Daily Nawa-i-Ajam Lahore

Saturday, 9 December 2023

ڈرائیونگ لائسنس بنانے میں تاخیر نہیں ہونی چاہئے، محسن نقوی

نگران وزیر اعلیٰ پنجاب محسن نقوی کا کہنا ہے ڈرائیونگ لائسنس بنانے میں تاخیر نہیں ہونی چاہئے۔محسن نقوی نے پولیس خدمت مرکز لبرٹی کا دورہ کیا۔ انہوں نے خدمت مرکز میں موجود شہریوں سے مسائل پوچھے۔ شہریوں نے شکایات کے انبار لگا دیئے۔ ڈرائیونگ ٹیسٹ دینے والے شہری بھی 8 ،8 گھنٹے خوار ہوئے۔وزیر اعلیٰ محسن نقوی نے صورتحال کا فوری نوٹس لیا اور ڈی جی پنجاب انفارمیشن ٹیکنالوجی بورڈ کو موقع پر فون، سسٹم کو بہتر بنانے اور ہنگامی طور پر ٹیم خدمت مرکز بھجوانے کی ہدایت کی۔محسن نقوی کا کہنا تھا کہ لائسنس بنوانے کا ٹوکن رکھنے والے شہری کا آئندہ 3 روز چالان نہیں ہو گا، ڈرائیونگ لائسنس بنانے میں تاخیر نہیں ہونی چاہئے، لائسنس بنانے کا عمل جلد مکمل کیا جائے۔نگران وزیر اعلیٰ محسن نقوی نے ٹیسٹ دینے والے شہریوں کے لئے سسٹم کو بہتر اور فاسٹ ٹریک کرنے کی ہدایت کی۔

لاہور کو ڈسٹ فری شہر بنانے کے پلان پر عملدرآمد شروع

وزیراعلی پنجاب محسن نقوی کی خصوصی ہدایت پر لاہور کو ڈسٹ فری شہر بنانے کے پلان پر عملدرآمد شروع ہو گیا۔ لاہور کی 79 سڑکوں اور شاہراہوں کو ڈسٹ فری بنایا جائے گا۔وزیراعلی محسن نقوی نے جیل روڈ کا دورہ کیا، سڑک کو واشنگ کے عمل کا معائنہ کیا۔ مکینیکل واشرز، مکینیکل سویپرز اور ٹریکٹر سویپرز کے جیل روڈ کو واش کرنے کے عمل کا مشاہدہ کیا۔وزیراعلی نے صبح اور رات کو سڑکوں کو واش کرنے کی ہدایت بھی کر دی۔ لاہور ویسٹ مینجمنٹ کمپنی کے چیف ایگزیکٹو آفیسر نے 79 سڑکوں کی واشنگ کے پروگرام کے بارے میں بریفنگ دی۔ بریفنگ میں بتایا گیا 18 مکینیکل واشرز، 12 مکینیکل سویپرز اور 40 ٹریکٹرز سویپرز واشنگ کے عمل میں حصہ لے رہے ہیں۔ کوڑے کے ساتھ ساتھ کنسٹرکشن اینڈ ڈیمولیشن میٹریل ٹھکانے لگانے کیلئے تینوں شفٹوں میں ٹیمیں متحرک ہیں۔ آئندہ 48 گھنٹے میں تمام پوائنٹس کو زیرو ویسٹ کر دیا جائے گا۔اس موقع پر محسن نقوی نے کہا ٹریفک میں روانی کے لئے دوپہر یا شام کو سڑکوں کو واش نہ کیا جائے، سڑک کنارے ملبے کی غیر قانونی ڈمپنگ کرنے والوں کے خلاف انفورسمنٹ کارروائیاں تیز کرے۔کمشنر لاہور ڈویژن، ڈپٹی کمشنر، ڈی جی پی ایچ اے اور متعلقہ حکام بھی اس موقع پر موجود تھے۔

ریشم کا شوبز کے شادی شدہ جوڑوں کے درمیان علیحدگیوں پر اظہار افسوس

پاکستان شوبز انڈسٹری کی نامور اداکارہ ریشم نے شوبز کے شادی شدہ جوڑوں کے درمیان علیحدگیوں پر افسوس کا اظہار کیا ہے۔حال ہی میں اداکارہ نے ایک پوڈکاسٹ میں شرکت کی اور اپنی نجی زندگی اور شوبز انڈسٹری سے متعلق اظہار خیال کیا۔میزبان نے جب ریشم سے شادی سے متعلق سوال کیا تو انہوں نے کہا کہ شوبز انڈسٹری میں شادیاں ہو تو رہی ہیں لیکن شادیاں ہونے کے بعد ٹوٹ رہی ہیں، اتنی شادیاں ٹوٹی ہیں اور مجھے بہت دکھ بھی ہوا۔انہوں نے شوبز کے کسی اداکار سے شادی نہ کرنے کی وجہ پر روشنی ڈالتے ہوئے کہا کہ شوبز میں سال یا ڈیڑھ سال سے زیادہ شادیاں چلتی ہی نہیں ہیں، شوبز میں 7 یا 8 شادیاں ٹوٹ چکی ہیں اور مجھے ان شادیوں کے ٹوٹنے پر بہت دکھ ہے۔اپنی شادی سے متعلق انہوں نے کہا کہ جب مجھے کوئی مل جائے گا تو مستقبل میں میرا بھی شادی کا ارادہ ہے۔اداکارہ نے مزید کہا کہ محبت میں نبھانا بہت ضروری ہے، اللہ کے نزدیک میاں بیوی کا رشتہ سب سے زیادہ پسندیدہ ہے اور یہ رشتہ اب نہ صرف کمزور ہو رہا ہے بلکہ تیزی سے ٹوٹ بھی رہا ہے۔

پاکستانی فلم " ان فلیمز" نے سعودی عرب میں بڑا ایوارڈ اپنے نام کرلیا

ریڈ سی انٹرنیشنل فیسٹیول میں ڈائریکٹر ضرار خان کی پاکستانی فلم ’اِن فلیمز‘ نے ’بیسٹ فیچر فلم‘ کا ایوارڈ جیت لیا۔رپورٹ کے مطابق تیسرے سالانہ 10 روزہ فیسٹیول کی رنگا رنگ تقریب کا آغاز سعودی عرب کے شہر جدہ میں ہواجہاں پوری دنیا کی نامور شوبز شخصیات موجود تھیں۔انسٹاگرام پر ایک ویڈیو پیغام میں ضرار خان نے انعام جیتنے پر انتہائی خوشی کا اظہار کیا اور کہا کہ کاش وہ فیسٹیول میں موجود ہوتے۔ایونٹ میں ہالی ووڈ کے سپر اسٹارز جونی ڈیپ، ول اسمتھ، شیرون اسٹون، مشیل ولیمز، فیریڈا پنٹو اور دیگر بھی موجود تھے۔پاکستان کی طرف سے ہمایوں سعید، ماہرہ خان اور احد رضا میر نے فیسٹیول کو رونق بخشی اور اپنے سوشل میڈیا اکاؤنٹس پر ایونٹ کی تفصیلات شیئر کیں۔

چورچور کہنے والے خود چور ہیں، ایک کھلنڈرے نے پاکستان کا برا حال کر دیا، نواز شریف

قائد مسلم لیگ ن اور سابق وزیراعظم نواز شریف نے کہا ہے کہ ایک کھلنڈرا لایا گیا جس نے ملک کا بُرا حال کر دیا، ہم اقتدار نہیں عوام کی بھلائی چاہتے ہیں۔پارٹی کے پارلیمانی بورڈ کے پانچویں اجلاس سے خطاب کرتے ہوئے نواز شریف کا کہنا تھا کہ وقت کو برا نہیں کہنا چاہئے، خواہش ہے پاکستان کو مصیبتوں سے باہر نکالاجائے، ملک و ملت کی ترقی کا مشن لے کر سیاست میں آئے۔انہوں نے کہا کہ عوام کی خدمت کریں تو ملک کی تقدیر بدل سکتی ہے، ایسے شخص کو لایا گیا جسے ملک، معیشت اور عالمی تعلقات کا کچھ پتہ ہی نہیں تھا، ریاست مدینہ کہنے والے کو خود ریاست مدینہ کا نہیں پتہ تھا، عوام کو قصہ اور کہانیاں سنائی گئیں۔سابق وزیراعظم کا کہنا تھا کہ 190 ملین پاؤنڈ کا سکینڈل بہت بڑا ہے، قوم کو بتائیں کہ ملک میں ڈاکہ کس نے ڈالا، بند لفافہ دکھا کر اپروول لیتے رہے، لفافہ کھول کر ہی نہیں دکھایا، سپریم کورٹ نے کہا یہ حکومت پاکستان کا پیسہ ہے وہاں جانا چاہئے۔نواز شریف نے کہا کہ ملک کے 60 ارب روپے کھاؤ گے تو بجلی مہنگی نہیں ہو گی تو کیا ہو گا، اگر یہ پیسہ نہ کھایا جاتا تو ہم کم یونٹس والوں کو مفت بجلی دے دیتے، بیٹے سے تنخواہ نہ لینے کا الزام لگا کر نکالا گیا، دوسروں کو چور کہنے والے خود چور ہیں، آج 7 سال بعد مجھے جھوٹے الزامات پر انصاف مل رہا ہے۔قائد مسلم لیگ ن کا مزید کہنا تھا کہ سابق چیف جسٹس ثاقب نثار کی آڈیو موجود ہے کہ ان کو اندر رکھنا ہے اور سابق چیئرمین پی ٹی آئی کو لانا ہے، سب کا احتساب ہونا چاہئے، ہم یہاں حکومتیں لینے نہیں بیٹھے، ہم اقتدار نہیں عوام کی بھلائی چاہتے ہیں۔

مجھے کسی ادارے نے تنگ نہیں کیا، صرف 40 دن کا چلہ کاٹا: شیخ رشید

(لاہور) سربراہ عوامی مسلم لیگ شیخ رشید احمد نے کہا ہے کہ مجھے کسی ادارے نے تنگ نہیں کیا، صرف 40 دن کا چلہ کاٹا۔لاہور ہائیکورٹ راولپنڈی بنچ میں پیشی کے بعد میڈیا سے گفتگو کرتے ہوئے شیخ رشید کا کہنا تھا کہ چلے کے بعد ٹویٹ کرنا بھی چھوڑ دیا، صرف اخبار پڑھتا ہوں، میرے ساتھ کسی نے کوئی زبردستی نہیں کی، میں نے کسی کے خلاف شہادت نہیں دی۔انہوں نے کہا کہ چیف الیکشن کمشنر کے بیان پر اعتماد رکھنا چاہیے کہ 8 فروری کو الیکشن ہوں گے، ابھی کوئی انتخابی مہم نہیں چلا رہا جس دن الیکشن شیڈول آگیا انتخابی مہم شروع کر دوں گا، الیکشن نہ ہوئے تو پرانی تنخواہ پر کام کریں گے۔سابق وفاقی وزیر کا کہنا تھا کہ ہم نے پنڈی کے دونوں حلقوں میں کام کیا ہے، حلقہ 56 اور 57 سے قلم دوات کے نشان پر الیکشن لڑوں گا، اداروں کا احترام سب پر لازم ہے، سب کو ساتھ لے کر اور امن سے چلنا ہے۔

بلوچستان کے سابق وزیراعلی عبدالقدوس بزنجو پی پی پی میں شامل

پاکستان پیپلزپارٹی پارلیمنٹرینز کے صدر آصف علی زرداری سے بلاول ہاؤس میں ملاقات کے بعد بلوچستان کے سابق وزیراعلی عبدالقدوس بزنجو پی پی پی میں شامل ہو گئے۔آصف علی زرداری سے ملاقات کے بعد بلوچستان حکومت کے سابق وزیر سکندر عمرانی بھی پی پی پی میں شامل تھے۔ آصف زرداری سے ملاقات کے بعد بلوچستان عوامی پارٹی کے رہنما عبدالقدوس بزنجو کے ہمراہ سید نظام الدین، سید حمید، نصیر احمد بزنجو، میر عبدالوہاب بزنجو و دیگر بھی پی پی پی میں شامل ہو گئے۔آصف زرداری نے پاکستان پیپلزپارٹی میں شامل ہونے والی بلوچستان کی سیاسی شخصیات کو خوش آمدید کہا۔ آصف زرداری سے ملاقات میں اہم سیاسی شخصیات کی شمولیت کے موقع پر علی حسن زہری بھی موجود تھے۔

سابق وزیر خزانہ شوکت ترین کا سیاست سے علیحدگی کا فیصلہ

(ویب ڈیسک) سابق وزیر خزانہ اور پاکستان تحریک انصاف کے سینیٹر شوکت ترین نے پی ٹی آئی اور سیاست سے علیحدگی کا فیصلہ کیا ہے۔

شوکت ترین 2021ء میں پاکستان تحریک انصاف کے ٹکٹ پر خیبرپختونخوا سے سینیٹر منتخب ہوئے تھے، وہ 17 اکتوبر 2021ء سے 11 اپریل 2022ء تک پی ٹی آئی حکومت میں وزیر خزانہ رہے۔سینیٹر شوکت ترین نو مئی کے بعد سے روپوش تھے، شوکت ترین نے سینیٹ کی نشست سے بھی مستعفی ہونے کا فیصلہ کیا ہے جس سے متعلق انہوں نے پارٹی قیادت کو آگاہ کر دیا ہے۔

کم عمر اور بغیر لائسنس ڈرائیورز کیخلاف کریک ڈاؤن، 07 ہزار 997 مقدمات درج

کم عمر اور بغیر لائسنس ڈرائیورز کے خلاف کریک ڈاؤن جاری ہے۔ 25 روز میں 07 ہزار 997 مقدمات درج، گاڑیاں تھانوں میں بند کی گئیں۔کم عمر بچوں کو گاڑی، موٹرسائیکل دینے والے بھی کسی معافی کے مستحق نہیں۔ سی ٹی او لاہور کا کہنا ہے لائسنس دفاتر کے اوقات کار اور عملہ بڑھا دیا گیا ہے، شہر میں 08 خدمت مراکز 24/7 سہولیات فراہم کر رہے ہیں، والدین اپنے بچوں کے مستقبل کے خود ذمہ دار ہیں۔

انہوں نے کہا والدین اپنی ذمہ داری نبھائیں اور اپنے کم عمر بچوں کو ڈرائیونگ کی اجازت ہرگز مت دیں۔

جیلانی پارک میں گل داؤدی نمائش ، شہریوں کی بڑی تعداد میں شرکت

پنجاب ہارٹی کلچر اتھارٹی ( پی ایچ اے) کے زیراہتمام جیلانی پارک میں سالانہ گل داؤدی نمائش کا تیسرا روز، شہر کے باسی بڑی تعداد میں رنگا رنگ پھول دیکھنے پہنچ گئے۔پی ایچ اے کی جانب سے نمائش میں 35ہزار کے قریب اور 55 اقسام کے پھول لگائے گئے ہیں۔ نمائش اربن لینڈز سکیپنگ کے تناظر میں ایک منفرد کاوش ثابت ہورہی ہے۔ نمائش میں شہریوں کیلئے فوڈ کورٹ، میوزک شو اور لیزر لائٹ شو کا بھی انعقاد کیا گیا ہے جو شہریوں کیلئے بہترین اور معیاری سیرو تفریح کا ذریعہ ثابت ہو رہا ہے۔ لاہور کے باسی بڑی تعداد میں رنگ برنگے پھول دیکھنے پہنچ رہے ہیں۔نمائش میں بچوں اور عورتوں کی بڑی تعداد موجود رہی۔ بچے رنگ برنگے پھول دیکھ کر بے حد خوش نظر آئے۔فیملیز کے ہمراہ آئے شہریوں کا کہنا تھا کہ اس طرح کی خوبصورت نمائش سال میں بہت کم دیکھنے کو ملتی ہے۔ صبح سے آئے بچے گھر جانے کو تیار نہیں ہیں۔

دسمبر کی سرد شاموں میں شہری گل داؤدی کی حسین نمائش سے لطف اٹھاتے نظر آئے۔

Thursday, 7 December 2023

پاک فوج خون کے آخری قطرے تک وطن کی حفاظت کرے گی: آرمی چیف

آرمی چیف جنرل سید عاصم منیر نے کہا ہے کہ پاک فوج خون کے آخری قطرے تک وطن کی حفاظت کرے گی۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے پشاور کا دورہ کیا، کور کمانڈر پشاور نے ان کا استقبال کیا۔آئی ایس پی آر کے مطابق آرمی چیف کو سکیورٹی کی مجموعی صورتحال، انسداد دہشت گردی کے خلاف جاری کارروائیوں، غیر قانونی طور پر مقیم غیر ملکیوں کی وطن واپسی اور نئے ضم شدہ اضلاع میں سماجی و اقتصادی ترقی کی پیش رفت کے بارے میں تفصیلی بریفنگ دی گئی۔آرمی چیف نے انسداد دہشت گردی کی مختلف کارروائیوں کے دوران بہادری اور شجاعت کا مظاہرہ پیش کرنے والے افسران اور جوانوں سے بھی ملاقات کی اور افسران و جوانوں کی بے مثال کارکردگی کوسراہا۔اس موقع پر آرمی چیف نے گفتگو کرتے ہوئے کہا ہے کہ قوم کو مسلح افواج کی کارکردگی پر فخر ہے، کامیابی پاکستان کا مقدر ہے اور پاک فوج مادر وطن کے ایک ایک انچ کی حفاظت کا بے لوث اور مقدس فرض خون کے آخری قطرے تک ادا کرتی رہے گی۔آرمی چیف نے پہلی بار منعقد ہونے والی قومی ورکشاپ خیبرپختونخوا (NWKP-1) کے شرکاء سے بھی خصوصی خطاب کیا۔شرکاء سے خطاب کرتے ہوئے آرمی چیف کا کہنا تھا کہ سکیورٹی فورسز کو خیبر پختونخوا کے غیور عوام کی پرعزم حمایت کے باعث ہی صوبے میں استحکام اور سماجی و اقتصادی ترقی کے منصوبوں پر پیش رفت حاصل ہوئی ہے۔پاکستان کی خوشحالی کو خیبرپختونخوا سے جوڑتے ہوئے آرمی چیف نے زور دیا کہ پاکستان کے امن اور استحکام کے لیے دشمن قوتوں کے مذموم عزائم کو ہم آہنگی اور جامع حکمت عملی کے ذریعے ناکام بنایا جا رہا ہے۔آرمی چیف جنرل سید عاصم منیر نے نئے ضم شدہ اضلاع میں اقتصادی ترقی کی اہمیت کو بھی اجاگر کیا۔جنرل سید عاصم منیر نے اس بات پر بھی روشنی ڈالی کہ غیر قانونی طور پر مقیم غیر ملکی پاکستان کی سلامتی اور معیشت کو بری طرح متاثر کر رہے ہیں، ان کی وطن واپسی کا فیصلہ حکومت نے پاکستان کے وسیع تر مفاد میں کیا ہے، غیر قانونی غیر ملکیوں کو طے شدہ اصولوں کے مطابق باعزت طریقے سے ان کے ملکوں میں واپس بھیجا جا رہا ہے۔