معین اختر کے یوم پیدائش پر گوگل کا خراج تحسین

 پاکستان کے مقبول ترین فنکار معین اختر کی 71 ویں سالگرہ کے موقع گوگل نے اپنے ڈوڈل سے انہیں شاندار انداز میں خراج تحسین پیش کیا ہے۔چار دہائیوں تک لوگوں کے چہروں پر قہقہے بکھیرنے والے ہر دل عزیز فن کار معین اختر کا آج 71 واں یوم پیدائش ہے۔کراچی میں 24 دسمبر 1950 کو آنکھ کھولنے والے معین اختر چند ماہ کے تھے جب ان کے والد محمد ابراہیم محبوب اس دنیا سے رخصت ہو گئے۔ انہوں نے تقسیمِ ہند کے بعد مراد آباد سے ہجرت کر کے کراچی میں سکونت اختیار کی تھی اور یہاں ان کا معاش ایک کاروبار سے جڑا ہوا تھا۔ڈراموں اور اسٹیج پر کامیڈی کے ساتھ معین اختر نے ایک میزبان، گلوکار اور اسکرپٹ رائٹر کی حیثیت سے بھی اپنی قابلیت اور صلاحیتوں کو منوایا۔16 برس کی عمر میں معین اختر نے اسٹیج پر پہلی پرفارمنس دی اور حاضرین کے دل جیت لیے، اسٹیج کے ساتھ ریڈیو پر اپنے فن کا اظہار کرنے کے بعد ٹیلی ویژن کی دنیا میں قدم رکھتے ہی گویا ان کی شہرت کو پر لگ گئے۔70 کی دہائی میں معین اختر کو پاکستان بھر میں شناخت مل چکی تھی، ان کے مقبول ترین شوز

یں‌ لوز ٹاک، ففٹی ففٹی، ہاف پلیٹ، اسٹوڈیو ڈھائی اور روزی جیسے کھیل شامل ہیں۔

معین اختر کے فن کا سفر 45 برس پر محیط ہے جو ہر لحاظ سے شان دار اور متاثر کن ہے، کئی ایوارڈز اپنے نام کرنے والے معین اختر کو حکومت پاکستان کی جانب سے ستارہ امتیاز اور تمغہ حسن کارکردگی سے بھی نوازا گیا۔

ٹک ٹاک نے گوگل کو مات دیکر نمبر ون پوزیشن حاصل کرلی

عالمی شہرت یافتہ ویب سائٹ گوگل کو اگر کوئی مات دینے میں کامیاب ہوا ہے تو وہ مقبول ترین ایپلی کیشن ٹک ٹاک ہے۔کلاؤڈ سروس کمپنی کلاؤڈ فلیئر نے رواں سال کی مقبول ترین ویب سائٹس کی رینکنگ جاری کی ہے جس میں حیران کن طور پر گوگل سے پہلی پوزیشن چھن گئی ہے۔حالیہ رینکنگ کے مطابق اس سال ٹک ٹاک کی مقبولیت گوگل سے زیادہ رہی۔گزشتہ برس اسی فہرست میں گوگل پہلے جب کہ چینی سائٹ ٹک ٹاک ساتویں نمبر پر تھی لیکن ایک ہی سال میں ٹک ٹاک کی مقبولیت میں ناقابلِ یقین حد تک اضافہ ہوا ہے۔یہاں یہ بات بھی قابلِ ذکر ہے کہ ٹک ٹاک پر پاکستان سمیت کئی ممالک میں کچھ عرصہ تک پابندی عائد رہی تھی لیکن اس کے باوجود اس سائٹ نے 6 درجہ بہتری حاصل کی۔کلاؤڈ فلیئر رینکنگ 2021 (وہ سائٹس جس پر رواں سال سب سے زیادہ ٹریفک آئی)

1) ٹک ٹاک

2) گوگل

3) فیس بک

4) مائیکروسافٹ

5) ایپل

6) ایمازون

7) نیٹ فلکس

8) یوٹیوب

9) ٹوئٹر

10) واٹس ایپ

 

خاتون کے چکن ونگز کے ڈبے سے مرغی کی تلی ہوئی گردن نکل آئی

 ایک خاتون صارف نے بین الاقوامی فوڈ چین سے چکن ونگز منگوائے لیکن جب ڈبہ کھولا تو مرغی کی تلی ہوئی گردن دیکھ کر حیران رہ گئی۔گیبریلا نامی خاتون نے سوشل میڈیا پر بتایا کہ اس نے کھانے کے لیے چکن ونگز کا ڈبہ آرڈر کیا اور جب گھر جاکر ڈبہ کھولا تو اس میں چکن ونگز کے ساتھ مرغی کی تلی ہوئی پوری گردن بھی نکل آئی۔برطانوی خاتون نے بتایا کہ چکن ونگز کے ڈبے سے نکلنے والی مرغی کی تلی ہوئی گردن پر چونچ اور آنکھیں بھی واضح طور پر دیکھی جا سکتی ہیں۔خاتون صارف نے لکھا کہ چکن ونگز کے باکس سے مرغی کی گردن نکلنے سے سارا مزہ کرکرا ہو گیا۔ خاتون نے اس واقعے کے بعد فوڈ چین کو 6 میں سے دو ریٹنگ پوائنٹس دیے۔

عامر خان نے فاطمہ ثناء سے خفیہ نکاح کرلیا؟

 

بالی وڈ سپر اسٹار عامر خان سے متعلق خبریں زیرِ گردش ہیں کہ انہوں نے ساتھی اداکارہ فاطمہ ثناء شیخ سے خفیہ طور پر نکاح کرلیا ہے۔گزشتہ ماہ بھارتی میڈیا پر شائع خبروں میں دعویٰ کیا گیا تھا کہ عامر خان اداکارہ فاطمہ ثناء سے تیسری شادی کریں گے اور اداکار اس کا باضابطہ اعلان اپنی نئی فلم لال سنگھ چڈھا کی ریلیز کے بعد کریں گے جو کہ اپریل 2022 میں ریلیز ہوگی۔تاہم ایک مرتبہ پھر اس حوالے سے خبریں سامنے آئی ہیں اور یہ خبریں اس وقت آنا شروع ہوئیں جب سوشل میڈیا پر عامر اور فاطمہ کی ایڈٹ شدہ تصاویر وائرل ہوئیں۔تصاویر میں صارفین نے دعویٰ کیا کہ یہ عامر خان کے نکاح کی تقریب کی تصاویر ہیں جب کہ حقیقت اس کے برعکس ہے۔یہ تصویر دراصل عامر خان کی اپنی سابقہ اہلیہ کرن راؤ کے ہمراہ لی گئی تھی جس پر فوٹو شاپ کے ذریعے فاطمہ ثناء کی تصویر لگادی گئی۔واضح رہے کہ فاطمہ ثناء شیخ نے عامر خان کے ہمراہ فلم دنگل میں کام کیا تھا جس میں وہ اداکار کی بیٹی بنی تھیں۔ عامر خان اور اداکارہ کی جانب سے تاحال اپنی شادی کی افواہوں پر کسی قسم کا کوئی ردعمل سامنے نہیں آیا ہے۔

معین اختر کا انتقال سے 34 سال قبل خط میں اپنی موت کا تذکرہ

 پاکستان کے لیجنڈ فنکار معین اختر کو مداحوں سے بچھڑے ایک دہائی کا عرصہ گزر چکا ہے اور آج ان کے چاہنے والے ان کا 71واں یوم پیدائش منا رہے ہیں۔معین اختر کی سالگرہ کے دن ایک کا خط سامنے آیا ہے جو انہوں نے 44 برس قبل اپنے قریبی دوست اقبال وحید کو لکھا اور اس میں انہوں نے اپنی موت کا ذکر کیا۔18 اگست 1977کو لکھے گئے اس خط میں معین اختر نے اپنے دوست کو خط کے ساتھ بھیجی گئی تصویر بھی سنبھال کر رکھنے کا کہا اور لکھا:اپنے عزیز دوست اقبال وحید کے لیے،موت کا وقت؟ شاید کسی کو نہیں معلوم کہ سب کو ایک نہ ایک دن جانا ہوگا، شاید پہل ہم ہی کر بیٹھیں، اس صورت میں اس تحریر اور اس تصویر دونوں کی حفاظت کرنا جو تمہیں ہمیشہ اس مخلص کی یاد دلاتی رہے گی۔یاد رہے کہ معین اختر کی پیدائش 24 دسمبر 1950 کو کراچی میں ہوئی، زندگی کی پہلی پرفارمنس شیکسپیئر کے ناول سے ماخوذ اسٹیج ڈرامے ’دی مرچنٹ آف وینس‘ میں محض 13 برس کی عمر میں دی جب کہ فنی کیرئیر کی باقاعدہ شروعات پاکستان کے پہلے یوم دفاع پر 1966 میں کی۔

منڈے میگزین دھنک رنگ لاہور ایڈیٹرعلی جان 20دسمبر2021 شمارانمبر439

 

جنوری میں بنگلادیش پریمیئر لیگ، پی ایس ایل اور بگ بیش سے متصادم

 پی ایس ایل اور بگ بیش سے متصادم ہونے کے باوجود بنگلادیش اپنی پریمیئر لیگ کی کامیابی کیلیے پْرامید ہے،ٹی ٹوئنٹی لیگ جنوری میں کرانے کا پلان بنایا جارہا ہے،اسی ماہ کے آخری ہفتے میں پی ایس ایل شروع ہوجائے گی۔بی پی ایل کے حتمی شیڈول اور فرنچائزز کا ابھی اعلان نہیں کیا گیا، البتہ بنگلادیشی بورڈ پْرامید ہے کہ شیڈول متصادم ہونے پر بھی اس کی لیگ کا رنگ پھیکا نہیں پڑے گا۔ورننگ کونسل کے رکن شیخ سہیل نے مقامی اخبار سے گفتگو میں کہاکہ ہم رواں ماہ ڈرافٹ کا عمل مکمل کررہے ہیں، ہمیں پی ایس ایل کی وجہ سے کوئی مسائل نہیں،ہم پاکستانی ٹی ٹوئنٹی لیگ کیلیے کرکٹرز کا انتخاب مکمل ہونے کے بعد ممکنہ ناموں پر غور کرسکتے ہیں، اصل فکر کورونا وائرس کی وجہ سے پیدا شدہ صورتحال کی ہے۔

پی ایس ایل7؛ بڑے ناموں کیلیے بھی جگہ کم پڑگئی

 کراچی: پی ایس ایل7میں بڑے ناموں کیلیے بھی جگہ کم پڑگئی، کئی غیرملکی سپر اسٹارز مختلف وجوہات کی بنا پر منتخب نہ ہوسکے جب کہ چند آؤٹ آف فیورٹ پاکستانی کرکٹرزکی چمک بھی ماند پڑگئی۔پاکستان سپر لیگ سیزن 7 کیلیے اتوار کو لاہور میں پلیئرز ڈرافٹ ہوا جس میں تمام فرنچائزز نے اپنے اسکواڈز کو حتمی شکل دی،اس ڈرافٹ میں کئی بڑے غیرملکی پلیئرز کو کسی بھی ٹیم نے منتخب نہیں کیا، ان میں ویسٹ انڈیز کے انٹرنیشنل کرکٹ کو الوداع کہنے کو تیار کرس گیل بھی شامل ہیں۔ڈیوڈ ملر، تبریز شمسی اور شمرون ہٹمائر کی صلاحیتوں میں بھی کسی ٹیم نے دلچسپی نہیں دکھائی، اسی طرح ڈیوڈ ویلی، سندیپ لامی چنے اور کیمرون ڈیلپورٹ بھی منتخب نہ ہونے والے کھلاڑیوں میں شامل ہیں، بعض کھلاڑیوں کی صرف چند روز کیلیے دستیابی بھی فرنچائزز کی عدم دلچسپی کا سبب بنی۔اسی طرح پاکستان کے کچھ نمایاں نیشنل اور ڈومیسٹک کرکٹرز بھی فرنچائزز کے معیار پر پورا نہیں اترسکے، ان میں احمد شہزاد بھی شامل ہیں،ان کا انٹرنیشنل کرکٹ کیریئرمختلف وجوہات کی بنا پر ادھورا رہا،اس بار پی ایس ایل میں بھی کسی فرنچائز نے ان میں دلچسپی نھیں لی، عثمان شنواری اور موسیٰ خان بھی مایوس پلیئرز میں موجود ہیں۔اسی طرح زاہد محمود، ناصر نواز، صاحبزادہ فرحان، سہیل خان، جنید خان، عاکف جاوید، عماد بٹ، دلبرحسین اور محمد عرفان کو بھی کسی ٹیم میں جگہ نہ مل سکی، یہ سب اب گھر بیٹھ کر پی ایس ایل مقابلوں سے لطف اندوز ہوں گے۔

پاک ویسٹ انڈیز ون ڈے سیریز میں تماشائیوں کو مفت داخلہ دینے کا امکان

  کراچی: پاکستان اور ویسٹ انڈیز ٹیم کے درمیان ون ڈے سیریز میں پی سی بی کی جانب سے تماشائیوں کو مفت داخلے کی اجازت دینے کا امکان ہے۔پاکستان اور ویسٹ انڈیز کے درمیان سیریز میں تماشائیوں کی عدم دلچسپی پی سی بی حکام کے تشویش کا باعث بن گئی۔ شائقین کرکٹ کو اسٹیڈیم آنے کی رغبت دلانے کے لیے بورڈ نے اہم اجلاس بلا لیا۔ذرائع کے مطابق نیشنل اسٹیڈیم کراچی میں منعقدہ اجلاس میں پی سی بی کے اعلیٰ حکام اور متعلقہ شعبوں کے ذمہ داران نے زوم کے ذریعہ شرکت کی۔ اجلاس میں مختلف پہلوؤں کا جائزہ لینے کے بعد متعدد فیصلوں پر اصولی اتفاق کیا گیا۔ ذرائع کے مطابق ون ڈے سیریز میں تماشائیوں کو مفت داخلے کی اجازت دیے جانے کا امکان ہے۔

تحریک انصاف کی کارکردگی سے مایوس شہری نے اپنی بیویوں کو الیکشن میں اتاردیا

 

پشاور: مردان کے شہری نے 2 بیویوں کو کونسلرز اور تیسری کو سیاست میں انٹری دلا کر چوتھی شادی کا فیصلہ کرلیا اور کہا ہے کہ پی ٹی آئی مایوس کیا اس لیے بیویوں کو الیکشن میں اتارا ہے۔سوشل میڈیا پر مردان کے رہائشی اشفاق حسین کی دھوم ہے جس نے اپنی تین میں سے دو بیویوں کو بلدیاتی انتخابات میں بطور کونسلر امیدوار میدان میں اتار دیا اور الیکشن کمپئن چلا رہا ہے جب کہ اگلی بار تیسری بیوی کو الیکشن لڑانے کی تیاری بھی شروع کردی ہے۔اشفاق حسین نے انتخابی پوسٹر میں اپنی بیویوں کے بجائے اپنی تصویر لگائی ہے اور امیدواروں کے ناموں کے بجائے زوجہ اوّل و زوجہ دوم لکھا ہوا ہے۔ سوشل میڈیا پر اس تصویر پر دلچسپ تبصرے کیے جارہے ہیں۔شفاق حسین کا کہنا ہے کہ دو بیویاں الیکشن جیت کر مصروف ہو جائیں گی تو تیسری آئندہ الیکشن میں امیدوار ہوں گی جس کے بعد ایک اور شادی کا ارادہ ہے۔ 31 سالہ اشفاق کی تینوں بیویوں کی عمریں 16، 18 اور 20 سال ہیں جب کہ 12 بچے ہیں۔اشفاق کا کہنا تھا کہ تحریک انصاف نے اپنی کارکردگی سے مایوس کیا اس لیے اپنی بیویوں کو الیکشن میں اتارا ہے۔

اسلام آباد: پیٹرولیم مصنوعات کی فی لیٹر قیمتوں میں بڑی کمی کا امکان ہے۔

 ذرائع اوگرا کے مطابق عالمی مارکیٹ میں پٹرولیم مصنوعات کی قیمتیں 74 ڈالر فی بیرل رہی، گزشتہ ماہ کی نسبت پٹرولیم مصنوعات کی قیمتوں میں 10 فیصد تک کمی آئی جب کہ حکومت نے گزشتہ 13 دن میں 68 تا 74 ڈالر فی بیرل تیل خریدا لہذا عالمی مارکیٹ کے تناسب سے قیمتوں میں کمی بنتی ہے۔ذرائع کے مطابق اوگرا نے پٹرولیم مصنوعات کی قیمتوں میں 8 سے 10 روپے فی لیٹر تک کمی کی تجویز دی ہے تاہم لیوی ٹیکس بڑھانے کی صورت میں 4 روپے فی لیٹر تک کمی ہوسکتی ہے جب کہ ٹیکس دوگنا کرنے کی صورت میں قیمتیں برقرار رکھی جا سکتی ہیں۔اوگرا کی جانب سے پٹرولیم مصنوعات کی قیمتوں میں کمی سے متعلق سمری آج حکومت کو بجھوائی جائے گی جب کہ آئندہ 15 روز کے لیے نئی قیمتوں کا اعلان کل کیا جائے گا۔