مداحوں نے حرا مانی کو پاکستانی 'کارڈیشین' قرار دے دیا

 مداحوں نے حرا مانی کو پاکستانی 'کارڈیشین' قرار دے دیا

چلبلی اداکارہ حرا مانی کو مداحوں نے پاکستانی 'کارڈیشین' قرار دے دیا۔حرا مانی مشرقی و مغربی ملبوسات زیب تن کرنے کا فن بخوبی  جانتی ہیں اور اس کی عکاسی کرنے کا موقع کبھی بھی ہاتھ سے نہیں جانے دیتیں۔حرا نے فوٹو اینڈ ویڈیو شیئرنگ ایپ انسٹا گرام پر چند تصاویر جاری کیں جن میں انہیں سرمئی سوٹ پینٹ پہنے دیکھا جا سکتا ہے جس پر سلور ستاروں کی لائنز بنی ہوئی ہیں،حرا مانی نے اپنے لک کو چار چاند لگانے کیلئے کنٹراسٹ میں گلابی ہائی ہیلز پہنیں اور اسی سے میچنگ لپ سٹک لگا کر لک کو مکمل کیا۔اداکارہ نے کانوں میں لباس سے میچنگ بندے پہنے جبکہ اپنی زلفوں کو ہائی پونی ٹیل میں باندھا جس نے ان کی دلکشی میں مزید اضافہ کردیا۔مذکو ہ پوسٹ کے کمنٹ سیکشن میں سوشل میڈیا صارفین حرا کی تعریف کرنے سے زیادہ ان پر تنقید کرتے نظر آرہے ہیں، ایک صارف نے لکھا کہ "کارڈیشین سسٹرز" بننا چاہ رہی ہو کیا؟ جبکہ ایک اور صارف نے لکھا کہ "لباس آپ کی شخصیت کے حساب سے کافی بولڈ ہے"۔

آج کل بیٹوں کے اچھے نصیب کیلئے بھی دعا کرنی چاہیے: صبا فیصل

 آج کل بیٹوں کے اچھے نصیب کیلئے بھی دعا کرنی چاہیے: صبا فیصل

پاکستان شوبز انڈسٹری کی سینئر اداکارہ صبا فیصل نے والدین کو بیٹیوں کے علاوہ بیٹوں کے اچھےنصیب کیلئے بھی دعائیں کرنے پر زور دیا ہے۔اداکارہ صبا فیصل نے نجی ٹی وی شو کے دوران  بیٹوں سے متعلق گفتگو کرتے ہوئے کہا کہ پہلے ہم بیٹیوں کے نصیب کیلئے دعائیں کیا کرتے تھے لیکن ہمیں یہ بھی دعا کرنی چاہیے کہ اللہ تعالیٰ بیٹوں کے نصیب بھی اچھے کرے۔اداکارہ نے اس کی وجہ پر روشنی ڈالتے ہوئے مزید کہا کہ بیٹے پورا ایک خاندان لے کر چلتے ہیں، جب بیٹوں کی شادیاں ہوتی ہیں توآنے والی بھی اپنے شوہر کے ساتھ پورا ایک خاندان لے کر چلتی ہے کیونکہ آنے والی بیٹے کے نصیب سے آتی ہے۔نوجوان لڑکیوں سے متعلق انہوں نے کہا کہ آج لڑکیاں توقع کرتی ہیں کہ وہ کسی لڑکے سے شادی کریں گی اور اس کے گھر کی مالک ہوں گی، سب کچھ ان کا ہو گا یہ بہت غلط ہے۔اس حوالے سے اداکارہ نے مزید کہا کہ وہ یہ کیوں نہیں سمجھتی کہ نوجوان لڑکے اپنی جدوجہد کے مرحلے میں ہوتے ہیں، لہٰذا اگر وہ مالی استحکام چاہتی ہیں تو انہیں 45 سال کے شخص سے شادی کرنی چاہیے جو ان کی تمام ضروریات کو پورا کرنے کے قابل ہو۔

ضلعی انتظامیہ ان ایکشن، 24 گھنٹوں میں 170 تجاوزات کا خاتمہ

 ضلعی انتظامیہ ان ایکشن، 24 گھنٹوں میں 170 تجاوزات کا خاتمہ

ضلعی انتظامیہ غیر قانونی تجاوزات کے خلاف متحرک ہو گئی، انتظامیہ نے 24 گھنٹوں کے دوران شہر سے 170 تجاوزات کا خاتمہ کر کے 11 ٹرک سامان ضبط کرلیا۔ایڈمنسٹریٹر لاہور رافعہ حیدر کا کہنا ہے کہ چیف آفیسر اقبال فرید کی نگرانی میں تمام زونز کے افسران فیلڈ میں موجود  ہیں،انسداد تجاوزات آپریشن میں  59 چالان اور جرمانے کے نوٹس جاری کئے گئے،غیر قانونی پارکنگ پر 27 پوائنٹس کی چیکنگ جبکہ  14 کو نوٹس جاری کیے گئے۔رافعہ حیدر نے بتایا کہ شہر کے مختلف علاقوں اور شاہراہوں سے 210 بینر سٹریمر اور وال چاکنگ کا خاتمہ  کیا گیا،انفراسٹرکچر ونگ کی جانب سے 155 سٹریٹ لائٹس کی مرمت و بحالی کی گئی،سموگ کے حوالے سے  37 شاہراہوں پر مسٹ کوئین اور مسٹ کینن سے پانی کا چھڑکاؤ کیا گیا  ۔ڈی لاہور کا کہنا تھا کہ بلدیہ عظمیٰ لاہور کی جانب سے قائم 33 انسداد تجاوزات کیمپس سے انسداد تجاوزات آپریشن میں بہتری آئی ہے،شہر میں آمد و رفت اور ٹریفک مسائل پر قابو پانے کے لئے انسداد تجاوزات آپریشن اہم ہے،عوام ضلعی انتظامیہ سے انسداد تجاوزات آپریشن میں تعاون کریں۔

 لاہور میں سموگ کا مسئلہ تشویشناک حد تک جا پہنچا، سموگ ٹاورز بہتر حل قرار

 صوبائی دارالحکومت میں سموگ کا مسئلہ پریشان کن سطح تک جا پہنچا، سموگ نے لاہور سمیت دنیاکے متعدد شہروں کے باسیوں کو پریشان کررکھا ہے۔وسائل میسر ہونے کی وجہ سے  ترقی یافتہ ممالک اِس مسئلے سے نمٹنے میں کافی کامیاب نظرآتےہیں، اِن ہی اقدامات میں سے ایک سموگ ٹاورزکا قیام بھی ہے، سب سے پہلے ستمبر 2015 ءمیں نیدر لینڈز کے شہر روٹرڈیم میں 25 فٹ اونچا سموگ ٹاور بنایا گیا ۔اس کے فوراً بعد چینی  صوبے شانزے کےشہر شیان میں بلند ترین ٹاور بنایا گیا، سکائی سکریپر نما یہ  ٹاور 328 فٹ اونچا  ہے جو 2016ءسے مؤثر کام کر رہا ہے، اِس ٹاور نے چند ماہ کے دوران  10 مربع کلو میٹر کے علاقے کی فضاؤں کو شفاف بنا دیا تھا۔بھارت نے بھی اپنے آٹھ  شہروں میں سموگ ٹاورز قائم کیے ہیں جس کے اچھے نتائج برآمد ہورہے ہیں،  ماہرین سموگ ٹاورز کو سموگ پر قابو پانے کا سستا ترین ذریعہ قرار دیتے ہیں۔ اِس تناظر میں ہمارے حکام قرار دیتے ہیں کہ اِس مسئلے سے نمٹنے کی تمام ممکنہ کوششیں کی جارہی ہیں اور اُن کے مطابق کافی بہتر نتائج سامنے آرہے ہیں۔ادھر فضائی آلودگی کی فہرست میں لاہور پھر  دنیا بھر میں دوسرے نمبر پر آگیا،چھٹیاں،سمارٹ لاک ڈاؤن، سموگ ایمر جنسی سب کچھ رائیگاں گیا،شہر میں آلودگی کی شرح 400 سے تجاوز کر گئی،مال روڈ 460،کینٹ 435،گرین ٹاؤن میں آلودگی کی شرح 420 ریکارڈ کی گئی۔سموگ کنٹرول کرنے کا آخری حل مصنوعی بارش کا منصوبہ بھی مؤخر کر دیا گیا،منصوبے کو ملتوی کرنے کا فیصلہ کئی وجوہات سے منسلک ہےجن میں تکنیکی  مشکلات اور پراجیکٹ ماہرین کی غیر اطمینان بخش کارکردگی شامل  ہے۔ماحولیاتی ماہرین کا کہنا ہے کہ طویل المدتی اقدامات کے ذریعے ہی صورت حال میں بہتری لائی جاسکتی ہے،سموگ ٹاورز بنانے سے فضائی آلودگی کی شدت میں کمی  آ سکتی ہے ۔

تنخواہوں کی عدم ادائیگی پر ریلوے ملازمین کا تمام دفاتر میں احتجاج

 تنخواہوں کی عدم ادائیگی پر ریلوے ملازمین کا تمام دفاتر میں احتجاج

 تنخواہوں کی عدم ادائیگی پر ریلوے ملازمین نے تمام دفاتر میں احتجاج کا سلسلہ شروع کردیا، ڈی ایس لاہور آفس کے باہر ملازمین نے شدید احتجاج اور نعرے بازی کی۔ریلوے پریم یونین کی جانب سے ڈویژنل سپرنٹنڈنٹ لاہور آفس میں احتجاج کیا گیا، ملازمین نے ریلوے انتظامیہ کے خلاف شدید نعرے بازی کی۔ ریلوے پریم یونین کے عہدیداران نے ملازمین سے 21 دسمبر کے احتجاج میں بھرپور شرکت کرنے کا مطالبہ کیا ہے۔صدر لاہور ڈویژن فیاض احمد شہزاد کا کہنا ہے کہ ہر ماہ تنخواہیں تاخیر سے ادا کی جارہی ہیں،ملازمین معاشی طور پر تباہ حال ہوچکے ہیں،ریلوے کے علاوہ کسی  ادارے میں ملازمین کو اس طرح تنخواہ ادا نہیں کی جاتی، ہمارے گھروں کے بجلی اور گیس کے کنکشن عدم ادائیگی پر منقطع ہورہے ہیں۔انہوں نے کہا کہ ریلوے انتظامیہ کو ملازمین کی حالت زار نظر ہی نہیں آتی،گزشتہ ماہ جن ملازمین کو 15 تاریخ کو تنخواہیں ملنا تھیں، ان کو ابھی تک تنخواہیں نہیں ملیں،ریلوے پریم یونین ابھی تک پرامن احتجاج کررہی ہے،ریلوے انتظامیہ اور حکومت نے ہوش کے ناخن نہ لیے تو احتجاج کا دائرہ کار بڑھا دیں گے۔

بلاول بھٹو18ویں ترمیم کی بنیادپر الیکشن سلوگن بنانے کی تلاش میں ہیں:رانا ثنا

 بلاول بھٹو18ویں ترمیم کی بنیادپر الیکشن سلوگن بنانے کی تلاش میں ہیں:رانا ثنا

 پاکستان مسلم لیگ ن پنجاب کے صدر رانا ثنا ء اللہ نے کہا ہے کہ بلاول بھٹو اٹھارہویں ترمیم کی بنیاد پر الیکشن سلوگن بنانے کی تلاش میں ہیں۔ماڈل ٹاؤن میں پریس کانفرنس کرتے ہوئے رانا ثناء اللہ کا کہنا تھا کہ ن لیگ کے نقطہ نظر سےجھنگ کا ضلع 2018کے الیکشن میں خالی تھا، آج ہم نے ضلع جھنگ کو مکمل کیا ہے، آج کچھ افراد کاباضابطہ طور پر مسلم لیگ ن میں شمولیت کا اعلان کیا جارہا ہے۔رانا ثنااللہ نے بتایا کہ این اے 110سے مولانا آصف معاویہ ،بابر سیال، پی پی 125سے محترمہ نیلم سیال، پی پی 129سے خالد غنی، پی پی 131سے فیصل حیات جبوانہ، پی پی 267سےرئیس محمد ابراہیم،این اے  189سے سردار ریاض خان اور پی پی 297سےدوست محمد خان مزاری مسلم لیگ ن میں شامل ہو گئے ہیں۔صدر مسلم لیگ ن پنجاب نے کہا کہ کاروبار زندگی نہ بزرگ چلاسکتے ہیں نہ نوجوان،یہ مکس میچ ہوتا ہے، سابق چیئرمین پی ٹی آئی نے خود بھی بڑوں کی عزت نہیں کی، سابق چیئرمین پی ٹی آئی نے توں تڑاں کا کلچر متعارف کرایا۔رانا ثناء اللہ نے کہا کہ   جمہوریت آزادی اظہار رائے اور آزاد فضا میں آگے بڑھنے کا نام ہے، ہم نے برے حالات کا جرات مندی سے سامنا کیا ہے، ہم مشکل حالات سے نکل کر بہتر حالات کی جانب پیش قدمی کررہے ہیں، 21 اکتوبر کو نوازشریف نےیہ عہد کیا ہے کہ ملک کو بحران سےنکالیں گے۔رہنما مسلم لیگ ن نے کہا کہ ہم نے پہلے بھی ملک کو ایسے بحرانوں سے نکالا ہے، نوازشریف ملک کے 3بار وزیراعظم رہ چکے ہیں، نوازشریف وہ واحد شخصیت ہیں جو ملک کو بحرانوں سے نکال سکتے ہیں، یہ ملک قائم رہنے کیلئے بناہے،قیامت تک قائم رہے گا،بحران سے نکلے گا۔انہوں نے کہا کہ ہم تو بالکل 8فروری کے الیکشن کیلئے تیار ہیں، گوہر خان کو چاہیے اپنی پارٹی کو الیکشن میں لے کر جائیں، 9مئی کے مجرمان کو قانون کا سامنا کرنے دیں، پی ٹی آئی 9مئی کے کرداروں کا تحفظ نہ کرے۔اس موقع پر سابق سپیکر پنجاب اسمبلی دوست محمد مزاری کا کہنا تھا کہ مجھے اور میرے خاندان کو میاں نوازشریف کی لیڈر شپ پر پورا اعتماد ہے، کل بڑے میاں صاحب نے ہماری عزت میں اضافہ کیا، آج ہم مسلم لیگ ن میں شامل ہورہے ہیں۔

یشما گل کے ایک بار پھر مغربی لباس میں حسن کے جلوے

 یشما گل کے ایک بار پھر مغربی لباس میں حسن کے جلوے

معروف پاکستانی اداکارہ یشما گل نے ایک بار پھر مغربی لباس میں اپنےحسن کے جلوے بکھیر کر سوشل میڈیا پر دھوم مچادی۔حال ہی میں اداکارہ یشما گل نے فوٹو اینڈ ویڈیو شیئرنگ ایپ انسٹا گرام پر ایک ویڈیو شیئر کی جس میں انہوں نے سیاہ لباس میں اپنے حسن کے ایسے جلوے بکھیرے کہ فیشن کے متوالوں کی نیندیں اڑا کر رکھ دیں۔مذکورہ ویڈیو میں یشما گل نے سیاہ چولی کے ساتھ چمکدار سیاہ لباس زیب تن کر رکھا ہے جبکہ ان کے معصومانہ انداز نے ان کے مداحوں کو حیران کر دیا۔جیسے ہی اداکارہ کی ویڈیو منظر عام پر آئی شوبز شخصیات سمیت مداحوں نے اداکارہ کی تعریفوں کے پل باندھ دیئے۔

کیلیفورنیا: امریکا میں یوٹیوب چینل پر فالوورز اور ویوز کیلئے اپنے ہی طیارے کو تباہ کرنے والے یوٹیوبر کو 6 ماہ قید کی سزا سنادی گئی۔

 کیلیفورنیا: امریکا میں یوٹیوب چینل پر فالوورز اور ویوز کیلئے اپنے ہی طیارے کو تباہ کرنے والے یوٹیوبر کو 6 ماہ قید کی سزا سنادی گئی۔

غیرملکی نشریاتی ادارے کے مطابق کیلیفورنیا میں وفاقی استغاثہ نے پیر کو کہا کہ جیکب نے یہ جرم اپنے لیے سوشل میڈیا فالوورز بڑھانے اور مالی فائدہ حاصل کرنے کے لیے کیا، اس قسم کے طرز عمل کو برداشت نہیں کیا جا سکتا۔30 سالہ یوٹیوبر پائلٹ ٹریور جیکب نے دسمبر 2021 میں کیلی فورنیا میں اپنا طیارہ اُڑایا اور یوٹیوب چینل کے لیے عکس بندی بھی کرتے رہے۔ اسی دوران وہ پیراشوٹ کے ذریعے چھلانگ لگا کر طیارے سے باہر آگئے اور طیارے کو زمین پر گرنے دیا۔ طیارہ زمین پر گر کر تباہ ہوگیا اور اس سارے خطرناک منظر نامے کی ویڈیو اپنے یوٹیوب چینل پر اپ لوڈ کی تھی۔ ویڈیو کو تقریباً 30 لاکھ لوگوں نے دیکھا تھا اور آناً فاناً فالوورز کی تعداد بھی بڑھ گئی تھی۔ امریکا کی فیڈرل ایوی ایشی ایڈمنسٹریشن نے جان بوجھ کر اپنے طیارے کو تباہ کرنے اور کسی بڑے حادثے کے امکان کو بڑھانے پر یوٹیوبر جیکب کو گرفتار کرکے ان کا جہاز اُڑانے کا لائسنس منسوخ کردیا تھا۔

بجلی کی فی یونٹ قیمت میں 3 روپے سے زائد کا اضافہ

 بجلی کی فی یونٹ قیمت میں 3 روپے سے زائد کا اضافہ

نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں مزید 3 روپے 7 پیسے فی یونٹ کا اضافہ کردیا۔نیپرا کی جانب سے جاری نوٹی فکیشن میں بتایا گیا ہے کہ قیمت میں اضافہ اکتوبر کے ماہانہ فیول ایڈجسٹمنٹ کی مد میں کیا گیا ہے۔ جس کا اطلاق تمام صارفین پر ہوگا جبکہ لائف لائن اور کے الیکٹرک صارفین کو اسشنیٰ حاصل ہوگا۔مزید پڑھیں: بجلی کمپنیوں کا اووربلنگ کے ذریعے صارفین کی جیبوں پر 675 ارب کا ڈاکانیپرا نوٹی فکیشن میں کہا گیا ہے کہ اکتوبر میں نو ارب پچیس کروڑ یونٹ بجلی پیدا کی گئی، جو ریفرنس سے کم ہے۔ اکتوبر کے فیول کاسٹ ایڈجسمنٹ میں 3 روپے سےزائد  فی یونٹ پیسے بقایا جات کی مد میں شامل کیے گئے ہیں۔نیپرا کی جانب سے جاری ہونے والی نوٹی فکیشن کی منظوری وفاقی حکومت دے گی۔

70 سالہ خاتون کے ہاں 2 جڑواں بچوں کی پیدائش

 70 سالہ خاتون کے ہاں 2 جڑواں بچوں کی پیدائش

کمپالا: سفینہ ناموکوا نامی ایک 70 سالہ یوگنڈا کی خاتون نے توقعات کے برخلاف اِن  وٹرو فرٹیلائزیشن طریقے کے ذریعے جڑواں بچوں کو جنم دیا ہے۔میڈیا رپورٹس کے مطابق آئی وی ایف علاج کے ذریعے کامیابی سے جڑواں بچوں کو جنم دینے کے بعد سفینہ ناموکوا دنیا کی معمر ترین ماؤں میں سے ایک بن گئی ہیں۔ جڑواں بچوں میں ایک لڑکا اور ایک لڑکی ہے جو  کمپالا کے ایک اسپتال میں آئی وی ایف طریقہ کار کے بعد سی سیکشن کے ذریعے ڈلیور  ہوئے۔اس موقع پر اسپتال کے عملے نے انہیں مبارکباد دیتے ہوئے کہا کہ یہ ایک طبی کامیابی سے بڑھ کر ہے؛ یہ انسانی  عزم و ہمت کی طاقت اور  مشکلات سے نمٹنے  کے بارے میں ہے۔واتین کے اسپتال انٹرنیشنل اینڈ فرٹیلیٹی سنٹر (WHI&FC) کے  ڈاکٹر ایڈورڈ تمل سالی نے  میڈیا نمائندوں کو بتایا کہ ماں نے ان وٹرو فرٹیلائزیشن (IVF) کے طریقہ کار کے لیے عطیہ دینے والے بیضے اور اپنے ساتھی کےنطفے  کا استعمال کیا۔ بچے 31 ہفتوں میں قبل از وقت پیدا ہوئے اور انہیں انکیوبیٹرز میں رکھا گیا ہے جہاں ان کی حالت فی الحال مستحکم ہے۔” انہوں نے مزید کہا کہ یہ تاریخی واقعہ، ایک بچہ لڑکا اور لڑکی، نہ صرف IVF میں ہماری دو دہائیوں کی قیادت کی نشان دہی کرتا ہے بلکہ ہمیں افریقہ میں سب سے بڑے  فرٹیلیٹی سینٹر کے طور پر بھی منفرد بناتا ہے ۔واضح رہے کہ تین سالوں میں سفینہ کی یہ دوسری ڈیلیوری ہے۔ انہوں نے اس سے قبل 2020 میں ایک بچی کو جنم دیا تھا۔ خاتون نے بتایا کہ وہ بے اولاد ہونے کا مذاق اڑائے جانے  کے بعد بچے پیدا کرنا چاہتی تھیں۔

اسرائیلی فوج نے جیل میں فلسطینی بچے کیساتھ جنسی زیادتی کی، امریکی عہدیدار

 اسرائیلی فوج نے جیل میں فلسطینی بچے کیساتھ جنسی زیادتی کی، امریکی عہدیدار

 واشنگٹن: امریکی وزارت خارجہ میں سیاسی و فوجی امور کے سابق ڈائریکٹر جوش پال نے انکشاف کیا ہے کہ اسرائیلی جیل میں فلسطینی بچوں کے ساتھ زیادتی کے واقعات بھی رونما ہوئے ہیں۔امریکی نشریاتی ادارے سی این این کو دیئے گئے انٹرویو میں وزارت خارجہ کے عسکری امور کے ڈائریکٹر جوش پال نے اسرائیل کو مہلک ہتھیاروں کی فراہمی پر احتجاجاً مستعفی ہونے سے لے کر فلسطین میں اسرائیلی مظالم پر کھل کر بات کی۔جوش پال نے اپنے استعفے سے متعلق بتایا کہ میرا موقف واضح تھا۔ اگر اسرائیل کو فلسطینیوں کی نسلیں تباہ کرنے کے لیے کھلی چھوٹ دی گئی، اسلحہ فراہم کیا گیا تو ان کی ایک ایسی نئی نسل تیار ہوجائے گی جو امریکا کی سخت دشمن ہوگی اور یہ امریکا کے مفاد میں اچھا نہیں ہوگا۔سی این این کو دیئے گئے انٹرویو میں جوش پال نے ہولناک انکشافات کرتے ہوئے بتایا کہ اسرائیل کے فوجیوں نے جیل میں ایک بچے کو جنسی زیادتی کا نشانہ بنایا اور اس پر آواز اُٹھانے والی بچوں کے تحفظ کی تنظیم پر ہی اسرائیل نے دہشت گرد ادارہ ہونے کا الزام لگا دیا۔جوش پال نے امریکی حکومت کو اسرائیل کی بے جا حمایت اور اسلحے کی فراہمی کو بند کرنے کا مطالبہ کرتے ہوئے کہ آپ آگ سے کھیل رہے ہیں جس کے نتائج اچھے ثابت نہیں ہوں گے۔