے کی ہدایات کی گئی۔کمشنر لاہور نے جیل روڈ انڈرپاس کی تزئین و آرآئش کو اگلے 48 گھنٹوں میں مکمل کرنے کی ہدایت کر دی۔ انہوں نے کہا انڈرپاسز پر سول ورک رات 10 بجے تا صبح 6 بجے تک کیا جائے، ٹریفک روانی متاثر نہیں ہونی چاہئے، انڈرپاسز جن شخصیات کے نام سے منسوب ہیں انکے نمایاں کارناموں بارے تفصیلات آویزاں کی جائیںگی، انڈرپاسز کے کام کی تکمیل کے لئے ڈیڈلائنز دے دیں، ٹریفک روانی کو متاثر کئے بغیر جلد کام مکمل کیا جائے۔چیف انجینئر ٹیپا اقرار حسین نے کہا تمام انڈرپاسز پر اگلے دو ہفتوں کے دوران کام مکمل کر لیا جائے گا۔ پہلے مرحلے میں کینال روڈ کے دونوں اطراف پر موجود 9 انڈرپاسز کی تزئین و آرائش کا کام شروع ہے، ٹھوکر نیاز بیگ تا انڈرپاس دھرم پورہ تک دونوں اطراف کام کیا جارہا ہے۔
لاہورنوائے عجم
استحکام پاکستان پارٹی کا اہم اجلاس سربراہ آئی پی پی جہانگیر ترین کی زیر صدارت ہوا، جہانگیر ترین نے پارٹی رہنماؤں کو الیکشن میں بھرپور تیاری کے ساتھ حصہ لینے کی ہدایت کر دی۔اہم مشاورتی اجلاس میں اسحاق خاکوانی، عون چودھری، نعمان لنگڑیال، ڈاکٹر فردوس عاشق اعوان شریک ہوئیں، اجلاس میں کرنل ہاشم ڈوگر، مراد راس، ڈاکٹر فیاض الحسن چوہان، رفاقت گیلانی، رانا نذیر، آصف نکئی و دیگر بھی شریک ہوئے۔اجلاس میں چودھری اخلاق، رائے اسلم، طارق نکئی، راؤ شاہد، مامون جعفر تارڑ و دیگر رہنما بھی شریک ہوئے، اجلاس میں انتخابی حکمت عملی اور عوامی رابطہ مہم پر بھی تفصیلی تبادلہ خیال کیا گیا، اجلاس میں ن لیگ سے ہونے والی سیٹ ایڈجسٹمنٹ پر بھی مشاورت کی گئی۔اجلاس میں پارٹی رہنماؤں کی جانب سے مختلف تجاویز اور سفارشات پر غور کیا گیا، اجلاس میں قومی اور صوبائی اسمبلی کے حلقوں میں ٹکٹوں کی تقسیم پر بھی مشاورت کی گئی۔
ڈی جی فوڈ اتھارٹی کی ہدایت پر صوبہ بھر میں دودھ بردار گاڑیوں کی چیکنگ کا عمل جاری ہے۔ 1510دودھ بردار گاڑیوں میں سپلائی کئے جانے والے 11 لاکھ 59 ہزار 810 لٹردودھ کی چیکنگ کی گئی۔ موقع پر کئے گئے ٹیسٹ فیل ہونے پر 25 ہزار 185 لٹر دودھ تلف کیا گیا۔ڈی جی فوڈ اتھارٹی محمد عاصم جاوید کا کہنا ہے لاہور ڈویژن میں 370، فیصل آباد 358، ساہیوال 136، راولپنڈی 77، گوجرانوالہ 301، سرگودھا 205، ملتان 199 اور مظفرگڑھ ڈویژن میں 161 گاڑیوں کو چیک کیا گیا۔ ایل آر کم، پانی کی ملاوٹ اور گاڑھے پن کو بڑھانے والے اجزاء استعمال کرنے پر دودھ تلف کیا گیا۔انہوں نے کہا شہروں میں داخل ہونے والی ہر دودھ بردار گاڑی کو چیک کر کے ہی شہر میں جانے دیا جائے گا، دودھ میں ملاوٹ اور جعل سازی کرنے والوں کے خلاف مسلسل کریک ڈاؤن جاری رہے گا، داخلی و خارجی راستوں کے علاوہ شہر بھر میں موجود دکانوں پر بھی چیکنگ مزید سخت کر دی گئی ہے، ملاوٹی، جعلی خوراک کا کاروبار کرنے والے کے خلاف سخت قانونی کارروائی عمل میں لائی جائے گی۔
نگران وزیر اعلیٰ پنجاب محسن نقوی کا کہنا ہے ڈرائیونگ لائسنس بنانے میں تاخیر نہیں ہونی چاہئے۔محسن نقوی نے پولیس خدمت مرکز لبرٹی کا دورہ کیا۔ انہوں نے خدمت مرکز میں موجود شہریوں سے مسائل پوچھے۔ شہریوں نے شکایات کے انبار لگا دیئے۔ ڈرائیونگ ٹیسٹ دینے والے شہری بھی 8 ،8 گھنٹے خوار ہوئے۔وزیر اعلیٰ محسن نقوی نے صورتحال کا فوری نوٹس لیا اور ڈی جی پنجاب انفارمیشن ٹیکنالوجی بورڈ کو موقع پر فون، سسٹم کو بہتر بنانے اور ہنگامی طور پر ٹیم خدمت مرکز بھجوانے کی ہدایت کی۔محسن نقوی کا کہنا تھا کہ لائسنس بنوانے کا ٹوکن رکھنے والے شہری کا آئندہ 3 روز چالان نہیں ہو گا، ڈرائیونگ لائسنس بنانے میں تاخیر نہیں ہونی چاہئے، لائسنس بنانے کا عمل جلد مکمل کیا جائے۔نگران وزیر اعلیٰ محسن نقوی نے ٹیسٹ دینے والے شہریوں کے لئے سسٹم کو بہتر اور فاسٹ ٹریک کرنے کی ہدایت کی۔
وزیراعلی پنجاب محسن نقوی کی خصوصی ہدایت پر لاہور کو ڈسٹ فری شہر بنانے کے پلان پر عملدرآمد شروع ہو گیا۔ لاہور کی 79 سڑکوں اور شاہراہوں کو ڈسٹ فری بنایا جائے گا۔وزیراعلی محسن نقوی نے جیل روڈ کا دورہ کیا، سڑک کو واشنگ کے عمل کا معائنہ کیا۔ مکینیکل واشرز، مکینیکل سویپرز اور ٹریکٹر سویپرز کے جیل روڈ کو واش کرنے کے عمل کا مشاہدہ کیا۔وزیراعلی نے صبح اور رات کو سڑکوں کو واش کرنے کی ہدایت بھی کر دی۔ لاہور ویسٹ مینجمنٹ کمپنی کے چیف ایگزیکٹو آفیسر نے 79 سڑکوں کی واشنگ کے پروگرام کے بارے میں بریفنگ دی۔ بریفنگ میں بتایا گیا 18 مکینیکل واشرز، 12 مکینیکل سویپرز اور 40 ٹریکٹرز سویپرز واشنگ کے عمل میں حصہ لے رہے ہیں۔ کوڑے کے ساتھ ساتھ کنسٹرکشن اینڈ ڈیمولیشن میٹریل ٹھکانے لگانے کیلئے تینوں شفٹوں میں ٹیمیں متحرک ہیں۔ آئندہ 48 گھنٹے میں تمام پوائنٹس کو زیرو ویسٹ کر دیا جائے گا۔اس موقع پر محسن نقوی نے کہا ٹریفک میں روانی کے لئے دوپہر یا شام کو سڑکوں کو واش نہ کیا جائے، سڑک کنارے ملبے کی غیر قانونی ڈمپنگ کرنے والوں کے خلاف انفورسمنٹ کارروائیاں تیز کرے۔کمشنر لاہور ڈویژن، ڈپٹی کمشنر، ڈی جی پی ایچ اے اور متعلقہ حکام بھی اس موقع پر موجود تھے۔
پاکستان شوبز انڈسٹری کی نامور اداکارہ ریشم نے شوبز کے شادی شدہ جوڑوں کے درمیان علیحدگیوں پر افسوس کا اظہار کیا ہے۔حال ہی میں اداکارہ نے ایک پوڈکاسٹ میں شرکت کی اور اپنی نجی زندگی اور شوبز انڈسٹری سے متعلق اظہار خیال کیا۔میزبان نے جب ریشم سے شادی سے متعلق سوال کیا تو انہوں نے کہا کہ شوبز انڈسٹری میں شادیاں ہو تو رہی ہیں لیکن شادیاں ہونے کے بعد ٹوٹ رہی ہیں، اتنی شادیاں ٹوٹی ہیں اور مجھے بہت دکھ بھی ہوا۔انہوں نے شوبز کے کسی اداکار سے شادی نہ کرنے کی وجہ پر روشنی ڈالتے ہوئے کہا کہ شوبز میں سال یا ڈیڑھ سال سے زیادہ شادیاں چلتی ہی نہیں ہیں، شوبز میں 7 یا 8 شادیاں ٹوٹ چکی ہیں اور مجھے ان شادیوں کے ٹوٹنے پر بہت دکھ ہے۔اپنی شادی سے متعلق انہوں نے کہا کہ جب مجھے کوئی مل جائے گا تو مستقبل میں میرا بھی شادی کا ارادہ ہے۔اداکارہ نے مزید کہا کہ محبت میں نبھانا بہت ضروری ہے، اللہ کے نزدیک میاں بیوی کا رشتہ سب سے زیادہ پسندیدہ ہے اور یہ رشتہ اب نہ صرف کمزور ہو رہا ہے بلکہ تیزی سے ٹوٹ بھی رہا ہے۔
ریڈ سی انٹرنیشنل فیسٹیول میں ڈائریکٹر ضرار خان کی پاکستانی فلم ’اِن فلیمز‘ نے ’بیسٹ فیچر فلم‘ کا ایوارڈ جیت لیا۔رپورٹ کے مطابق تیسرے سالانہ 10 روزہ فیسٹیول کی رنگا رنگ تقریب کا آغاز سعودی عرب کے شہر جدہ میں ہواجہاں پوری دنیا کی نامور شوبز شخصیات موجود تھیں۔انسٹاگرام پر ایک ویڈیو پیغام میں ضرار خان نے انعام جیتنے پر انتہائی خوشی کا اظہار کیا اور کہا کہ کاش وہ فیسٹیول میں موجود ہوتے۔ایونٹ میں ہالی ووڈ کے سپر اسٹارز جونی ڈیپ، ول اسمتھ، شیرون اسٹون، مشیل ولیمز، فیریڈا پنٹو اور دیگر بھی موجود تھے۔پاکستان کی طرف سے ہمایوں سعید، ماہرہ خان اور احد رضا میر نے فیسٹیول کو رونق بخشی اور اپنے سوشل میڈیا اکاؤنٹس پر ایونٹ کی تفصیلات شیئر کیں۔
.jpg)