Daily Nawa-i-Ajam Lahore

Wednesday, 29 November 2023

نبیل ظفر کا اپنی مداح سے شادی کا انکشاف

پاکستان کے معروف اداکار، پروڈیوسر اور ہدایت کار نبیل ظفر نے انکشاف کیا ہے کہ اُنہوں نے آٹوگراف لینے آنے والی اپنی مداح سے شادی کی تھی۔نبیل ظفر نے حال ہی میں مزاحیہ پروگرام “مذاق رات” میں بطورِ مہمان شرکت کی جہاں اُنہوں نے اپنی شادی اور مقبول ترین ڈراما “بُلبلے” بنانے سے متعلق گفتگو کی۔پروگرام کے میزبان عمران اشرف نے نبیل ظفر سے اُن کے مقبول ترین ڈراما “بُلبلے” بنانے سے متعلق سوال کیا جس پر اداکار نے کہا کہ “سال 2009 میں مجھے مالی مسائل کا سامنا تھا، میں اپنے بچوں کی تعلیم اور گھر کی دیگر اخراجات کی وجہ بہت پریشان تھا”۔نبیل ظفر نے کہا کہ “انہی مالی مسائل کے دوران، میں نے اپنا پہلا پروڈکشن ہاوْس بنایا اور کسی سے اُدھار رقم لیکر ڈراما “بُلبلے” بنایا جبکہ میں نے ڈرامے کے رائٹر اور ہدایتکار کو پہلے ہی اس بات سے آگاہ کردیا تھا کہ میرے پاس اُنہیں دینے کے لیے پیسے نہیں ہیں لہٰذا ڈرامے کے فروخت ہونے کے بعد ہی اُنہیں کام کا معاوضہ ملے گا”۔اداکار نے کہا کہ “میرے پاس اتنی رقم بھی نہیں تھی کہ میں کسی دوسرے اداکار کو ڈرامے میں کاسٹ کرسکوں لہٰذا میں نے خود نبیل کا کردار ادا کیا اور پھر صرف ڈیڑھ لاکھ روپے میں وہ ڈراما چینل کو فروخت کردیا”۔اسی پروگرام کے دوران نبیل ظفر نے اپنی شادی کے حوالے سے گفتگو کرتے ہوئے کہا کہ “میری اہلیہ میری مداح تھیں، میری اپنی اہلیہ سے پہلی ملاقات اسکاٹ لینڈ کے شہر گلاسگو کے ریلوے اسٹیشن پر ہوئی تھی”۔نبیل ظفر نے کہا کہ “میری اہلیہ میرا آٹوگراف مانگنے آئی تھیں جہاں سے ہماری محبت کی کہانی کا آغاز ہوا اور پھر میں نے سیدھا نکاح نامے پر آٹوگراف دیا”۔

"وقار ذکا نے مجھے مارننگ شو سے نکلوانے کی کوشش کی"؛ ندا یاسر کا انکشاف

پاکستان کی معروف میزبان و اداکار ندا یاسر نے انکشاف کیا ہے کہ وقار ذکا نے اُنہیں اُن کے مارننگ شو سے نکلوانے کے لیے ٹی وی چینل مالکان کو ای میل کی تھی۔ندا یاسر نے حال ہی میں پروگرام “حد کردی” میں شرکت کی جہاں اُنہوں نے ایک سیگمنٹ کے دوران وقار ذکا سے متعلق گفتگو کرتے ہوئے کہا کہ “وقار ذکا میرے بہت اچھے دوست تھے لیکن بعد میں وہ میرے دشمن بن گئے”۔اُنہوں نے کہا کہ “وقار ذکا نے مجھے میرے مارننگ شو سے نکلوانے کے لیے میرے خلاف مہم چلائی، مجھے میزبان سے ہٹانے کے لیے بہت کوشش کی”۔ندا یاسر نے کہا کہ “جب میں اور وقار ذکا ایک ہی چینل میں کام کرتے تھے تو اُس وقت اُن کا رویہ میرے ساتھ بہت اچھا تھا، وہ میرے بہت اچھے دوست تھے لیکن پھر اُنہوں نے اُس چینل کے شو کی میزبانی چھوڑ دی”۔اُنہوں نے کہا کہ ” میں نے وقار ذکا کو چینل سے نہیں نکلوایا تھا، میرا کوئی قصور نہیں تھا لیکن اس کے باوجود بھی وقار ذکا نے میرے خلاف مہم چلائی اور مجھے مارننگ شو کی میزبانی سے ہٹانے کے لیے چینل کے مالکان کو ای میل کی”۔ندا یاسر نے یہ بھی کہا کہ “مجھے آج تک معلوم نہیں ہوا کہ میں نے وقار ذکا کا کیا بگاڑا ہے لیکن وہ میرے دشمن بن گئے”۔اس سے قبل ندا یاسر نے اداکار و میزبان احمد علی بٹ کے پوڈ کاسٹ میں شرکت کی تھی جس میں اُنہوں نے انکشاف کیا تھا کہ فہد مصطفیٰ کے ساتھ ہماری خاندانی دشمنی ہے، اسی وجہ سے وہ میرے شو میں نہیں آتے۔

"پوری دُنیا جھوٹی ہے، صرف اسرائیل سچا ہے؟" جیجی حدید بھڑک اُٹھیں

نیویارک: معروف امریکی ماڈل جیجی حدید نے اسرائیل کی سوچ پر شدید تنقید کرتے ہوئے سوال کیا ہے کہ کیا صرف اسرائیل ہی سچا ہے، باقی دُنیا کیا جھوٹی ہے۔جیجی حدید کا شمار، اُن امریکی ماڈلز اور فنکاروں میں ہوتا ہے جو فلسطین کی حمایت میں اپنی آواز بُلند کررہی ہیں، اُنہیں فلسطین کی حمایت کرنے پر اسرائیل کی جانب سے دھمکیاں بھی دی گئیں لیکن اس کے باوجود وہ معصوم فلسطینیوں کی آواز بنی ہوئی ہیں۔اب اُنہوں نے سوشل میڈیا سائٹ انسٹاگرام کا رُخ کیا جہاں اُنہوں نے انسٹا اسٹوری میں اسرائیل کے خلاف بیان جاری کرتے ہوئے کہا کہ “اسرائیل ہر فلسطینی شہری کو دہشت گرد کہتا ہے اور اگر کوئی فلسطین کی حمایت کرتا ہے تو اسرائیل اُسے یہود دشمن کہتا ہے”۔جیجی حدید نے کہا کہ “اگر کوئی یہودی اسرائیلی حکومت کے خلاف کھڑا ہوتا ہے تو اُس پر بھی اسرائیل کی جانب سے نتیقد کی جاتی ہے اور اُسے کہا جاتا ہے کہ یہ بھی دشمن ہے”۔امریکی ماڈل نے سوال کیا کہ “تو کیا پوری دُنیا جھوٹی اور غلط ہے؟ صرف اسرائیل سچا اور صحیح ہے؟”واضح رہے کہ گزشتہ ماہ جیجی حدید نے فلسطین میں انسانی المیے پر سخت موقف اپناتے ہوئے اسرائیلی حکومت کی ظالمانہ کارروائیوں کو تنقید کا نشانہ بنایا تھا۔امریکی ماڈل کی فلسطین کی حمایت کے بعد اسرائیلی حکومت کے آفیشل انسٹاگرام اکاؤنٹ نے امریکی ماڈل کو سخت جواب دیتے ہوئے لکھا تھا کہ وہ یہودی بچوں کی موت پر آنکھیں کیوں پھیر رہی ہیں۔سرکاری اکاؤنٹ نے مزید لکھا تھا کہ جیجی حدید کی خاموشی بتاتی ہے کہ وہ کس کے ساتھ ہے اور اسرائیل امریکی ماڈل کو نہیں چھوڑے گا۔اسرائیل کی جانب سے قتل کی دھمکیوں کے بعد امریکی ماڈل بیلا حدید اور اُن کی بہن جیجی حدید نے اپنے موبائل فون نمبرز تبدیل کردیے تھے۔یاد رہے کہ امریکی ماڈل بیلا اور جیجی حدید کے والد کا تعلق فلسطین سے ہے، اسی وجہ سے اُن کا خاندان ہمیشہ فلسطین پر اسرائیلی مظالم کے خلاف اپنی آواز بُلند کرتا ہے۔

Saturday, 25 November 2023

ٹریوس ہیڈ کو آئی پی ایل میں شامل نہ کرنے کی وجہ کیا ہے؟

سابق آسٹریلوی کپتان رکی پونٹنگ نے انڈین پریمئیر لیگ (آئی پی ایل) ڈرافٹ میں ٹریوس ہیڈ کو شامل نہ کرنے کی وجہ بتادی۔میڈیا رپورٹس کے مطابق سابق آسٹریلوی کپتان رکی پونٹنگ نے انکشاف کیا ہے کہ ٹریوس ہیڈ کو آئی پی ایل فرنچائز دہلی کیپیٹلز کی ٹیم اسکواڈ میں شامل کرنے کی خواہاں تھی تاہم انکے شادی کے منصوبے اور بیچ سے ایونٹ چھوڑ جانے کے باعث مالکان نے لینے سے انکار کردیا۔رکی پونٹنگ نے کہا کہ ٹریوس ہیڈ کی انڈین پریمئیر لیگ کے آغاز کے محض دو ہفتے بعد شادی ہے جس کی وجہ سے انہوں نے ٹورنامنٹ کا حصہ بننے سے معذرت کرلی۔واضح رہے کہ آئی سی سی ورلڈکپ کے فائنل میں ٹریوس ہیڈ نے 137 رنز کی اننگز کھیلی تھی اور بھارت کیخلاف آسٹریلیا کی جیت میں اہم کردار ادا کیا تھا۔

سوشل میڈیا پر منفی تبصرے، نوجوان میک اپ آرٹسٹ نے خودکشی کرلی

بھارت میں سوشل میڈیا پوسٹ پر منفی تبصروں کے بعد 16 سالہ نوجوان میک اپ آرٹسٹ نے خودکشی کرلی۔بھارتی میڈیا کے مطابق ریاست مدھیہ پردیش کے شہر اوجین سے تعلق رکھنے والا پرانشو نامی میک اپ آرٹسٹ انسٹاگرام پر کافی مقبول تھا جہاں وہ بیوٹی اور میک اپ کی اپنی ویڈیوز پوسٹ کرتا تھا۔ہندو تہوار دیوالی کے موقع پر بھی پرانشو نے اپنے انسٹاگرام اکاوْنٹ پر ٹرانزیشن ریل پوسٹ کی جس میں اُنہوں نے ساڑھی پہن کر خود کو خاتون کے روپ میں دِکھایا۔اس پوسٹ پر جہاں پرانشو کے مداحوں نے اُن کے میک اپ کی مہارت کی تعریف کی تو وہیں ہزاروں صارفین نے اُنہیں شدید تنقید کا نشانہ بنایا اور اُن کی پوسٹ پر 4000 سے زائد منفی اور نفرت انگیز تبصرے کیے۔انسٹاگرام پوسٹ پر نفرت انگیز تبصروں نے 16 سالہ پرانشو کے دماغ پر اس قدر گہرا اثر ڈالا کہ اُنہوں نے صارفین کی نفرت نہ برداشت کرتے ہوئے خودکشی کرلی۔اس حوالے سے بھارتی اداکارہ نے اپنی سوشل میڈیا پوسٹ میں دعویٰ کیا کہ پرانشو کو صارفین کے نفرت انگیز تبصروں نے خودکشی کے لیے اُکسایا۔دوسری جانب پولیس کا کہنا ہے کہ پرانشو کی خودکشی کے پیچھے اصل وجہ کا ابھی تک پتہ نہیں چل سکا ہے اور اس معاملے کی تحقیقات جاری ہے۔واضح رہے کہ پرانشو کے انسٹاگرام پر فالوورز کی تعداد 17 ہزار ہے جبکہ اُنہوں نے اپنے انسٹاگرام اکاوْنٹ پر 301 پوسٹس کی تھیں۔

’ڈنکی‘ کا مطلب کیا ہے؟ شاہ رخ خان کی مداح کو دلچسپ انداز میں وضاحت

ممبئی: بالی وڈ کنگ شاہ رخ خان کیلئے 2023 بالی وڈ پر حکمرانی کا سال رہا اور لگاتار دو فلموں ’پٹھان‘ اور ’جوان‘ نے باکس آفس پر نئے ریکارڈ قائم کیے۔ ’پٹھان‘ اور ’جوان‘ کی شاندار کامیابی کے بعد اب اُن کی تیسری فلم “ڈنکی” کی ریلیز کی تیاریاں زور و شور سے جاری ہیں اور اداکار کے مداح بھی بےصبری سے اس فلم کی ریلیز کا انتظار کررہے ہیں۔فلم کے منفرد ٹائٹل کی وجہ سے اداکار کے اکثر مداح تذبذب کا شکار ہیں اور اب شاہ رخ خان نے خود ہی اس کی وضاحت کردی ہے۔سماجی رابطے کی ویب سائٹ ایکس پر مختصر سیشن میں ایک مداح کے سوال پر اداکار نے لکھا ’ڈنکی غیر قانونی طور پر سرحدوں کو پار کرنے کا ایک طریقہ ہے‘۔شاہ رخ خان نے مزید لکھا کہ ’ڈنکی‘ کا تلفظ فنکی (Funky)، ہنکی Hunky اور منکی Monkey کی طرح ہے۔’ ڈنکی‘ 21 دسمبر کو سینما گھروں میں پیش کی جائی گی، مبینہ طور فلم ایک کامیڈی ڈراما ہے جس میں غیرقانونی طور پر بیرون ملک جانے والے مسئلے کو موضوع بنایا گیا ہے جبکہ شاہ رخ خان ’ڈنکی‘ میں بالکل مختلف روپ میں دکھائی دیں گے جو ان کے مداحوں کو بہت پسند آئے گا۔

پرس چھیننے کی واردات کے دوران خاتون چلتی ہوئی بائیک سے گر کر جاں بحق

کراچی: حب ریور روڈ پر پرس چھیننے کی واردات کے دوران خاتون چلتی ہوئی موٹر سائیکل سے سڑک پر گرنے سے جاں بحق ہو گئی۔بلدیہ حب ریور روڈ لکی چڑھائی شارجہ کانٹا کے قریب چلتی ہوئی موٹر سائیکل سے گر کر خاتون جاں بحق جبکہ توازن بگڑنے پر متوفیہ کا شوہر اور 2 بچے موٹر سائیکل گرنے سے زخمی ہوگئے، متوفیہ کی لاش اور زخمیوں کو چھیپا کے رضا کاروں نے سول اسپتال پہنچایا۔ریسکیو حکام کے مطابق متوفیہ کی شناخت 30 سالہ زاہدہ کے نام سے کی گئی جبکہ زخمیوں میں متوفیہ کا شوہر اقبال، بیٹی 10 سالہ افشاں اور 8 سالہ بیٹا اکبر شامل ہے۔سول اسپتال میں متوفیہ کے شوہر اقبال نے انتہائی غمگین حالت میں بات چیت کرتے ہوئے بتایا کہ وہ لیاری سنگو لین سے بلدیہ رئیس گوٹھ موٹر سائیکل پر اپنی بیوی اور 2 بچوں کے ہمراہ جا رہا تھا کہ ایک موٹر سائیکل پر سوار ملزم نے میری اہلیہ کے کندھے پر لٹکے ہوئے بیگ کو چھیننے کے کھینچا تو وہ چلتی ہوئی موٹر سائیکل سے سڑک پر گر گئی جسے سر پر گہری اندرونی چوٹیں آئیں اور وہ ہمیں روتا دھوتا چھوڑ کر اس دنیا سے چلی گئی۔ان کا کہنا تھا کہ ایک ملزم نے صرف ایک پرس کی خاطر میری اور میرے بچوں کی دنیا ہی اجڑ کر رکھ دی، معصوم بچے ماں کی جدائی میں بلک بلک کر روتے ہوئے دکھائی دیئے اس موقع پر موجود افراد انھیں تسلیاں دیتے ہوئے دکھائی دیئے۔واقعہ کی اطلاع ملنے پر متوفیہ کے اہلخانہ میں کہرام مچ گیا اور رشتے داروں کی بڑی تعداد سول اسپتال پہنچ گئی جہاں کئی رقت انگیز مناظر دیکھنے میں آئے، ابتدائی اطلاعات کے مطابق سفاک ملزم پرس چھین کر فرار ہوگیا جبکہ واقعہ کی اطلاع ملتے ہی موچکو پولیس کی نفری جائے وقوعہ پر پہنچ گئی ہے۔اس حوالے سے پولیس حکام کا کہنا ہے کہ متوفیہ کے شوہر نے پرس چھیننے کی کوشش کو حادثے کی وجہ بتایا ہے، خاتون کے شوہر کے بیان کی تصدیق کر رہے ہیں جبکہ سی سی ٹی وی کیمروں کو تلاش کر کے ان کی فوٹیجز بھی حاصل کرنے کی کوششیں کی جا رہی ہیں، متاثرہ خاندان لیاری سنگولین میں رشتے داروں سے مل کر اپنے گھر بلدیہ رئیس گوٹھ جا رہے تھے کہ یہ واقعہ پیش آگیا۔

امیتابھ بچن نے اپنا 50 کروڑ روپے کا بنگلہ کس کو دیا؟

ممبئی: بالی ووڈ کے لیجنڈری اداکار اور بِگ بی کے نام سے مشہور امیتابھ بچن نے اپنا پُرتعیش بنگلہ اپنی بیٹی شویتا نندا کو تحفے میں دے دیا۔بھارتی میڈیا کے مطابق بالی ووڈ کی سینئر جوڑی امیتابھ بچن اور جیا بچن کے ممبئی کے پوش علاقے جوہو میں 3 بنگلے واقع ہیں جن میں سے ایک بنگہ جس کا نام ’پرتیکشا‘ ہے وہ اُنہوں نے اپنی بیٹی شویتا نندا کو تحفے میں دے دیا۔رپورٹ میں بتایا گیا کہ ’پرتیکشا‘ کی قیمت بھارتی مالیت میں تقریباً 50 کروڑ روپے ہے جبکہ یہ 674 مربع میٹرز اور 890.47 مربع میٹرز کے 2 پلاٹوں پر مشتمل ہے۔امیتابھ بچن اور جیا بچن نے سال 1975ء میں ریلیز ہونے والی فلم ’شعلے‘ کی زبردست کامیابی کے بعد پہلا بنگلہ ’پرتیکشا‘ خریدا تھا، یہ جوڑی پہلے اسی بنگلے میں رہائش پذیر تھی۔بعدازاں، امیتابھ بچن اپنے والد ر ہری ونش رائے بچن اور والدہ تیجی بچن کے ساتھ اپنے موجودہ گھر ’جلسہ‘ میں منتقل ہوگئے تھے۔واضح رہے کہ امیتابھ بچن کی بیٹی شویتا بچن نندا ایک کالم نگار، سابقہ ماڈل، مصنفہ اور بزنس وومن ہیں جبکہ ان کا سب سے زیادہ فروخت ہونے والا ناول ’پیراڈائز ٹاورز‘ ہے۔

دبئی میں سالگرہ نہ منانے پر شوہر ہلاک

پونا: سالگرہ کیلیے دبئی نہ لےجانے پرناراض بیوی کے مکے سے شوہر ہلاک ہوگیا۔بھارتی میڈیا کے مطابق بھارتی شہر پونے کی رہائشی 36 سالہ رینوکا اپنی سالگرہ منانےدبئی نہ لے جانے پر شوہر 38 سالہ بزنس مین نکھل کھنہ سے ناراض تھی۔ دونوں کے درمیان قیمتی تحائف نہ دینے پر بھی تلخ کلامی ہوئی جس پررینوکا نے اپنے شوہر کی ناک پر گھونسہ مارا۔پولیس کا کہنا ہے کہ گھونسے اتنا شدید تھا کہ نکھل کھنہ کی ناک سے بے تحاشا خون بہنے لگا۔ پولیس واقعہ کی اطلاع ملنے پر موقع پر پہنچی اور نکھل کو اسپتال منتقل کیا جہاں ڈاکٹرز نے ان کی موت کی تصدیق کردی۔پولیس نے خاتون کے خلاف قتل کا مقدمہ درج کرکے انہیں گرفتار کرلیا۔نکھل اور رینوکا نے پسند کی شادی کی تھی اور ان کی شادی کو 6 سال ہوچکے تھے۔

سورۃ البقرہ پڑھیں، آج جو کچھ ہورہا ہے پہلے ہی بتادیا گیا تھا: اُشنا شاہ

پاکستانی اداکارہ اشنا شاہ نے اسرائیل کی جانب سے غزہ پر وحشیانہ حملوں کے بعد دنیا بھر کے لوگوں کو قرآن پاک کی سورۃ البقرہ پڑھنے کا مشورہ دیا ہے۔ 47 روز سے جاری اسرائیلی جارحیت کے دوران غزہ میں 14 ہزار سے زائد افراد شہید ہوچکے ہیں جن میں زیادہ اکثریت خواتین اور بچوں کی ہے۔ایسے میں سوشل میڈیا اہم کردار ادا کررہا ہے جہاں دنیا بھر کی مشہور شخصیات اسرائیل کے خلاف آواز بلند کررہی ہیں جن میں اداکارہ اشنا شاہ بھی شامل ہیں جو آئے دن ایکس پر اس ظلم کے خلاف آواز اٹھا رہی ہیں۔اب اداکارہ کی ایک ٹوئٹ سوشل میڈیا کی زینت بنی ہوئی ہے جس میں انہوں نے مسلمانوں سمیت غیر مسلموں کو بھی متوجہ کیا۔اشنا شاہ نے اپنے پیغام میں لکھا 'میری مسلمانوں اور غیر مسلم سے گزارش ہے کہ آپ قرآن پاک کی سورۃ البقرہ کو ترجمے کے ساتھ پڑھیں'۔اداکارہ نے اردو نہ سمجھنے والوں کے لیے اس ترجمے کو انگریزی میں پڑھنے کی درخواست کی۔اُنہوں نے کہا کہ 'دُنیا میں آج جو کچھ بھی ہورہا ہے، اللہ نے مسلمانوں کو قرآن پاک کی سورۃ البقرہ میں پہلے ہی بتا دیا تھا'۔اداکارہ نے مزید کہا کہ 'میں نے سورۃ البقرہ کو ترجمے کے ساتھ پڑھا ہے اور میرے رونگٹے کھڑے ہوگئے ہیں'۔

زندگی کا واحد مقصد جوہی چاولہ سے شادی کرنا تھا: آر مادھون

بالی وڈ اداکار آر مادھون نے انکشاف کیا ہے کہ ماضی میں وہ خوبصورت مسکراہٹ کی مالک اداکارہ جوہی چاولہ کے دیوانے تھے اور ان سے شادی کرنے کے خواہشمند بھی تھے۔حال ہی میں آر مادھون جوہی چاولہ کے ہمراہ اپنی نئی ویب سیریز 'ریلوے مین' کے سلسلے میں ایک انٹرویو میں شریک ہوئے جس میں انہوں نے جوہی کے سامنے اپنی محبت کا اعتراف کیا۔آر مادھون نے کہا 'میں آج سب کے سامنے اعتراف کررہا ہوں، جب میں نے فلم قیامت سے قیامت تک دیکھی تو میں نے اپنی ماں سے کہا تھا کہ میں جوہی چاولہ سے شادی کرنا چاہتا ہوں‘۔اداکار نے مزید کہا کہ 'اُس وقت میری زندگی کا بس یہی ایک مقصد تھا، جوہی چاولہ سے شادی کرنا لیکن افسوس میرا یہ مقصد پورا نہیں ہوسکا'۔مادھون نے یہ بھی بتایا کہ ’1988 میں جب عامر خان کے ہمراہ جوہی چاولہ کی فلم قیامت سے قیامت تک ریلیز ہوئی، اس وقت تک ان کا بالی وڈ میں ڈیبیو بھی نہیں ہوا تھا‘۔دوران انٹرویو اداکار نے اپنے بیٹے کی پیدائش سے متعلق کہا 'میرا بیٹا 2005 کے ممبئی سیلاب کے دوران پیدا ہوا تھا اور بیٹے کی پیدائش سے کچھ دیر قبل اسپتال آتے ہوئے میری بیوی سڑک پر گاڑی میں پھنس گئی تھی'۔آر مادھون کے مطابق ’سڑک پر موجود عوام کو معلوم نہیں تھا کہ یہ میری بیوی ہیں، پھر بھی سب نے میری بیوی کی گاڑی سے پانی سے نکالنے میں مدد کی‘۔واضح رہے کہ آر مادھون نے 1993 میں مشہور ٹی وی شو 'بنے گی اپنی بات' سے شوبز انڈسٹری میں قدم رکھا، 1997 میں انہوں نے ایک انگریزی فلم 'اِن فرنو' کی جس میں ان کا کردار ایک ہندی پولیس افسر کا تھا۔بعدازاں اُنہوں نے 2001 میں مقبول رومانوی فلم ‘رہنا ہے تیرے دل میں’ سے بالی ووڈ میں قدم رکھا۔