Daily Nawa-i-Ajam Lahore: December 2023

Friday, 22 December 2023

2023ء؛ لاہور میں48 لاکھ شہریوں نے ٹریفک قوانین کی خلاف ورزی کی

لاہور: رواں برس (2023ء میں) لاہور کے 48 لاکھ شہریوں نے ٹریفک قوانین کی خلاف ورزی کی ہے۔سی ٹی او لاہور کے مطابق ٹریفک قوانین کی خلاف ورزی کرنے والوں میں موٹر سائیکل سوار سرفہرست ہیں۔ 2023ء میں 22 لاکھ 64 ہزار بغیر ہیلمٹ موٹر سائیکل سواروں کو چالان ٹکٹس جاری کیے گئے جب کہ 5 لاکھ 20 ہزار 927 بغیر لائسنس گاڑی،موٹرسائیکل چلانے پر چالان ٹکٹس جاری کیے گئے۔اس کے علاوہ لین،اسٹاپ لائن اور زیبرا کراسنگ کی خلاف ورزی پر 2 لاکھ 23 ہزار گاڑیوں کے خلاف کارروائی کی گئی۔ غلط پارکنگ کرنے پر ایک لاکھ 20 ہزار وائیلٹرز پکڑے گئے جب کہ لاہوریوں نے 85 ہزار مرتبہ ون وے کی خلاف ورزی بھی کی۔سی ٹی او لاہور عمارہ اطہر کے مطابق ٹریفک بہاؤ میں خلل ڈالنے پر 63 ہزار وہیکلز کےخلاف کارروائی ہوئی۔ ریڈ سگنل کراسنگ پر 39 ہزار، سیٹ بیلٹ نہ باندھنے پر 31 ہزار وہیکلز کےخلاف کارروائی کی گئی۔ دوران ڈرائیونگ موبائل فون کے استعمال پر 48 ہزار، خطرناک انداز میں ڈرائیونگ پر 49 ہزار وہیکلز کےخلاف کارروائی ہوئی جب کہ کالے شیشوں پر 4 ہزار وہیکلز، بغیر اور اپلائیڈ فار 1 لاکھ 36 ہزار وہیکلز کےخلاف کارروائی کی گئی۔حکام کے مطابق کارروائیوں کا مقصد ٹریفک قوانین کی بالادستی اور منظم ٹریفک کو یقینی بنانا ہے۔ چالان کا مقصد ریونیو اکھٹا کرنا نہیں،بلکہ شہریوں کی اصلاح کرنا ہے۔

بی این اے کمانڈر کے ہتھیار ڈالنے پر مریم نواز کا آئی ایس آئی کو خراجِ تحسین

لاہور: پاکستان مسلم لیگ(ن) کی سینئر نائب صدر اور چیف آرگنائزر مریم نواز شریف نے آئی ایس آئی کو خصوصی خراجِ تحسین پیش کیا ہے۔انہوں نے ایکس پر لکھا کہ کالعدم بلوچ نیشنل آرمی (بی این اے) کے سابق کمانڈر سرفراز احمد بنگلزئی کا 70 ساتھیوں سمیت ہتھیار ڈال کر قومی دھارے میں شامل ہونا خوش آئیند اور لائق تحسین ہے۔ان کا کہنا تھا کہ قومی دھارے میں شامل ہوکر آئینی و سیاسی اور جمہوری کردار ہی مسائل کا درست، طویل المدتی حل ہے۔مریم نواز نے مزید کہا کہ گلزار امام شنبے کے بعد سرفراز بنگلزئی اور ان کے ساتھیوں کی قومی دھارے میں واپسی میں کردار ادا کرنے والے قوم کے ہیرو ہیں۔ ہم سب آئی ایس آئی کو خصوصی طور پر خراجِ تحسین پیش کرتے ہیں.

پنجاب میں شدید دھند، موٹروے کو مختلف مقامات سے بند کر دیا گیا

پنجاب میں شدید دھند کے وجہ سے گاڑیوں کی آمد و رفت کیلئے موٹروے کو مختلف مقامات سے بند کر دیا گیا۔ترجمان موٹروے کے مطابق شدید دھند کی وجہ سے موٹروے ایم ٹو کو لاہور سے ہرن مینار تک بند کر دیا گیا جبکہ موٹروے ایم تھری کو سمندری سے درخانہ، موٹروے ایم فور کو شیر شاہ سے فیصل آباد، موٹروے ایم فائیو کو شیر شاہ سے ظاہر پیر اور لاہور سیالکوٹ موٹروے کو بند کر دیا گیا ہے۔ترجمان نے کہا کہ موٹرویز کو عوام کی حفاظت اور محفوظ سفر یقینی بنانے کیلئے بند کیا جاتا ہے، قومی شاہراؤں پر دھند کا دورانیہ موسم سرد ہونے کے ساتھ بڑھ گیا، شہری زیادہ سے زیادہ دن کے اوقات پر سفر کرنے کو ترجیح دیں، صبح 10 سے شام 6 بجے تک دھند کے موسم میں بہترین سفری اوقات ہیں۔ترجمان موٹروے پولیس سید عمران احمد کا مزید کہنا ہے کہ شدید دھند کی وجہ سے غیر ضروری سفر سے گریز کیا جائے، شہری تیز رفتاری سے پرہیز کریں، اگلی گاڑی سے مناسب فاصلہ رکھیں، آگے اور پیچھے دھند والی لائٹس کا استعمال کریں اور معلومات اور مدد کیلئے ہیلپ لائن 130 سے رابطہ کریں۔

بابر، رضوان کو آرام کروانے کے بیان پر محمد حفیظ کا سخت ردعمل

(ویب ڈیسک) قومی ٹیم کے ڈائریکٹر محمد حفیظ کا سابق کپتان بابراعظم اور وکٹ کیپر بیٹر محمد رضوان کو نیوزی لینڈ کے خلاف میچز میں آرام دینے کی بات پر موقف سامنے آگیا۔ٹیم ڈائریکٹر محمد حفیظ نے دوٹوک الفاظ میں کہا کہ محمد رضوان اور بابراعظم نیوزی لینڈ میں ٹی20 میچز کھیلیں گے، مشکل سیریز کے دوران سینئرز کو ہر گز آرام نہیں کرواسکتے۔انہوں نے سلیکشن کمیٹی پر واضح کیا کہ دورہ نیوزی لینڈ کے دوران سینئرز اور جونئیرز کے کمبی نیشن کے ساتھ میدان میں اتریں گے تاکہ ورلڈکپ سے قبل ٹیم ردھم میں آجائے۔محمد حفیظ نے سلیکشن کمیٹی کی میٹنگ میں محمد رضوان اور بابر اعظم کو آرام دینے کی بات بھی رد کرتے ہوئے کہا کہ نئے کھلاڑیوں کو مواقع دینے کے بعد ڈراپ نہیں کریں گے۔قبل ازیں گزشتہ دنوں چیف سلیکٹر وہاب ریاض نے کیویز کے خلاف ٹی20 سیریز میں تجربات کرنے کا ذکر کرتے ہوئے کہا تھا کہ ڈومیسٹک کرکٹ میں صاحبزادہ فرحان بطور اوپنر کھیلتے رہے ہیں، اگر وہ دورہ نیوزی لینڈ کے دوران اچھی پرفارمنس کا مظاہرہ کرتے ہیں تو وہ اوپن کرسکتے ہیں۔جس سے تاثر جارہا تھا کہ بابراعظم کو دورہ نیوزی لینڈ کے دوران آرام کروایا جاسکتا ہے تاہم ٹیم ڈائریکٹر نے موقف واضح کیا۔

پنجاب حکومت نے ماحول دوست الیکٹرک رکشہ متعارف کروادیا

(ویب ڈیسک) ماحولیاتی آلودگی پر قابو پانے کے لیے پنجاب حکومت نے الیکٹرک رکشہ متعارف کروادیا۔پنجاب حکومت کی جانب سے لاہور میں الیکٹرک رکشے متعارف کرائے گئے جن کو محکمہ ٹرانسپورٹ اور ایک مقامی نجی کمپنی کے اشتراک سے تیار کیا گیا ہے، سیکرٹری ٹرانسپورٹ پنجاب احمد جاوید قاضی کی سربراہی میں ایک اجلاس میں الیکٹرک رکشے کو متعارف کرایا گیا۔اس موقع پر سیکرٹری ٹرانسپورٹ نے ماہرین کے ساتھ الیکٹرک رکشہ چلانے کا تجربہ بھی کیا اور کہا کہ الیکٹرک رکشوں سے فضائی اور آواز کی آلودگی کی شرح میں نمایاں کمی آئے گی۔یہ الیکٹرک رکشے سنگل چارج پر 150 کلومیٹر تک سفر کر سکتے ہیں جس سے ایندھن کے اخراجات بچانے میں مدد ملے گی۔

چیئرپرسن چائلڈ پروٹیکشن اینڈ ویلفیئر بیورو سارہ احمد آئی پی پی میں شامل

استحکام پاکستان پارٹی میں اہم سیاسی و سماجی رہنماؤں کی شمولیت کا سلسلہ جاری ہے۔پیٹرن انچیف استحکام پاکستان پارٹی جہانگیر خان ترین سے چیئرپرسن چائلڈ پروٹیکشن اینڈ ویلفیئر بیورو سارہ احمد نے ملاقات کی ،ملاقات کے دوران سارہ احمد نے استحکام پاکستان پارٹی میں شمولیت کا اعلان کیا۔جہانگیر خان ترین نے پارٹی مفلر پہنا کر سارہ احمد کو پارٹی میں خوش آمدید کہا، ملاقات میں ایڈیشنل سیکرٹری جنرل عون چودھری، نعمان لنگڑیال بھی موجود تھے۔

چیئرمین پی ٹی آئی کا لیول پلیئنگ فیلڈ نہ ملنے پر سپریم کورٹ سے رجوع

(ویب ڈیسک) چیئرمین پی ٹی آئی نے لیول پلیئنگ فیلڈ نہ ملنے پر سپریم کورٹ سے رجوع کرلیا۔چیئرمین پی ٹی آئی بیرسٹر گوہر خان نے سپریم کورٹ میں درخواست دائر کر دی، درخواست میں وفاق، الیکشن کمیشن اور چاروں صوبائی حکومتوں کو فریق بنایا گیا ہے، درخواست آئین کے آرٹیکل 184(3) کے تحت دائر کی گئی ہے۔درخواست میں مؤقف اختیار کیا گیا کہ تحریک انصاف کے امیدواروں سے کاغذات نامزدگی چھینے جا رہے ہیں، تحریک انصاف کے امیدواروں کو ہراساں کیا جا رہا ہے، تحریک انصاف کو انتخابات میں حصہ لینے کا مساوی حق دیا جائے۔درخواست میں استدعا کی گئی کہ سپریم کورٹ تحریک انصاف کو لیول پلیئنگ فیلڈ اور شفاف انتخابات کیلئے فریقین کو ہدایات جاری کرے، فریقین کو تحریک انصاف کے کارکنوں اور رہنماؤں کو ہراساں کرنے سے بھی روکا جائے۔

اسمبلیوں میں صرف جاگیردار،مزدور کا خیال کرنے والا کوئی نہیں:سراج الحق

امیر جماعت اسلامی سراج الحق نے کہا ہے کہ اسمبلیوں اور سینیٹ میں صرف جاگیردار ہیں ، مزدور اور غریب کا خیال کرنے والا کوئی نہیں۔امیر جماعتِ اسلامی سراج الحق نے مزدور کنونشن سے خطاب کرتے ہوئے کہا کہ پاکستان کا مزدور لاوارث نہیں ہے، ہماری پوری ٹیم آپ کے ساتھ ہے،مزدور پاکستان کی جان اور عزت ہے مگر ریاست اور پاکستان کا نظام ایسا ہے کہ مزدور سے کام تو لیا جاتا ہے لیکن مزدور کے گھر والوں کا خیال نہیں رکھا جاتا،پاکستان میں اس وقت کوئی ادارہ ایسا نہیں ہے جو مزدور کے بارے میں کچھ سوچ رہا ہو۔ان کا کہنا تھا کہ ہماری اسمبلیوں اور سینیٹ میں صرف جاگیردار بیٹھا ہے،یہاں جو نظام ہے اس میں ہر حکومت میں ایک جیسے لوگ ہی نظر آتے ہیں، ریلوے میں مزدوروں کی بہت ساری آسامیاں خالی ہیں، جو مزدور مر چکے ہیں ان کے بچوں کو ملازمت ملنی چاہئے، لیکن یہ لوگ وہ اسامیاں ختم کر دیتے ہیں۔امیر جماعت اسلامی کا کہنا تھا کہ مسلم لیگ ن، پی پی پی اور پی ٹی آئی نے مل کر ریلوے کو تباہ کیا، ان لوگوں نے سو میں سے پچاس ٹرینیں بند کیں اور اب صرف پچاس ٹرینیں ہی چل رہی ہیں،ان لوگوں نے ریلوے ٹریک کا لوہا بیچا اور پیسہ کھایا،جب تک یہ لوگ بیٹھے ہیں مزدور ترقی نہیں کرے گا، صرف سرمایہ کار اور جاگیردار ہی ترقی کرے گا۔انہوں نے کہا کہ پاکستان میں اگر آج ڈھائی کروڑ بچہ تعلیم سے دور ہے اور سات کروڑ سے زائد نوجوان روزگار سے محروم ہیں تو اس کی وجہ مسلم لیگ ن، پی پی پی اور پی ٹی آئی ہیں، ریلوے کی ناکامی کی وجہ اس کا مزدور نہیں بلکہ اس کی کرپٹ مینجمنٹ ہے،اگر وزیر خزانہ کی تنخواہ میں تاخیر ہوتی ہے تو یہ مزدور بھی انتظار کرلیں گے۔سراج الحق نے مزید کہا کہ حکومت مزدوروں کا خیال نہیں رکھتی، جن لوگوں کو آپ اپنی بات سنانا چاہتے ہیں وہ اندھے اور بہرے ہیں، آپ لوگ باہر ہیں اندر کوئی اور فیصلے کررہا ہے، پاکستان میں کچھ گھرانے ملک کے تمام وسائل کو کنٹرول کررہے ہیں، جماعت اسلامی ہی پاکستان کے ریلوے نظام کو بہتر کر سکتی ہے۔

اقلیتیں ملک کا قیمتی اثاثہ، ان کے بغیر پاکستان نامکمل ہے: نوازشریف

پاکستان مسلم لیگ ن کے قائد و سابق وزیراعظم نوازشریف نے کہا ہے کہ اقلیتیں ملک کا قیمتی اثاثہ ہیں ان کے بغیر پاکستان نامکمل ہے۔

پارٹی کے اقلیتی رہنماؤں سے خطاب کرتے ہوئے سابق وزیراعظم نواز شریف کا کہنا تھا کہ ملک وقوم کےلیےخدمات پراقلیتی برادری کوسلام پیش کرتا ہوں، مسیحی برادری کوکرسمس کی مبارکباد پیش کرتا ہوں، میرے لیےسب برابرہیں۔انہوں نے کہا کہ مسلم لیگ(ن) میں روز بروز اقلیتی برادری کا اضافہ ہو رہا ہے، پاکستان ایک گلدستہ ہے اور اس کومل کرسجائیں گے، پاکستان اقلیتوں کےبغیرمکمل نہیں، اقلیتی برادری نےملک کےلیےبہت قربانیاں دیں، میں اقلیت سے ایسے فوجیوں کو بھی جانتا ہوں جنہوں نے وطن کیلئے قربانیاں دیں۔قائد ن لیگ کا کہنا تھا کہ اقلیتیں پاکستان کا قیمتی اثاثہ ہیں، قائد اعظم کے کئی ساتھی ہندو اور کرسچن برادری سے تعلق رکھتے تھے، اقلیتی برادری نے پاکستان بنانے میں قائداعظم کا ساتھ دیا، ہم سب ایک ہی ملک کے باشندے ہیں، ہمیں اقلیتوں کی حوصلہ افزائی کرنی چاہیے تاکہ وہ بھی آگے بڑھیں۔

سابق چیف جسٹس ثاقب نثار کے گھر پر دستی بم حملہ، 2 پولیس اہلکار زخمی

سابق چیف جسٹس ثاقب نثار کے گھر پر دستی بم سے حملہ ہوا، حملے میں دو پولیس اہلکار زخمی ہو گئے۔رپورٹ کےمطابق واقعہ کی تفصیل بتاتے ہوئے سابق چیف جسٹس ثاقب نثار نے کہا کہ ہم لوگ اندر بیٹھے تھے تو زوردار دھماکہ ہوا، جیسے باہر آئے تو پولیس اہلکار زخمی پڑے تھے۔سابق چیف جسٹس ثاقب نثار نے بتایا کہ وقوعہ کے بعد پولیس افسران موقع پر پہنچ گئے، پولیس تفتیش کر رہی ہے کہ حملہ کرنے والے کون تھے؟پولیس کے مطابق سابق چیف جسٹس کے اہل خانہ مکمل طور پر محفوظ ہیں، پولیس کانسٹیبل عامر اور کانسٹیبل خرم معمولی زخمی ہوئے، زخمی ہونے والے دونوں سکیورٹی اہلکاروں کو طبی امداد کے لیے ہسپتال منتقل کر دیا گیا، دھماکے سے علاقے میں خوف و ہراس پھیل گیا۔پولیس کا کہنا ہے کہ ابتدائی معلومات کے مطابق موٹرسائیکل سوار ملزمان کریکر پھینک کر فرار ہوئے، دھماکے سے گھر کی کھڑکیوں کے شیشے ٹوٹ گئے ہیں۔ذرائع پولیس کے مطابق بم ڈسپوزل سکواڈ، سی ٹی ڈی اور پولیس کی بھاری نفری موقع پر پہنچ گئی، دھماکے کی نوعیت کا پتہ چلایا جا رہا ہے، سی سی ٹی وی فوٹیج کی مدد سے ملزمان تک پہنچنے کی کوشش کی جائے گی۔آئی جی پنجاب ڈاکٹر عثمان انور نے سابق چیف جسٹس کی رہائش گاہ پر دھماکے کا نوٹس لیتے ہوئے سی سی پی او لاہور سے رپورٹ طلب کر لی۔پولیس حکام کے مطابق سی سی پی او لاہور بلال صدیق کمیانہ، ڈی آئی جی آپریشنز لاہور، ایس ایس پی آپریشنز سمیت سینئر پولیس افسران موقع پر موجود ہیں۔

الیکشن کا انعقاد ضرور ہوگا، نتائج سے متعلق کچھ نہیں کہا جا سکتا، نگراں وزیراعظم

کوئٹہ: نگراں وزیراعظم انوار الحق کاکڑ نے کہا ہے کہ الیکشن ضرور منعقد ہوں گے ، تاہم ان کے نتائج سے متعلق کچھ نہیں کہا جا سکتا۔بلوچستان کے صوبائی دارالحکومت میں میڈیا سے گفتگو کرتے ہوئے نگراں وزیراعظم انوار الحق کاکڑ کا کہنا تھا کہ ملک میں الیکشن صاف، شفاف اور منصفانہ ہوں گے، تاہم ان کے نتیجے سے متعلق کچھ نہیں کہا جا سکتا۔انہوں نے کہا کہ حکومت کی غیرقانونی تارکین وطن کےحوالے سےپالیسی میں تبدیلی نہیں ہوگی۔ قوم پرست سمجھتے ہیں کہ تمام چیزیں ان کی نظر سے دیکھی جائیں۔ قوم پرست ہرچیزکواپنی نظرسےدیکھتےہیں۔ بلوچستان میں لوگ کہتےہیں شفاف انتخابات نہیں ہوئے۔ وزیراعظم نے واضح کیا کہ عام انتخابات2024 صاف اورشفاف ہوں گے۔وزیراعظم کا کہنا تھا کہ اگر ہم انتخابات کا انعقاد نہ کرواتے تو داغ ہوتا، ہم انتخابات ضرور کروائیں گے اور الیکشن کمیشن انتخابات منعقد کرے گا، اس کے نتائج پر کچھ نہیں کہا جا سکتا۔ انہوں نے کہا کہ سیاسی جماعتوں کو اپنے ووٹرز کو کچھ نہ کچھ تو کہنا ہے۔ لسبیلہ میں جام کے مقابلے پر اگر کوئی غیر معروف شخصیت انتخابات میں کامیاب ہو جائے تو یہ بڑی بات ہوگی۔ وزیراعظم کا کہنا تھا کہ بلوچستان عوامی پارٹی (باپ) میں الیکٹیبلز تھے جو اکٹھے ہوئے تھے، صرف نام نیا تھا۔انہوں نے کہا کہ انتخابات کا انعقاد ایک نارمل پراسس ہے اور یہ شفاف اور منصفانہ ہوں گے۔ انتخابات کے دوران سکیورٹی بھی ان شا اللہ اچھی ہوگی۔ وزیراعظم نے بتایا کہ سوئی گیس میں صرف بلوچستان کو استثنا دیا گیا ہے۔ ہمارے پاس نئے منصوبوں کا مینڈیٹ نہیں۔ سب دن گنتے ہیں کہ کاکڑ کب جائے گا۔ انہوں نے کہا کہ ہم اور آپ سب کے درمیان احترام کا رشتہ ہے، کسی پر طنز کرنا مناسب بات نہیں۔

بھٹو کے قاتل ہائیکورٹ اور سپریم کورٹ کے جج صاحبان تھے، بلاول بھٹو

لاہور: پیپلز پارٹی کے چیئرمین بلاول بھٹو کا کہنا ہے کہ ذوالفقار علی بھٹو کے قاتل ہائیکورٹ اور سپریم کورٹ کے جج صاحبان تھے لیکن آج کے بعد کوئی بھی وزیر اعظم بنے ان کے ساتھ ایسا سلوک نہیں کیا جائے گا۔لاہور ہائیکورٹ کے جاوید اقبال آڈیٹوریم میں پاکستان کے آئین بننے کی 50 سالہ تقریب سے خطاب کرتے ہوئے بلاول بھٹو زرداری کا کہنا تھا کہ کہا جاتا ہے کہ عدالت میں انصاف کے لیے آیا جاتا ہے لیکن آج تک اس لاہور ہائیکورٹ کو کرائم سین کے طور پر ہی دیکھا جاتا رہا ہے۔انہوں نے کہا کہ وہ لیڈر جو مسلم اُمّہ کا ترجمان تھا وہ اسی لاہور میں تھا۔ اسی نے سمجھایا کہ جو آپ کے پاس تیل ہے وہ ناصرف کمائی کا ذریعہ ہے بلکہ طاقت ہے۔ فلسطین میں ہمارے بہن بھائیوں کے ساتھ ظلم ہو رہا ہے تب بھی ظلم ہوتا تھا لیکن اس وقت لیڈر بھٹو تھا، انہوں نے فیصلہ کیا تھا کہ جب تک فلسطینوں کے ساتھ ظلم ہوگا تب تک آپ کو تیل نہیں دیں گے۔لاول بھٹو نے کہا کہ ہم امید رکھتے ہیں عدالتوں سے کہ اتنے سال گزرنے کے بعد نا صرف قانون کے مطابق غلطی کو درست کریں گے بلکہ تاریخ کو بھی درست کریں گے، جج صاحبان اپنے جج صاحبان کے خون کے داغ دھوئیں گے۔انہوں نے کہا کہ پاکستان میں اس وقت سیاست میں پولورائزیشن چل رہی ہے، کچھ دیر پہلے جب آپ نعرے لگا رہے تھے تو پیچھے سے پی ٹی آئی کے نعرے لگے، ہم نے سیاست کو ذاتی دشمنی بنا لیا ہے اور خان صاحب کا اس میں سب سے زیادہ کردار ہے۔چیئرمین پی پی کا کہنا تھا کہ میں زبردستی جیے بھٹو کے نعرے نہیں لگواؤں گا بس چاہتا ہوں کہ آپ مانیں کہ میں بھی محب وطن پاکستانی ہوں، میں آپ کے سیاسی لیڈر سے اختلاف کرسکتا ہوں لیکن ان کی میں عزت کرتا ہوں۔

گالی کی سیاست ختم کریں، سیاستدان ایک دوسرےکے دشمن نہ بنیں: بلاول بھٹو

پاکستان پیپلزپارٹی کے چیئرمین و سابق وزیر خارجہ بلاول بھٹو نے کہا ہے کہ ایک دوسرےکوگالی دینےکی سیاست ختم ہونی چاہیے،سیاستدان سیاست کریں ،ایک دوسرے کےدشمن نہ بنیں۔لاہور ہائی کورٹ بار سے خطاب کرتے ہوئے بلاول بھٹو کا کہنا تھا کہ ایک بار پھر موقع دینے پر لاہورہائی کورٹ بار کا شکرگزار ہوں، کہا جاتا ہے کہ جو قاتل ہوتا ہے وہ ہمیشہ جائے وقوعہ پر واپس لوٹتا ہے مگر اس لاہور ہائی کورٹ میں ہماری 2 مظلوم، متاثرہ نسلیں انصاف مانگنے کے لیے آتی رہی ہیں۔ان کا کہنا تھا کہ میں جسٹس قاضی فائز عیسی سمیت تمام جج صاحبان کا شکر گزار ہوں کہ صدر زرداری کے 12 سال پہلے بھیجے گئے ریفرنس پر سماعت ہورہی ہے اور امید ہے کہ اتنے سال بعد قائد عوام کو انصاف ملے گا۔چیئرمین پیپلز پارٹی نے کہا کہ جج صاحبان اپنے فیصلوں سے وہ داغ دھوئیں گے صرف اس لیے نہیں کہ وہ مجھے، میرے خاندان اور میرے کارکنان کو انصاف دیں گے بلکہ اس لیے کہ وہ ایک اور پتھر پر لکیر کھینچے گے کہ آج کے بعد کسی وزیر اعظم کے ساتھ یہ سلوک نہیں ہونا چاہیے۔ان کا کہنا تھا کہ ہم نے اس ملک میں سیاست کو ذاتی دشمنی میں تبدیل کردیا ہے، بانی پی ٹی آئی کا اس ذاتی دشمنی میں سب سے بڑا کردار تھا، بانی پی ٹی آئی کہتے تھے کسی سے بات نہیں کروں گا، وہ کہتے تھے خودکشی کرلوں گا چوروں سے بات نہیں کروں گا، شاید اس وقت وہ جو دوسروں پر چوروں کا الزام لگاتے تھے وہ غلط تھا۔بلاول بھٹو نے کہا کہ ہمیں یہ بخار توڑنا ہوگا ، ایک دوسرے کو گالی دیکر کہتے ہیں کہ ہم سیاست کررہے ہیں، ایک دوسرے کو جیل بھیج کر کہتے ہیں کہ ہم سیاست کررہے ہیں، ایک دوسرے کو جیل بھیجنا سیاست نہیں ناکامی ہے، ایک دوسرے کو گالی دینا شکست ہے، ہم نے جب کہا ہم بھی اپنے دائرے میں رہ کر سیاست کریں اور دوسرے بھی تو ہمیں کہا گیا مک مکا ہے۔سابق وزیر خارجہ کا کہنا تھا کہ ہمیں پرانی روایتی سیاست کو دفن کرنا ہوگا، ہم روایتی سیاست کرکے دوسرے ادارے کو بھی دائرے میں لاسکتے ہیں، پرانی سیاست کریں گے تو جو بھی وزیراعظم بنے گا ملک نہیں چلے گا، حکومت میں آکر کوئی خود کو امیر بنانا چاہتا ہے اور کوئی ٹائیگر فورس بنانا چاہتا ہے، نوجوانوں سے پوچھتا ہوں 50سال بعد کونسا پاکستان چاہتے ہیں؟۔انہوں نے مزید کہا کہ ہم آج شدیدمعاشی بحران سے گزر رہے ہیں، بانی پی ٹی آئی کے فیصلوں کے باعث معاشی بحران ہے، بعد میں آنے والی معاشی ٹیم بھی بحران پر قابو نہیں پاسکی، یہ آپکا ،میرا اور سب کا ملک ہے، آئیں ملکر ملک کی ترقی میں اپنا حصہ ڈالیں، آج نہیں تو کل ہم مشکل سے ضرور نکلیں گے، جو وعدے قائدعوام نے کیے وہ ملکر پورے کریں گے۔

عام انتخابات: ضلع لاہور میں مختلف محکموں سے 132 افسران الیکشن ڈیوٹی کا حصہ ہوں گے

عام انتخابات کے لئے تیاریاں جاری ہیں۔ ضلع لاہور میں مختلف محکموں سے 132 افسران الیکشن ڈیوٹی کا حصہ ہوں گے۔شہرلاہور کے 14 قومی اور 30 صوبائی حلقوں میں ریٹرننگ افسران تعینات ہونگے۔ 88اسسٹنٹ ریٹرننگ افسران 44 حلقوں میں ڈیوٹی دیں گے۔ ڈی سی لاہور و ڈسٹرکٹ ریٹرننگ آفیسر رافعہ حیدر نے افسران کا اہم اجلاس بلا لیا۔این اے 117 میں شاہد امجد ملک کو ریٹرننگ آفیسر جبکہ محمد زاہد میاں اور ممتاز خان کو اسسٹنٹ ریٹرننگ آفیسرز تعینات کیا گیا۔ این اے 130 میں محمد اصغر کو آر او جبکہ ریاض الدین اور حسیب الرحمن کو اے آر اوز لگایا گیا ہے۔لاہور کے صوبائی حلقہ پی پی 145 میں محمد حفیظ کو ریٹرننگ آفیسر جبکہ نیئر اقبال اور عثمان اکرم کو اے آر اوز تعینات کیا گیا۔ پی پی 174 میں میر محمد نواز کو آر او جبکہ سید شاہد علی اور انعم چودھری کو اے آر اوز لگایا گیا ہے۔ اسی طرح شہر کے دیگر قومی اور صوبائی حلقوں میں بھی ریٹرننگ آفیسر اور اسسٹنٹ ریٹرننگ آفیسرز مقرر کئے گئے ہیں۔ڈپٹی کمشنر و ڈسٹرکٹ ریٹرننگ آفیسر رافعہ حیدر کا کہنا ہے کہ ریٹرننگ آفیسرز اور اسسٹنٹ ریٹرننگ آفیسرز کی عام انتخابات سے قبل تربیتی ورکشاپ کرائی جائے گی۔

پنجاب حکومت کا یواے ای کو ہائی پروٹین چارہ ایکسپورٹ کرنے کافیصلہ

پنجاب حکومت نے متحدہ عرب امارات کو ہائی پروٹین چارہ ایکسپورٹ کرنے کا فیصلہ کیا ہے۔نگران وزیراعلیٰ پنجاب محسن نقوی کی زیر صدارت خصوصی اجلاس ہوا جس میں لائیوسٹاک ڈویلپمنٹ کے لئےہائی پروٹین"الفاالفا" چارے کی کاشت بڑھانے کے لئے اقدامات کی منظوری دی گئی ہائی پروٹین چارے کو سائنٹیفک طریقے سے خشک کرکے محفوظ کیا جائیگا۔اجلاس کے دوران "الفا الفا" چارے کی کاشت کے لئے فارمرز کو بیج مہیا کرنے کےلئے اقدامات پر بھی غور کیا گیا، ڈیری ڈویلپمنٹ کے لئے "بریڈان سیمی نیشن"کے لئے مختلف تجاویز پر بھی غور کیا گیا۔دوران اجلاس بریفنگ میں بتایا گیا کہ پنجاب میں ڈیزیز فری کمپارٹمنٹ کے قیام کے حوصلہ افزاء نتائج سامنے آرہے ہیں، لائیوسٹاک ڈویلپمنٹ کے لئے مقامی سطح پرجدید ٹیکنالوجی اور مہارت کا استعمال ضروری ہے، مقامی فارمز کو ماڈل فارمنگ تکنیک کی طرف راغب کرنا ہوگا۔اس موقع پر گفتگو کرتے ہوئے وزیراعلیٰ محسن نقوی کا کہنا تھا کہ ہائی پروٹین چارے کی پیداوار بڑھانے کے لئے سرگودھا میں فوڈ ریسرچ سنٹر کو پوری طرح فعال کیا جائے، بیف اور مٹن کی ایکسپورٹ بڑھا نے کا بھرپور پوٹینشل استعمال کرنے کی ضرورت ہے، متحدہ عرب امارات کے دورے کے دوران ہائی پروٹین چارے کی ایکسپورٹ پر بات چیت کی گئی۔صوبائی وزیر ابراہیم حسن مراد، چیئرمین پلاننگ اینڈ ڈویلپمنٹ بورڈ، سیکرٹری زراعت، سیکرٹری وائلڈ لائف، سیکرٹری لائیوسٹاک، سیکرٹری ٹرانسپورٹ اور دیگر حکام اجلاس میں شریک تھے۔

دورہ نیوزی لینڈ کیلئے ٹی 20 سکواڈ کا اعلان، متعدد نئے چہرے شامل

نیوزی لینڈ میں کھیلے جانے والے ٹی 20 سیریز کیلئے قومی سکواڈ کا اعلان کر دیا گیا۔چیف سلیکٹر وہاب ریاض نے پریس کانفرنس کرتے ہوئے کہا پاکستانی ٹی 20 سکواڈ میں 17 پلیئرز جائیں گے، شاداب خان اور محمد حارث کو اس ٹی 20 سیریز میں ریسٹ کرایا ہے، صائم ایوب، افتخار احمد ، محمد نواز، بابراعظم، محمد رضوان اور فخر زمان سکواڈ میں شامل ہیں۔انہوں نے کہا شاداب خان اہم کھلاڑی ہیں، بدقسمتی سے انجری کا شکار ہیں، وسیم جونیئر ،زمان خان ،عامر جمال بھی سکواڈ میں شامل ہیں۔ اس کے ساتھ ساتھ اعظم خان، عباس آفریدی، محمد نواز، ابرار احمد، اسامہ میر، حارث رؤف، وسیم جونیئر اور حسیب اللہ خان بھی سکواڈ کا حصہ ہیں، شاہین شاہ آفریدی ٹی 20 ٹیم کی قیادت کریں گے۔چیف سلیکٹر وہاب ریاض نے کہا ہمارا کام ہے ڈائریکٹر اور کپتان کو ٹیم دستیاب کرنا، ہمارے پاس صاحبزادہ فرحان جیسا اوپنر ہے، خوشی کی بات ہے کہ محمد حسنین اور نسیم شاہ فٹ ہو رہے ہیں، پی ایس ایل تک محمد حسنین اور نسیم شاہ دستیاب ہوں گے، اعظم خان ابھی ٹیم کے ساتھ جائیں گے، ہم نے نمبر 6 تک سب کو ٹرائی کر لیا ہے، ہم اب چاہتے ہیں کہ اعظم خان کو بھی موقع دیں۔انہوں نے مزید کہا ہم کم وقت میں ہر پلیئر کو موقع نہیں دے سکتے، شان مسعود کو اس ٹی 20 سیریز کیلئے موقع نہیں دے رہے، ہم نئے لڑکوں کو آزما رہے ہیں کہ وہ کیا کر سکتے ہیں، پلیئر بھی اسی طرح سے پرفارم کریں، ہمیں اگر شعیب ملک یا احمد شہزاد کی ضرورت ہو گی تو ضرور غور کریں گے۔اس موقع پر کامران اکمل کا کہنا تھا وائٹ بال کرکٹ میں یہ پہلی سلیکشن ہے، اب ہمیں ڈومیسٹک کیلئے بھی حکمت عملی بنانی پڑے گی، ہمیں وائٹ بال کے پرفارمر کو موقع دینا پڑے گا، انہوں نے کہا عمر اکمل ٹیم میں میری وجہ سے نہیں کارکردگی پر آئے گا، عمر اکمل ڈومیسٹک میں پرفارمنس دے تو غور کیا جا سکتا ہے۔

فعال جموریت ملک میں معاشی استحکام لاتی ہے، نگران وزیراعظم

نگران وزیر اعظم انوار الحق کاکڑ کا کہنا ہے کہ فعال جمہوریت ہی ملک میں معاشی استحکام لاتی ہے جب کہ اس وقت پاکستان میں معاشی ترقی کے بے پناہ مواقع موجود ہیں۔نگران وزیر اعظم نے امید ظاہر کی کہ آئندہ 10 برس میں چین سمیت دیگر ممالک کے ساتھ 36 ٹریلین ڈالر کی تجارت متوقع ہے۔ڈان نیوز کے مطابق کوئٹہ میں بلوچستان کی مختلف یونیورسٹیز کے طلبہ سے خطاب کرتے ہوئے انوارالحق کاکڑ نے کہا کہ پاکستان کا مستقبل روشن ہے کیوں کہ ملک کی آبادی کا 65 فیصد حصہ نوجوانوں پر مشتمل ہے اور نوجوان ملک کا قیمتی سرمایہ ہیں۔ان کا کہنا تھا کہ اس وقت ملک میں معاشی ترقی کے بے پناہ مواقع موجود ہیں لیکن ٹیکس جمع کرنا اور اس کا مؤثر انداز میں استعمال ضروری ہے۔انوار الحق کاکڑ کا کہنا تھا کہ ملکی ترقی کے لیے ہمیں اسکولوں کی داخلے کی شرح کو بڑھانا ہوگا، ہم سب کو ذمہ دار شہری کا کردار ادا کرتے رہنا چاہیے۔انہوں نے بلوچستان کے طلبہ سے بات کرتے ہوئے کہا کہ انہیں صوبے کے طلبہ سے بات کرکے بےحد خوشی ہو رہی ہے کیوں کہ نوجوان ملکی ترقی کی راہیں متعین کریں گے۔ایک سوال کے جواب میں نگران وزیر اعظم کا کہنا تھا کہ حکومت، میڈیا کے اظہار رائے کی آزادی کی مخالف نہیں لیکن ہر چیز کا طریقہ کار ہوتا ہے، ہر بات کے اصول ہوتے ہیں اور حکومت نے میڈیا کی اظہار رائے کی آزادی کے قوانین بنا رکھے ہیں اور ہم سب نے قوانین کے تحت نظام کو چلانا ہے۔انہوں نے کہا کہ حکومت جب بھی سمجھتی ہے کہ میڈیا میں اظہار رائے کی آزادی کے حوالے سے قوانین کی خلاف ورزی کی جا رہی ہے تو ایکشن لیاجاتا ہے۔

9 مئی کے مقدمات، حماد اظہر سمیت 7 ملزمان کو اشتہاری قرار دینے کی کارروائی شروع

لاہور کی انسدادِ دہشت گردی عدالت نے 9 مئی جلاؤ گھیراؤ مقدمے میں پاکستان تحریک انصاف کے رہنما حماد اظہر سمیت 7 ملزمان کو اشتہاری قرار دینے کی کارروائی کا آغاز کردیا۔انسدادِ دہشت گردی عدالت کی جج عبہر گل نے پولیس کی درخواست پر سماعت کی، پولیس نے مؤقف اپنایا کہ ملزمان کی گرفتاری کے لیے چھاپے مار ے گئے لیکن وہ روپوش ہیں، ملزمان کو اشتہاری قرار دینے کی کارروائی شروع کی جائے۔بعد ازاں عدالت نے اسلم اقبال، حماد اظہر، ثمر معشوق، عدنان، قاسم، فیاض انور اور ملک حیدر کو اشتہاری قرار دینے کی کارروائی کا آغاز کردیا۔واضح رہے کہ 9 مئی کو سابق وزیراعظم عمران خان کی گرفتاری کے بعد ملک بھر میں پُرتشدد فسادات کے نتیجے میں نمایاں بدامنی دیکھی گئی تھی، اور لاہور کے راحت بیکری چوک پر پولیس کی گاڑیوں کو نذر آتش بھی کیا گیا۔بعد ازاں سرور روڈ پولیس نے پی ٹی آئی کے متعدد رہنماؤں کے خلاف مقدمہ درج کیا تھا۔

سینیٹ کمیٹی میں جعلی نوٹ پیش، ڈپٹی گورنر اسٹیٹ بینک بھی نہ پہچان سکے

سینیٹ کی قائمہ کمیٹی کے اجلاس میں 5 ہزار روپے کے جعلی نوٹ پیش کیے گئے جنہیں اصل نوٹوں سے ہوبہو مشابہت کی وجہ سے ڈپٹی گورنر اسٹیٹ بینک بھی پہچاننے سے قاصر نظر آئے۔پاکستان پیپلز پارٹی (پی پی پی) کے سینیٹر سلیم مانڈوی والا کی زیر صدارت سینیٹ کی قائمہ کمیٹی برائے خزانہ کا اجلاس ہوا۔اجلاس میں چیئرمین کمیٹی سلیم مانڈوی والا نے 5 ہزار روپے کے جعلی نوٹ پیش کیے اور ساتھ ہی اجلاس میں موجود ڈپٹی گورنر اسٹیٹ بینک سے سوال کیا کہ آپ بتا سکتے ہیں کہ یہ اصل ہیں یا نقل۔جعلی نوٹوں کی اصل نوٹ سے اس قدر مشابہت تھی کہ ڈپٹی گورنر اسٹیٹ بینک بھی انہیں نہ پہچان سکے۔چیئرمین کمیٹی نے کہا کہ 5 ہزار روپے کا جعلی نوٹ اگر مجھے مل سکتا ہے تو عام آدمی کا کیا بنے گا، جعلی کرنسی کا استعمال بڑھ رہا ہے، بینکوں کے ذریعے جعلی نوٹ پھیل رہے ہیں۔انہوں نے کہا کہ جعلی نوٹ بینکوں کے سسٹم میں موجود ہیں۔سلیم مانڈوی والا نے ڈپٹی گورنر اسٹیٹ بینک کو ہدایت کی کہ جعلی کرنسی کے حوالے سے ایک پالیسی بنائیں۔ان کا کہنا تھا کہ عام آدمی اس صورتحال میں کس کے پاس جائے، میرے پاس ایک ہزار روپے کے بیسیوں جعلی نوٹ ہیں۔کمیٹی کے اراکین نے کہا کہ ڈی جی ایف آئی اے کو طلب کر کے بریفنگ لی جائے۔ڈپٹی گورنر اسٹیٹ بینک نے ارکان کو آئندہ اجلاس میں اس معاملے پر تفصیلی بریفنگ دینے کی یقین دہانی کرادی۔

سپریم کورٹ کے فیصلے کے بعد انتخابات سے فرار کی تمام سازشیں دم توڑ گئیں، چوہدری شجاعت

چوہدری شجاعت نے کہا انتخابات آزادانہ، منصفانہ اور قابل اعتماد ہونا انتہائی ضروری ہیں —مسلم لیگ (ق) کے صدر چوہدری شجاعت حسین نے کہا ہے کہ سپریم کورٹ کے فیصلے کے بعد انتخابات سے فرار کی تمام سازشیں دم توڑ گئیں۔چوہدری شجاعت حسین نے سندھ کے اعلیٰ سطح کے اجلاس کے خطاب میں کہا کہ انتخابات آزادانہ، منصفانہ اور قابل اعتماد ہونا انتہائی ضروری ہیں۔انہوں نے کہا کہ ملک کا سیاسی و معاشی مستقبل عام انتخابات سے وابستہ ہے جبکہ تمام سیاسی جماعتوں کو انتخابات میں حصہ لینے کے یکساں مواقع ملنے چاہئیں۔ان کا کہنا تھا ملکی مستقبل کا فیصلہ عوام کو کرنا ہے، عوام روایتی سیاستدانوں کے بجائے شعور کو ووٹ دیں۔شجاعت حسین نے پارٹی عہدیداران کو سیاسی سرگرمیاں اور رابطہ مہم بڑھانے کی ہدایت کی۔واضح رہے کہ گزشتہ ہفتے لاہور ہائی کورٹ نے عدلیہ سے ریٹرننگ افسران اور ڈسٹرکٹ ریٹرننگ افسران کی تعیناتی کے الیکشن کمیشن کے فیصلے کو معطل کردیا تھا جس سے انتخابات کے التوا کے خدشات پیدا ہو گئے ہے۔لاہور ہائی کورٹ کے فیصلے کے خلاف الیکشن کمیشن نے اپیل دائر کی تھی جس پر سپریم کورٹ نے جمعہ کو سماعت کی۔سماعت شام دیر گئے شروع ہوئی جس کے حکم میں عدالت عظمیٰ نے لاہور ہائی کورٹ کے فیصلے کو معطل کر دیا تھا اور انتخابی ادارے کو فوری طور پر انتخابی شیڈول جاری کرنے کی ہدایت کی تھی۔

Monday, 18 December 2023

غیر قانونی افراد کو مزید قیام کی اجازت دیکر قومی سلامتی پر سمجھوتہ نہیں کر سکتے: انوارالحق

(ویب ڈیسک) نگران وزیراعظم انوارالحق کاکڑ نے کہا کہ غیر قانونی مقیم افراد کو قیام کی مزید اجازت دیکر قومی سلامتی پر مزید سمجھوتہ نہیں کر سکتے۔نگران وزیر اعظم انوارالحق کاکڑ نے برطانوی اخبار ٹیلی گراف میں غیر قانونی تارکین وطن پر خصوصی تحریر میں کہا کہ پاکستان میں گزشتہ دہائیوں کے دوران تقریباً آئرلینڈ کی آبادی کے برابر تارکین وطن آ چکے ہیں، ہم نے فراخ دلی سے تارکین وطن کی اتنی بڑی تعداد کو سنبھالا ہے۔انوارالحق کاکڑ نے کہا کہ مہمان نوازی پاکستان کے ڈی این اے میں شامل ہے، غیر قانونی تارکین وطن کو رضاکارانہ طور پر رجسٹریشن اور وطن واپسی کے متعدد مواقع فراہم کئے، اس لئے یہ کہنا بالکل غلط ہے کہ پاکستان نے جلد بازی سے کام لیا۔نگران وزیراعظم نے کہا کہ بہت سے غیر قانونی لوگ بلیک مارکیٹ میں کام کرتے ہیں، کوئی ٹیکس نہیں دیتے، یہ لوگ انڈر ورلڈ کے استحصال کا شکار بھی ہیں، اگست 2021ء سے کم از کم 16 افغان شہریوں نے پاکستان میں خودکش حملے کئے ہیں۔انوارالحق کاکڑ نے لکھا کہ غیر قانونی تارکین وطن کے اِنخلا کے بارے میں پاکستان کی پالیسی سے متعلق سوشل میڈیا پر غلط معلومات اور بے بنیاد الزامات کی بھرمار ہے، غیر قانونی افراد کے ساتھ احترام اور دیکھ بھال کے ساتھ برتاؤ کرنے کے سخت احکامات ہیں۔نگران وزیراعظم نے لکھا کہ ہم نے تقریباً 79 ٹرانزٹ مراکز قائم کئے ہیں، جو مفت کھانا، پناہ گاہ اور طبی سہولیات فراہم کر رہے ہیں، برطانیہ، فرانس، جرمنی اور اٹلی سمیت مختلف ممالک بھی غیر قانونی تارکین وطن کے مسائل سے دوچار ہیں۔انوارالحق کاکڑ نے کہا کہ اتنی بڑی تعداد میں غیر قانونی افراد کو پاکستان میں قیام کی اجازت دے کر ہم اپنی قومی سلامتی پر مزید سمجھوتہ نہیں کر سکتے، ہمارا مقصد پاکستان کو محفوظ، پرامن اور خوشحال بنانا ہے۔

آئین اور قانون پر چلنے والوں کو راستے سے ہٹا دیا جاتا ہے: نواز شریف

قائد مسلم لیگ ن اور سابق وزیراعظم نواز شریف نے کہا ہے کہ آئین اور قانون پر چلنے والوں کو راستے سے ہٹا دیا جاتا ہے، صرف ایک سلیکٹڈ شخص کو لانے کیلئے مجھے نکالا گیا۔ماڈل ٹاؤن میں پارلیمانی بورڈ کے اجلاس سے خطاب کرتے ہوئے نواز شریف کا کہنا تھا کہ درمیان میں فاصلے آگئے تھے اور حالات کہاں سے کہاں پہنچ گئے، میں نے سوچا بھی نہ تھا کہ بیٹے سے تنخواہ نہ لینے پر فارغ کر دیا جائے گا، ایک سلیکٹڈ کو لانے کیلئے وزیراعظم کو فارغ کیا گیا۔انہوں نے کہا کہ ہم نے آئی ایم ایف کو خدا حافظ کہہ دیا تھا، آج ملک میں سب کچھ ریورس ہوگیا، اسحاق ڈار نے آئی ایم ایف سے کہا فی الحال ضرورت نہیں، پاکستان دنیا کی سب سے زیادہ آبادی والے 10 ممالک میں شامل ہے، ہمیں نظر کھا گئی اور شاید ہم خود بھی اپنے آپ سے مخلص نہیں۔نواز شریف کا کہنا تھا کہ پشاور سے سکھر تک ہم نے موٹرویز بنائیں، غیر ملکی قرضے واپس کر دیئے تھے، ہم نے ملک کو موٹر ویز اور سی پیک جیسے منصوبے دیئے، ملک ترقی کی دوڑ میں آگے بھاگ رہا تھا، ہم نے ملک سے لوڈ شیڈنگ کا خاتمہ کیا اور ڈیمز بنائے۔سابق وزیراعظم کا کہنا تھا کہ لواری ٹنل ہم نے بنایا، کراچی کو امن ہم نے دیا ووٹ کسی اور کو پڑ گیا، کام ہم کریں ووٹ کسی اور کو پڑ جائے، کراچی اور چترال والے اپنے گریبان میں جھانکیں، کراچی- حیدرآباد موٹروے ضرور بنے گی۔انہوں نے کہا کہ ہم کام کرنے والے لوگ ہیں، ہم غریبوں کا دکھ درد بانٹنے ہیں، ہم نہیں چاہتے ملک میں آٹا اور دال مہنگی ہو، ہمارے دور میں روٹی 4 روپے کی تھی، آج 20 روپے کی ہے، کچھ غریب ترس لوگوں نے روٹی پلانٹ لگائے ہوئے ہیں۔نوازشریف کا کہنا تھا کہ ہم ناانصافیوں کو بھول جاتے ہیں، اپنے ساتھ اتنے مخلص نہیں جتنا ہمیں ہونا چاہیے، یہ بھی کسی کو پوچھنا چاہیے تھا کہ صبح کا وزیراعظم رات کو کیسے ہائی جیکر بن گیا، ہم نے کبھی آئین اور قانون کو نہیں توڑا، ہم نے ہمیشہ آئین کی پاسداری اور رکھوالی کی ہے، جو آئین کی پاسداری اور رکھوالی نہیں کرتے ان کی سزا ہمیں بھگتنا پڑتی ہے۔قائد مسلم لیگ ن نے مزید کہا کہ اتنی دیر میں وزیراعظم نہیں رہا جتنی دیر ملک بدری کاٹی، ہم پر جھوٹے مقدمے بنائے گئے، رانا ثناء اللہ پر ہیروئن سمگلنگ کا جھوٹا مقدمہ بنایا گیا، ہم پر بنائے گئے تمام جھوٹے مقدمات کو ججز نے اٹھا کر باہر پھینکا، نہ ہم نے کبھی بھینس چرائی اور نہ اس کے بارے میں سوچا۔

پیپلزپارٹی کو لاہور میں دوبارہ عروج دینے کے لئے محنت کی جائے گی، بلاول بھٹو زرداری

چیئرمین پیپلزپارٹی بلاول بھٹو زرداری کا کہنا ہے پیپلزپارٹی کو لاہور میں دوبارہ عروج دینے کے لئے محنت کی جائے گی۔ چیئرمین پیپلزپارٹی بلاول بھٹو زرداری نے لاہور کا دورہ کیا۔ اس دوران وہ کارکنان میں گھل مل گئے، سیلفیاں بھی بنوائیں۔ میڈیا سے گفتگو کرتے بلاول بھٹو زرداری کا کہنا تھا کہ لاہور پہنچ کر بہت اچھا لگا، پیپلزپارٹی کی بنیاد لاہور میں رکھی گئی، مہنگائی، غربت اور بے روزگاری نے عوام کو مشکل میں ڈال رکھا ہے، اس وقت ملک میں مہنگائی اور غربت تاریخی سطح پر ہے، پیپلزپارٹی کی حکومت جب بھی آئی ہم نے بے روزگاری اور مہنگائی کا مقابلہ کیا، ہمارا مقابلہ کسی سیاسی جماعت سے نہیں، ماضی میں ہم نے انقلابی منصوبہ بے نظیر انکم سپورٹ پروگرام شروع کیا، آئندہ حکومت میں نوجوانوں اور مزدوروں کو ریلیف دینے کے لئے پروگرام شروع کئے جائیں گے۔چیئرمین پیپلزپارٹی نے کہا ملک میں نفرت اور تفریق کی سیاست ہو رہی ہے، پاکستان پیپلزپارٹی کے کارکن بہت بہادر ہیں، نواز شریف کا دور حکومت بھی پیپلزپارٹی کارکنان کے لئے آمریت سے کم نہیں تھا، پاکستان پیپلزپارٹی سیاسی جماعت ہے، سیاسی جماعتوں کے دروازے بات چیت کے لئے ہمیشہ سب کے لئے کھلے رہتے ہیں، اگر پنجاب میں پیپلزپارٹی کو لیول پلیئنگ فیلڈ ملی تو اچھا سرپرائز دیں گے، بلوچستان کے ساتھ پورے پاکستان میں سرپرائز دیں گے، آئندہ انتخابات میں اکثریت حاصل ہوئی تو سب کو ساتھ لے کر چلیں گے، پیپلزپارٹی کو لاہور میں دوبارہ عروج دینے کے لئے محنت کی جائے گی۔

سندھ کے عوام پنجاب کی طرح ترقی چاہتے ہیں تو ن لیگ کو آزما کر دیکھیں: احسن اقبال

مسلم لیگ ن کے سینئر رہنما اور سابق وفاقی وزیر احسن اقبال نے کہا کہ سندھ کے عوام پنجاب کی طرح ترقی چاہتے ہیں تو ن لیگ کو آزما کر دیکھیں۔مسلم لیگ ن کے سینئر رہنما اور سابق وفاقی وزیر احسن اقبال نے کہا کہ اپریل 2022ء میں مختلف حکومتوں نے مل کر حکومت بنائی تھی، سیاسی اختلافات کے باوجود سب جماعتیں ڈیفالٹ سے بچانے کے لئے اکٹھی ہوئی تھیں، سولہ ماہ کی محنت سے پاکستان کو ڈیفالٹ ہونے سے بچایا۔احسن اقبال نے کہا کہ ہر جماعت اپنے منشور کو لیکر میدان میں اترے گی، سندھ کی عوام کو منی بیک گارنٹی کی آفر دیتا ہوں، اگر سندھ کے عوام کو خدمت کا ریکارڈ نہ ملا تو پھر مجرم ہوں گے۔سابق وفاقی وزیر نے کہا کہ پارٹی ورکرز ہمارا اثاثہ ہیں، بلاول بھٹو سے متعلق سوال پر احسن اقبال نے کہا کہ ہمارے دامن میں کارکردگی کا ریکارڈ ہے، ہمیں منفی سیاست کی ضرورت نہیں، منفی سیاست وہی کرتا ہے جس کے پاس کوئی کارکردگی نہ ہو۔احسن اقبال نے مزید کہا کہ بانی پی ٹی آئی کراچی سے پشاور تک کوئی منصوبہ پیش نہیں کر سکتے، چور، ڈاکو کہہ کر لوگوں کی پگڑیاں اچھالی گئیں، ہم نے پاکستان میں اتنا کچھ کیا ہم گھنٹوں بول سکتے ہیں، کسی کی پگڑی اچھالنے کی ضرورت نہیں ہے، ہماری ایم کیو ایم ، جے یو آئی، جی ڈی اے کے ساتھ بھی بات چیت جاری ہے، جس کے پاس بہتر امیدوار ہو گا اس کی سب حمایت کریں گے۔ن لیگ کے سینئر رہنما نے کہا کہ ہم انتخابی ایڈجسٹمنٹ سیٹ ہارنے کے لئے نہیں کر سکتے، یہ کوٹہ سسٹم نہیں ہے، الیکشن ایک ریس ہے وہی امیدوار اتارے جاتے ہیں جن سے جیت کی امید ہو، الیکشن میں مرکزی قیادت سے ایک امیدوار کراچی سے ضرور ہو گا، دھوکہ کرنے والوں کی الیکشن میں ضمانتیں ضبط ہوں گی۔احسن اقبال نے کہا کہ پی ٹی آئی 2024ء کے انتخاب میں اپنی اصلی جگہ پر آ جائے گی، بانی پی ٹی آئی نے گزشتہ چار سالوں میں نوجوانوں کو دھکے، بے روزگاری دی۔

نادرا نے 18 پی ٹی آئی رہنماؤں کے شناختی کارڈ بلاک کر دیئے

نادرا نے 9 مئی کے واقعات میں ملوث 18 پی ٹی آئی رہنماؤں کے شناختی کارڈز بلاک کر دیئے۔پولیس نے 9 مئی واقعات میں ملوث 18 اشتہاریوں کے کارڈ بلاک کرنے کی نادرا سے درخواست کی تھی جس پر کارروائی عمل میں لائی گئی۔پولیس حکام کے مطابق تمام ملزمان اے ٹی سی میں پیش ہوئے بغیر قانونی حقوق حاصل نہیں کر سکتے، شامل تفتیش ہونے تک ملزمان کے قومی شناختی کارڈز بلاک رہیں گے۔پولیس کا کہنا ہے کہ 18 اشتہاری ملزمان جن کے شناختی کارڈ بلاک کئے گئے ہیں ان میں مراد سعید، اعظم سواتی، حماد اظہر، میاں اسلم اقبال، کرامت کھوکھر، علی امین گنڈاپور، واثق قیوم، مسرت جمشید چیمہ اور جمشید چیمہ شامل ہیں۔حکام کے مطابق زبیر نیازی، ملک ندیم عباس، غلام محی الدین دیوان کے شناختی کارڈ بھی بلاک کئے گئے ہیں، اشتہاری ملزمان شناختی کارڈ کے ذریعے حاصل ہونے والی تمام سہولیات سے محروم رہیں گے۔

جناح ہاؤس جلاؤ گھیراؤ کیس میں 23 ملزموں کی درخواست ضمانت منظور

انسدادِ دہشت گردی عدالت لاہور نے جناح ہاؤس جلاؤ گھیراؤ کے مقدمہ میں ٹک ٹاکر ملک منیب سمیت 23 ملزموں کی درخواست ضمانت بعد ازگرفتاری منظور کر لی۔عدالت نے دو دو لاکھ مچلکوں کے عوض ضمانتیں منظور کیں، ٹک ٹاکر ملک منیب کی جانب سے رانا رباب اکرم نے دلائل دیئے، عدالت نے ملزم محمد عمران اور آصف عاشق کی ضمانتیں خارج کر دیں، انسداد دہشت گردی عدالت کے جج ارشد جاوید نے 25 ضمانتوں پر فیصلہ سنایا۔ملزموں کے خلاف تھانہ سرور روڈ پولیس نے مقدمہ درج کر رکھا ہے، عدالت نے دیگر ملزموں کی ضمانتوں پر 21 دسمبر کو دلائل طلب کر لئے۔

ملکی معیشت میں بہتری روشن مستقبل کی نوید دے رہی ہے، گورنر پنجاب

گورنر پنجاب بلیغ الرحمن کا کہنا ہے ملکی معیشت میں بہتری روشن مستقبل کی نوید دے رہی ہے۔ گورنر پنجاب بلیغ الرحمن سے گورنر سندھ کامران ٹیسوری نے لاہور میں ملاقات کی۔ ملاقات میں بین الصوبائی رابطوں کو فروغ دینے پر تبادلہ خیال کیا گیا۔بلیغ الرحمن نے کہا دونوں صوبے مختلف شعبوں میں تجربات سے فائدہ اٹھا سکتے ہیں۔گورنر سندھ نے گورنر ہاؤس لاہور کو عوام کے لئے منظم انداز میں کھولنے کے اقدام کو سراہا۔

وزیراعلیٰ پنجاب سے گورنر سٹیٹ بینک کی ملاقات، معاشی صورتحال پر تبادلہ خیال

نگران وزیراعلیٰ پنجاب محسن نقوی سے گورنر سٹیٹ بینک جمیل احمد نے ملاقات کی ہے۔گورنر سٹیٹ بینک نے ایوان وزیراعلیٰ میں محسن نقوی سے ملاقات کی جس میں معاشی صورتحال پر تبادلہ خیال کیا گیا، ملاقات کے دوران بینک آف پنجاب اورپنجاب کو آپریٹو بینک کے امور پر گفتگو ہوئی۔اس موقع پر نگران وزیراعلیٰ محسن نقوی نے کہا کہ کسان کو سبسڈی اورآسان قرضے دے کر زیادہ پیداوار کا ہدف حاصل کرنا چاہتے ہیں، زیادہ پیداوار کیلئے چھوٹے کسان پر مالی بوجھ کم سے کم کرنا ضروری ہے، زراعت اوردیگر شعبوں میں معاشی سرگرمیوں میں بہتری سے عوام مستفید ہوں گے۔محسن نقوی کا کہنا تھا کہ پنجاب میں کاٹن کی ریکارڈ پیداوار سے 2ارب ڈالر کے زرمبادلہ کی بچت ہو گی، پنجاب میں چاول کی ایکسپورٹ دو ارب ڈالر سے بڑھ رہی ہے، سرمایہ کاروں اورصنعتکاروں کو تمام ممکنہ سہولتیں دینے کی پالیسی پر عمل پیرا ہیں، سٹاک ایکسچینج میں تیزی کا رجحان مثبت اثرات کا حامل ہوگا۔گورنر سٹیٹ بینک جمیل احمد نے کہا کہ وزیراعلیٰ محسن نقوی نے پنجاب میں زراعت سمیت دیگر شعبوں میں بہتری کیلئے قابل قدر اقدامات کیے،کاٹن،چاول اور دیگر فصلوں کی بہتر پیداوار سے معیشت پر مثبت اثرات مرتب ہوں گے۔

دھوکہ دہی کیس: فواد چودھری کی ضمانت منظور، رہا کرنے کا حکم

(ویب ڈیسک) اینٹی کرپشن کورٹ نے سابق وفاقی وزیر فواد چودھری کی ضمانت منظور کرتے ہوئے انہیں رہا کرنے کا حکم دیدیا۔راولپنڈی کی اینٹی کرپشن عدالت کے سپیشل جج علی نواز نے دھوکہ دہی کیس میں دو لاکھ روپے ضمانتی مچلے کے عوض فواد چودھری کی ضمانت منظور کرتے ہوئے رہا کرنے کا حکم دیا۔واضح رہے کہ فواد چودھری پر35 لاکھ روپے دھوکہ دہی کا مقدمہ درج تھا جس میں مقامی عدالت نے سابق وزیر کو جوڈیشل ریمانڈ پر اڈیالہ جیل بھیجا تھا۔گزشتہ دنوں نیب نے عدالت کی اجازت کے بعد فواد چودھری کے وارنٹ کی تکمیل کرتے ہوئے ان کی اڈیالہ جیل میں گرفتاری ڈال دی تھی۔

بلدیہ عظمیٰ لاہور کو تین ارب روپے کے تعمیروبحالی کے کام کروانے کی منظوری

وزیر اعلیٰ پنجاب آفس نے بلدیہ عظمیٰ لاہور کو تین ارب روپے کے تعمیر و بحالی کے کام کروانے کی منظوری دے دی۔بلدیہ عظمیٰ لاہور میں تعمیر و بحالی کے کام کروانے کیلئے تین ارب روپے منظور ہو گئے۔ تعمیر و بحالی کے کاموں میں سڑکوں کو پختہ کرنا ، فٹ پاتھ کو لش پش کرنا اور لین مارکنگ شامل ہیں۔ شہر کے نو زونز میں قبرستانوں کی چار دیواری ، گلیوں اور سیوریج کے کام بھی ہونگے۔ 8بڑی سڑکوں کے لئے 1 ارب 4 کروڑ روپے کے ٹینڈرز کال کرنے کی بھی منظوری دی گئی۔اس کے علاوہ302شاہراہوں کے پیچ ورک کے لئے 46 کروڑ روپے کے ٹینڈرز جاری کئے جائیں گے۔ 62روڈز کی تعمیر و بحالی اور فٹ پاتھوں کی تزئین و آرائش کے لئے 85 کروڑ روپے کے ٹینڈرز کی منظوری بھی دی گئی۔ 45 شاہراہوں ، قبرستانوں کی چار دیواری اور سیوریج و پکی گلیوں کے لئے 48 کروڑ روپے کے ٹینڈرز منظور کئے گئے۔ ڈی سی لاہور و ایڈمنسٹریٹر رافعہ حیدر نے 30 دسمبر تک ٹینڈرز کال کرنے کی منظوری دی۔ڈی سی لاہور و ایڈمنسٹریٹر رافعہ حیدر کا کہنا ہے کہ 30 جنوری تک سڑکوں کی تعمیر و بحالی کے لئے کام مکمل کروانے کی ڈیڈ لائن دی گئی ہے۔

پنجاب میں 15300 کنال میل طویل نہروں کی بھل صفائی پراجیکٹ کی منظوری

وزیراعلیٰ پنجاب محسن نقوی نے پنجاب میں 15300 کنال میل طویل نہروں کی بھل صفائی پراجیکٹ کی منظوری دیدی۔وزیراعلیٰ پنجاب محسن نقوی کی زیر صدارت خصوصی اجلاس ہوا۔ اجلاس میں نہروں کی بھل صفائی پراجیکٹ کی منظوری دی گئی۔ بھل صفائی کا طریقہ کار وضع کرنے کیلئے چیئرمین پی اینڈ ڈی، سیکرٹریز آبپاشی، زراعت اور مائنز پر مشتمل کمیٹی بھی قائم کر دی گئی۔ سیکرٹری آبپاشی واصف خورشید نے دس سال بعد ہونے والی بھل صفائی پر بریفنگ دی۔ بریفنگ میں بتایا گیا کہ پہلے مرحلے میں منگلا ڈیم کی نہریں 26 دسمبر سے 13 جنوری تک بند ہوں گی۔ دوسرے فیز میں تربیلا ڈیم کی نہریں 13 جنوری سے 31 جنوری تک بند رکھی جائیں گی۔ 26 دسمبر سے پنجاب میں نہروں کی بندش کے بعد تین فیز میں بھل صفائی شروع کی جائے گی۔ جنوری کے پہلے ہفتے سے صوبہ بھر میں بھل صفائی کا باقاعدہ آغاز ہو گا۔ صوبہ بھر میں LIMSبھل صفائی کی صورتحال کے سیٹلائٹ امیج مہیا کرے گا۔ ایری گیشن مانیٹرنگ ایپ پر روزانہ 10 بجے ڈیٹا اپ لوڈ ہو گا۔بریفنگ میں مزید بتایا گیا کہ بھل صفائی کے دوران پانی چوری کے لئے غیر قانونی چینل ملنے پر پولیس مقدمہ درج کر کے کارروائی کرے گی۔ اس موقع پر محسن نقوی نے کہا بھل صفائی کی تکمیل سے تین سے چار لاکھ ایکڑ اراضی کو پانی میسر ہو گا۔صوبائی وزیر عامر میر، چیئرمین پی اینڈ ڈی، ایڈیشنل آئی جی، سیکرٹری زراعت، سیکرٹری اطلاعات، سیکرٹری سی اینڈ ڈبلیو، کمشنر اور دیگر حکام اجلاس میں موجود تھے۔

عام انتخابات: الیکشن کمیشن میں رجسٹرڈ ووٹرز کے اعدادوشمار جاری

الیکشن کمیشن نے 8 فروری کے عام انتخابات سے قبل ملک بھر میں رجسٹرڈ ووٹرز کے اعدادوشمار جاری کر دیئے۔الیکشن کمیشن کے جاری کردہ اعداد و شمار کے مطابق ملک میں ووٹرز کی مجموعی تعداد 12 کروڑ 85 لاکھ 85 ہزار 760 ہے جن میں 6 کروڑ 92 لاکھ 63 ہزار 704 مرد ووٹرز جبکہ 5 کروڑ 93 لاکھ 22 ہزار 56 خواتین ووٹرزہیں۔

اعداد و شمار کے مطابق ملک میں مرد ووٹرز کی شرح 53.87 فیصد جبکہ خواتین ووٹرز کی شرح 46.13 فیصد ہے۔الیکشن کمیشن کا کہنا ہے کہ وفاقی دارالحکومت اسلام آباد میں ووٹرز کی تعداد 10 لاکھ 83 ہزار 29 ہے جس میں 5 لاکھ68 ہزار 406 مرد ووٹرز اور 5 لاکھ14 ہزار 623 خواتین ووٹرز ہیں۔

ای سی پی کے مطابق پنجاب میں ووٹرز کی تعداد 7 کروڑ 32 لاکھ 7 ہزار 896 ہے جس میں مرد ووٹرز کی تعداد 3 کروڑ 91 لاکھ 22 ہزار 82 اور خواتین ووٹرز کی تعداد 3 کروڑ 40 لاکھ 85 ہزار 814 ہے۔

الیکشن کمیشن نے بتایا ہے کہ سندھ میں ووٹرز کی تعداد 2 کروڑ 69 لاکھ 94 ہزار 769 ہے جن میں ایک کروڑ 46 لاکھ 12 ہزار 655 مرد ووٹرز اور ایک کروڑ 23 لاکھ 82 ہزار 114 خواتین ووٹرز ہیں۔

اسی طرح خیبر پختوانخوا میں ووٹرز کی مجموعی تعداد 2 کروڑ 19 لاکھ 28 ہزار 119 ہے جس میں ایک کروڑ 19 لاکھ 44 ہزار 397 مرد ووٹرز ہیں جبکہ خیبر پختونخوا میں خواتین ووٹرز کی تعداد 99 لاکھ 83 ہزار 722 ہے۔

بلوچستان میں ووٹرز کی تعداد 53 لاکھ 71 ہزار 947 ہے، جس میں مرد ووٹرز کی تعداد 30 لاکھ 16 ہزار 164 اور خواتین ووٹرز کی تعداد 23 لاکھ55 ہزار 783 ہے۔

Saturday, 16 December 2023

الیکشن شیڈول جاری کرنے کا سپریم کورٹ کا فیصلہ خوش آئند ہے: پرویز الٰہی

(ویب ڈیسک) سابق وزیراعلیٰ پنجاب اور پی ٹی آئی کے صدر چودھری پرویز الٰہی سے سردار عبدالرازق خان ایڈووکیٹ نے اڈیالہ جیل میں ملاقات کی، اس موقع پر چودھری شمشاد ملہی ایڈووکیٹ بھی ان کے ساتھ تھے۔ملاقات کے دوران قانونی امور اور الیکشن کی حکمت عملی پر مشاورت کی گئی، اس موقع پر چودھری پرویز الٰہی نے کہا کہ الیکشن شیڈول جاری کرنے کا سپریم کورٹ کا فیصلہ خوش آئند ہے، سپریم کورٹ کے فیصلے سے الیکشن ملتوی کرانے کی تمام سازشیں دم توڑ گئی ہیں۔چودھری پرویز الٰہی نے کہا کہ پی ٹی آئی فوری اور منصفانہ انتخابات چاہتی ہے، پکڑ دھکڑ بند کی جائے اور ہمارے امیدواروں کو لیول پلیئنگ فیلڈ دی جائے۔سابق وزیر اعلیٰ پنجاب نے بتایا کہ انہوں نے قومی اور صوبائی اسمبلی کے مختلف حلقوں سے الیکشن لڑنے کے لئے قانونی حکمت عملی تیار کر لی۔

ڈپٹی کمشنرز کو ایک بار پھر دفعہ 144 کے نفاذ کا اختیار مل گیا

نگران حکومت پنجاب نے عام انتخابات سے قبل بڑا فیصلہ کرتے ہوئے ڈپٹی کمشنرز کو ایک بار پھر دفعہ 144 کے نفاذ کا اختیار دے دیا ہے۔ڈپٹی کمشنرز اضلاع میں قیام امن یقینی بنانے کیلئے دفعہ 144 نافذ کر سکیں گے، ڈپٹی کمشنرز کے پاس دو ماہ کیلئے دفعہ 144 نافذ کرنے کا اختیار ہو گا، ڈپٹی کمشنرز کو دفعہ 144 کے نفاذ کا اختیار دینے کیلئے آرڈیننس بھی جاری کر دیا گیا ہے۔اس سے قبل ڈپٹی کمشنرز کو دفعہ 144 کے نفاذ کا اختیار دینے کا آرڈیننس مدت پوری ہونے کی وجہ سے منسوخ ہو گیا تھا، آرڈیننس سے قبل دفعہ 144 کے نفاذ کا اختیار پنجاب کابینہ کے پاس تھا۔۔

سانحہ آرمی پبلک سکول نے قوم کے عزم کو مضبوط تر کیا: نگران وزیراعظم

نگران وزیراعظم انوار الحق کاکڑ نے کہا ہے کہ آرمی پبلک سکول پشاور کے سانحہ عظیم نے اس قوم کے عزم کو مضبوط تر کیا ہے۔سانحہ آرمی پبلک سکول کی نویں برسی پر اپنے پیغام میں انوار الحق کاکڑ کا کہنا تھا کہ یہ ایک ایسا سانحہ تھا جس نے دنیا بھر کی آنکھیں نم کر دیں، آج بھی جب اس دن کو یاد کرتا ہوں تو آنکھیں اشکبار ہو جاتی ہیں۔انہوں نے کہا کہ دشمن نے ہمارے مستقبل کو روند کر دہشتگردی کے خلاف جنگ میں اس قوم کے حوصلے پست کرنے کی ناکام کوشش کی، آرمی پبلک سکول پشاور کے سانحہ عظیم نے اس قوم کے عزم کو مضبوط تر کیا۔وزیرِ اعظم کا کہنا تھا کہ پوری قوم کی ہمدردیاں ان والدین کے ساتھ ہیں جن کے بچوں نے اس سانحے میں عظیم قربانی دی، مجھ سمیت پوری قوم اپنے پھول سے بچوں کی اس عظیم قربانی پر آج انہیں یاد اور خراجِ تحسین پیش کرتی ہے۔انہوں نے کہا کہ جس قوم میں شہید طاہرہ قاضی اور شہید اعتزاز حسن جیسے نڈر لوگ دوسروں کو بچانے کیلئے اپنی جان کی بھی پرواہ نہ کریں اس قوم کو بزدل دہشتگرد کبھی ہرا نہیں سکتے، دہشتگردوں اور پاکستان کے امن کے دشمنوں کو میرا یہ واضح پیغام ہے کہ پاکستانی قوم متحد ہے۔

عصوم بچوں نے لازوال قربانیوں سے پاکستان میں امن کی بنیادرکھی,کامران ظفربھٹی

کامران ظفربھٹی رہنما ریجنل یونین آف جرنلسٹس نے اپنے بیان میں کہا کہ معصوم بچوں نے لازوال قربانیوں سے پاکستان میں امن کی بنیادرکھی۔ 16 دسمبر کو اے پی ایس سانحہ میں شہید ہونے والے بچوں نے لازوال قربانیوں سے پاکستان میں امن کی بنیاد رکھی۔ کامران ظفربھٹی نے مزید کہا کہ آرمی پبلک سکول پشاور کے شہداء کی برسی پر خصوصی پیغام میں کہا کہ 16 دسمبر کا دن معصوم بچوں کی عظیم شہادت اور قربانیوں کا دن ہے ،ہم آرمی پبلک سکول کے معصوم شہداء کی قربانیوں کو سلام پیش کرتے ہیں ۔ معصوم بچوں کی شہادت کو ہمیشہ یاد رکھا جائے گا، معصوم شہداء کی قربانیوں نے پوری قوم کو دہشت گردی کے خلاف متحد کیا، معصوم بچوں نے لازوال قربانیوں سے پاکستان میں امن کی بنیاد رکھی، شہید بچے اور اساتذہ پوری قوم کے ہیرو ہیں ۔انہوں نے مزید کہا کہ آج کے دن شہدائے اے پی ایس سے اظہار یکجہتی کرتے ہیں اور معصوم شہداء کو خراج عقیدت پیش کرتے ہیں۔

سابق وزیراعظم شہباز شریف کا سانحہ اے پی ایس کے شہداء کو خراج عقیدت

سابق وزیر اعظم اور پاکستان مسلم لیگ (ن) کے صدر شہباز شریف نے سانحہ آرمی پبلک سکول پشاور کے 9 سال مکمل ہونے پر شہداء کو خراج عقیدت پیش کیا ہے۔اے پی ایس سانحہ میں شہید ہونےوالوں کی 9ویں برسی کے موقع پر ایک پیغام میں شہباز شریف کا کہنا تھا کہ 16 دسمبر 2014 کا دن ہم کبھی نہیں بھول سکتے، نو سال پہلے آج کے دن ہمارے معصوم بچوں کو دہشت گردی کا نشانہ بنایا گیا ہم شہدا، ان کے والدین اور اہل خانہ کو سلام پیش کرتے ہیں، ان کے غم میں شریک ہیں۔انہوں نے کہا کہ آج کے دن پوری قوم دہشت گردی کے خلاف ایک بیانیے پر جمع ہوئی، 9 سال پہلے سابق وزیراعظم محمد نواز شریف کی قیادت میں دہشت گردی کے خاتمے کی فیصلہ کن جنگ شروع کی گئی تھی، ضرب عضب اور ردالفساد کے ذریعے دہشت گردوں کا صفایا کیا گیا۔صدر مسلم لیگ ن نے کہا کہ آج کے دن سکیورٹی فورسز کو بھی خراج تحسین پیش کرتے ہیں جو دہشت گردی کے خاتمے کے لئے بہادری اور شجاعت سے لڑ رہی ہیں، سابق وزیراعظم نواز شریف کی دہشت گردی کے خاتمے کی پالیسی پر عمل نہ روکا جاتا تو آج دہشت گردی دوبارہ زندہ نہ ہوتی۔ان کا کہنا تھا کہ وقت نے ثابت کیا کہ دہشت گرد کسی کے دوست نہیں، دہشت گردی مذمت سے نہیں، پاکستان دشمنوں کی مرمت سے ختم ہو گی، افسوس دہشت گردوں کو واپس لاکر قوم کی زندگی سے کھیلا گیا، ملک کا امن تباہ کیا گیا، معیشت کی بنیادیں ہلا دی گئیں۔شہباز شریف نے مزید کہا کہ دہشت گردی کے خاتمے کے لئے آج پھر سابق وزیراعظم نواز شریف جیسے آہنی عزم و ارادے اور فیصلہ کن کارروائی کی ضرورت ہے، اللہ تعالیٰ شہداء کے درجات بلند فرمائے اور اہل خانہ کو صبر جمیل دے۔

توشہ خانہ کیس: بانی پی ٹی آئی کے مزید جسمانی ریمانڈ کی استدعا مسترد

(ویب ڈیسک) احتساب عدالت نے توشہ خانہ کیس میں نیب کی جانب سے سابق چیئرمین پی ٹی آئی کے مزید جسمانی ریمانڈ کی استدعا مسترد کر دی۔احتساب عدالت اسلام آباد کے جج محمد بشیر نے اڈیالہ جیل میں سماعت کی۔سابق چیئرمین پی ٹی آئی کو دو روزہ جسمانی ریمانڈ مکمل ہونے پر آج دوبارہ احتساب عدالت پیش کیا گیا، اس موقع پر نیب ٹیم نے جسمانی ریمانڈ کے دوران ہونے والی پیش رفت بارے عدالت کو آگاہ کیا۔دوران سماعت نیب کی جانب سے بانی پی ٹی آئی کے 3 روزہ جسمانی ریمانڈ کی استدعا کی گئی۔عدالت نے نیب کی جانب سے جسمانی ریمانڈ کی استدعا مسترد کرتے ہوئے سابق چیئرمین پی ٹی آئی کو 14 روز کیلئے جوڈیشل ریمانڈ پر بھیج دیا۔واضح رہے کہ گزشتہ سماعت پر احتساب عدالت نے سابق وزیراعظم کا دو روزہ جسمانی ریمانڈ منظور کیا تھا۔ہم کسی صورت الیکشن میں تاخیر نہیں چاہتے: بیرسٹر گوہر خان

اڈیالہ جیل راولپنڈی کے باہر میڈیا سے گفتگو کرتے ہوئے چیئرمین پی ٹی آئی بیرسٹر گوہر خان کا کہنا تھا کہ ہم کسی صورت الیکشن میں تاخیر نہیں چاہتے، ہماری استدعا رہی ہے کہ شفاف الیکشن ہوں۔انہوں نے کہا کہ کل سپریم کورٹ میں ہمارا کوئی وکیل پیش نہیں ہوا، شفاف انتخابات کیلئے آر اوز کا ہونا شفاف الیکشن کی عکاسی نہیں کرتا، پی ٹی آئی کو کٹہرے میں کھڑا نہیں کیا جاسکتا، ہماری پٹیشن تھی کہ ریٹرننگ افسران کو عدلیہ سے لیا جائے۔بیرسٹر گوہر کا مزید کہنا تھا کہ بوگس کیسز کے ذریعے جسمانی ریمانڈ لینے کی کوشش کی جا رہی ہے، یہ سب کچھ سیاسی انتقام کیلئے کیا جا رہا ہے، جیل ٹرائل ہو ہی نہیں سکتا، ایسے ٹرائل بنیادی انسانی حقوق کی خلاف ورزی ہے۔

سابق وفاقی وزیر ہمایوں اختر خان استحکام پاکستان پارٹی میں شامل

سابق وفاقی وزیر ہمایوں اختر نے استحکام پاکستان پارٹی میں شمولیت اختیار کرلی۔ہمایوں اختر خان نے آئی پی پی کے پیٹرن انچیف جہانگیر خان ترین اور صدر عبدالعلیم خان سے ملاقات کی اور دونوں قائدین پر بھرپور اعتماد کا اظہار کرتے ہوئے آئی پی پی میں شمولیت اختیار کرلی، علیم خان اور جہانگیر ترین نے ہمایوں اختر کو پارٹی مفلر پہناتے ہوئے آئی پی پی میں خوش آمدید کہا۔آئی پی پی رہنماؤں کے ہمراہ پریس کانفرنس کرتے ہوئے ہمایوں اختر نے کہا کہ 9 مئی کے واقعات کے بعد تحریک انصاف سے علیحدگی اختیار کرلی، 9 مئی کو شہداء کے مجسموں کو جلایا گیا، میرے لیے ممکن نہیں تھا کہ تحریک انصاف کے ساتھ مزید چلتا۔انہوں نے کہا کہ جہانگیرترین بڑے،عبدالعلیم خان چھوٹےبھائی ہیں، ساتھیوں سےمشاورت کےبعد استحکام پارٹی میں شمولیت کا فیصلہ کیا، ملک غربت،مہنگائی میں پستا چلا جارہا ہے، ہم اپنےملک کوغربت کی زنجیروں سےباہرنکالیں گے، آئی پی پی کی قیادت سےمجھےپوری امید ہے۔

ملکی تاریخ میں پہلی مصنوعی بارش کا تجربہ کامیاب

نگران وزیراعلیٰ پنجاب محسن نقوی نے کہا ہے کہ آج پاکستان کی پہلی مصنوعی بارش کا کامیاب تجربہ کیا گیا ہے۔نگران وزیراعلیٰ پنجاب محسن نقوی نے پریس کانفرنس کرتے ہوئے کہا کہ لاہور کے تقریبا دس علاقوں میں ہلکی پھلکی بارش ہو گئی ہے، دوسرا مشن تھوڑی دیر کے بعد شروع کر دیں گے۔انہوں نے کہا کہ مصنوعی بارش کے لئے ہمارا ایک پیسہ خرچ نہیں ہوا، متحدہ عرب امارات کے شکر گزار ہیں، سارا مینج متحدہ عرب امارات کی حکومت نے کیا، متحدہ عرب امارات سے دو سپیشل جہاز آئے تھے، پہلی فلائٹ میں 48 فلیئرز شاہدرہ اور مریدکے کے قریب کئے گئے۔انہوں نے کہا کہ نگران وزیراعظم نے متحدہ عرب امارات کی حکومت کو فون کر کے مبارکباد دی، سموگ ٹاور چند ہفتوں تک انسٹال ہو جائیں گے، بارش سے ایئر کوالٹی انڈیکس نیچے جائے گا، پہلا تجربہ تھا ہم سیکھ رہے ہیں ۔

سانحہ آرمی پبلک سکول کے 9 برس مکمل، زخم آج بھی تازہ

سانحہ آرمی پبلک سکول کی 9 ویں برسی آج منائی جا رہی ہے، سال 2014 کو آج ہی کے دن سفاک دہشت گردوں نے معصوم بچوں کو نشانہ بنایا۔16 دسمبر سال 2014ء کے دن تعلیم اور امن دشمن آرمی پبلک سکول کے عقبی راستے سے صبح 10 بجے کے قریب داخل ہوئے، آٹھویں، نویں اور دسویں جماعت کے طالب علم آڈیٹوریم میں اکھٹے تھے، دہشت گردوں نے آڈیٹوریم میں داخل ہوتے ہی ہر طرف گولیوں کی بوچھاڑ کر دی، سفاک قاتلوں نے اے پی ایس کی دیواروں کو معصوموں کے خون سے رنگ دیا۔دہشتگردوں کے حملے میں پرنسپل، اساتذہ، طلبہ اور دیگرعملے سمیت 140 سے زائد افراد شہید ہوئے، پاک فوج کے جوانوں نے دہشت گردوں کو بھرپور جواب دیتے ہوئے موقع پر انہیں انجام تک پہنچایا۔سانحہ اے پی ایس نے دہشتگردی کیخلاف جنگ میں نئی روح پھونکی جس کے نتیجے میں نیشنل ایکشن پلان تشکیل پایا اور قبائلی علاقوں سے دہشتگردی کا خاتمہ ممکن ہوا، آرمی پبلک سکول حملے میں ملوث 6 دہشتگردوں کو سکیورٹی فورسز نے گرفتار کیا جنہیں ملٹری کورٹس نے موت کی سزائیں سنائی تھیں۔نو سال بعد سانحہ آرمی پبلک سکول کا غم آج بھی تازہ ہے، شہید ہونے والے بچوں کی یادوں نے مختلف خاندانوں کو آپس میں جوڑ دیا ہے، ایک شہید کے گھر میں اکھٹے ہو کر والدین اپنا غم ایک دوسرے کے ساتھ بانٹتے ہیں۔

الیکشن کمیشن کا اپیلٹ ٹربیونلز لگانے کیلئے عدلیہ سے رجوع کرنے کا فیصلہ

(ویب ڈیسک) الیکشن کمیشن نے عام انتخابات کے لئے اپیلٹ ٹربیونلز لگانے کے لئے عدلیہ سے رجوع کرنے کا فیصلہ کر لیا۔الیکشن کمیشن نے چاروں صوبائی الیکشن کمشنرز کو ہنگامی مراسلے جاری کرتے ہوئے ہدایت کی کہ ملک بھر کی پانچوں ہائیکورٹس کے چیف جسٹس صاحبان سے رابطہ کیا جائے، چیف جسٹس ہائیکورٹس سے اپیلٹ ٹربیونلز کے لئے تجاویز لی جائیں۔الیکشن کمیشن نے کہا کہ ملک بھر میں عام انتخابات کے لئے اپیلٹ ٹربیونلز ہائیکورٹس کے ججز پر مشتمل ہوں گے، اپیلٹ ٹربیونلز میں ریٹرننگ افسروں کے فیصلوں کو چیلنج کیا جا سکے گا۔الیکشن کمیشن نے صوبائی الیکشن کمشنرز کو ہنگامی بنیادوں پر ہائیکورٹس سے رجوع کرنے کی ہدایت کر دی۔

لاہور ٹریفک پولیس کا خواتین کیلئے رائیڈ فار چینج پروگرام دوبارہ شروع کرنے کا فیصلہ

لاہور ٹریفک پولیس نے خواتین کیلئے رائیڈ فار چینج پروگرام دوبارہ شروع کرنے کا فیصلہ کر لیا۔رائیڈ فار چینج کے تحت مختلف یونیورسٹیز، کالجز میں سکوٹی ٹریننگ کا آغاز کیا جائے گا۔ سی ٹی او لاہور عمارہ اطہر نے وویمن آن وہیل سکول کا دورہ کیا۔ سی ٹی او لاہور نے موٹرسائیکل ٹریننگ کے لئے آئی خواتین سے ملاقات کی۔انہوں نے کہا وویمن آن ویل پراجیکٹ،رائیڈ فار چینج پروگرام کے تحت خواتین کو موٹر سائیکل چلانے کی فری تربیت دی جا رہی ہے، وویمن آن ویلز سکول ایل او ایس میں خواتین کی ٹریننگ کا 77 واں بیج زیر تربیت ہے،اب تک 07 ہزار سے زائد خواتین کو ٹرینڈ کیا جا چکا ہے۔سی ٹی او لاہور نے کہا خواتین بااختیار ہونگی تو معاشرے میں واضح تبدیلی آئیگی ، وویمن آن ویلز پراجیکٹ اور رائیڈ فار چینج پروگرام کا مقصد خواتین کو زیادہ پراعتماد اور خود مختار بنانا ہے، معاشرتی اور سماجی ترقی کیلئے مردوں کے ساتھ ساتھ خواتین کا کردار بہت اہمیت کا حامل ہے۔

اے پی ایس کے شہداء قوم کے ہیرو، لواحقین کو سلام پیش کرتے ہیں: محسن نقوی

وزیراعلیٰ پنجاب محسن نقوی نے آرمی پبلک سکول پشاور کے شہداء کی برسی پر پیغام میں کہا کہ 16 دسمبر کا دن آرمی پبلک سکول کے شہداء کی عظیم قربانیوں کی یاد ہمیشہ تازہ کرتا رہے گا۔محسن نقوی نے کہا کہ قوم آرمی پبلک سکول کے بچوں اور اساتذہ کی لازوال قربانیوں کو کبھی فراموش نہیں کر سکتی، بچوں نے اپنے قیمتی لہو سے محفوظ پاکستان کی تاریخ لکھی، پرامن پاکستان کی بنیادوں میں بچوں کا خون شامل ہے، ننھے پھولوں نے عظیم مقصد کیلئے اپنی قیمتی جانوں کا نذرانہ پیش کیا۔نگران وزیراعلیٰ پنجاب نے مزید کہا کہ شہدائے اے پی ایس نے پاکستانی قوم کو دہشت گردی کے خلاف متحد کیا، شہداء کی عظیم قربانیوں کے طفیل دہشت گردی کیخلاف جنگ میں پوری قوم کا مثالی اتحاد اور اتفاق سامنے آیا، شہید بچوں کی عظیم قربانیوں نے قوم کو نیا حوصلہ اور عزم دیا، سفاک دشمن کو شکست ہوئی اور پاکستان امن کا گہوارہ بنا۔محسن نقوی نے کہا کہ شہید بچے اور اساتذہ پوری قوم کے ہیرو ہیں اور ان کے خاندانوں کو سلام پیش کرتے ہیں، ہم شہدائے اے پی ایس کے خاندانوں کے ساتھ مکمل یکجہتی کا اظہار کرتے ہیں، قائد اعظم محمد علی جناحؒ کے پاکستان میں دہشت گردی اور انتہا پسندی کی قعطاً گنجائش نہیں۔

رواں سال ابتک 80 ہزار 665 شہریوں نے کریکٹر سرٹیفکیٹ کیلئے خدمت مراکز سے استفادہ کیا

پولیس خدمت مراکز شہریوں کو خدمات کی فراہمی میں کوشاں ہیں۔ڈی آئی جی آپریشنز سید علی ناصر رضوی کا کہنا ہے لاہور پولیس شہریوں کو آن لائن خدمات کی فراہمی یقینی بنانے کے لئے ہرممکن اقدام کر رہی ہے، رواں سال ابتک 80 ہزار 665 شہریوں نے کریکٹر سرٹیفکیٹ کیلئے خدمت مراکز سے استفادہ کیا، جنرل ویری فکیشن کے لئے 73 ہزار 419 شہریوں نے مختلف پولیس خدمت مراکز سے رجوع کیا۔ دیگر اضلاع سے موصول 9308 کریکٹر سرٹیفکیٹ اور 2249 ویری فکیشن سرٹیفکیٹ بھی جاری کئے گئے۔انہوں نے کہا گلوبل پورٹل، ایف آئی اے اور مختلف ایمبیسیز سے موصول ہونے والی 8155 درخواستوں پر بھی سرٹیفکیٹ جاری کئے گئے، 12505 شہریوں نے باعزت طریقہ سے گمشدگی رپورٹ کا اندراج کروایا، 8933 شہریوں نے ایف آئی آرز کی نقول بھی حاصل کیں۔سید علی ناصر رضوی نے مزید کہا خدمت مراکز میں 270 افراد نے کرائم رپورٹس کا بھی اندراج کروایا، شہریوں نے کرایہ داری اندراج، کرائم رپورٹس و دیگر سہولیات سے بھی استفادہ کیا، پولیس موبائل خدمت مرکز بھی شہر کے مختلف مقامات پر شہریوں کو خدمات فراہم کر رہا ہے، خدمت مراکز میں ویری فکیشن سرٹیفکیٹس، گمشدگی رپورٹس، تجدید ڈرائیونگ لائسنس سمیت دیگر سہولیات فراہم کی جا رہی ہیں۔

میٹرو بس، اورنج ٹرین پر طلبا کیلئے مفت سفری سہولت ختم

حکومت پنجاب نے موسم سرما کی چھٹیوں کے باعث میٹرو بس اور اورنج لائن ٹرین پر طلبا و طالبات کیلئے مفت سفری سہولت ختم کردی۔سیکرٹری ٹرانسپورٹ پنجاب احمد جاوید قاضی نے بتایا ہے کہ موسم سرما کی چھٹیوں کا آغاز ہو گیا ہے جس کے سبب میٹروبس اور اورنج لائن ٹرین پر طلبا و طالبات کیلئے مفت سفری سہولت تاحکم ثانی ختم کردی گئی ہے جس کا اطلاق آج سے ہوگا۔احمد جاوید قاضی کا کہنا تھا کہ میٹروبس اور اورنج لائن ٹرین پر طلبا وطالبات کیلئے مفت سفر کی سہولت ختم کرنے کا فیصلہ 18 دسمبر سے یکم جنوری تک ہونے والی چھٹیوں کے پیش نظر کیا گیا ہے۔انہوں نے اس حوالے سے مزید کہا ہے کہ موسم سرما کی چھٹیوں کے اختتام پر مفت سفری سہولت سے متعلق حتمی فیصلہ صوبائی کابینہ کرے گی۔

وزیراعلیٰ پنجاب کے چلڈرن و جنرل ہسپتال کے دورے،اپ گریڈیشن کے کاموں کا جائزہ

نگران وزیراعلیٰ پنجاب محسن نقوی نے چلڈرن ہسپتال اور جنرل ہسپتال کا دورہ کیا اور اپ گریڈیشن کے کاموں کا جائزہ لیا۔وزیراعلیٰ محسن نقوی رات گئے چلڈرن ہسپتال،جنرل ہسپتال،خدمت مرکز اوربند روڈ کے دورے پر پہنچے، محسن نقوی نے لگاتارساڑھے چار گھنٹے زیر تکمیل پراجیکٹس اورسروسز کا جائزہ لیا۔ انہوں نے چلڈرن ہسپتال میں ریڈیالوجی،میڈیکل ایمرجنسی،میڈیکل فور،اوپی ڈی کا دورہ کیا، محسن نقوی نے کینسر،ڈینٹل وارڈ اور آپریشن تھیٹر بھی دیکھے، وزیراعلیٰ نے ہسپتال میں بائیو گیس پائپ کی انڈرگراؤنڈ فٹنگ کی ہدایت کی اور اے سی پلانٹ کی انسولیشن بھی دوبارہ کرنے کا حکم دیا، انہوں نے فرشی ٹائلز کا معیار چیک کیااور دوران تعمیر ڈھاپنے کی ہدایت بھی کی۔محسن نقوی نے چلڈرن ہسپتال کی میڈیکل ایمرجنسی کا بھی دورہ کیا اور مریض بچوں کا حال احوال دریافت کیا، وزیراعلیٰ نے گردوں کی خرابی کی وجہ سے داخل ننھے ابوبکر سے شفقت کا اظہار کیا اور والدہ کو دلاسہ دیا۔بعدازاں وزیراعلیٰ محسن نقوی جنرل ہسپتال پہنچے جہاں انہوں نے زیر تکمیل ایمرجنسی وارڈکا معائنہ کیا اور جنرل ہسپتال کی اپ گریڈیشن کے کاموں کے معیار کا بھی جائزہ لیا۔ہسپتالوں کے دورے کے بعد وزیراعلیٰ فوراً لبرٹی خدمت مرکز پہنچ گئے اور موجود شہریوں سے صورتحال دریافت کی، محسن نقوی کے دریافت کرنے پرمتعدد شہریوں نے عرصہ دراز سے بلا لائسنس گاڑی چلانے کا اعتراف کیا، وزیراعلیٰ پنجاب نے لائسنس اورلرنر بنوانے والے شہریوں کی حوصلہ افزائی کی۔وزیراعلیٰ محسن نقوی لبرٹی خدمت مرکز سے بند روڈ کنٹرولڈ ایکسس پراجیکٹ کا جائزہ لینے پہنچ گئے جہاں سائٹ آفس پر ڈی جی ایل ڈی اے نے منصوبے بارے بریفنگ دی، محسن نقوی نے بند روڈ کنٹرولڈ ایکسس پراجیکٹ کے پورے روٹ کا معائنہ کیااور سگیاں پر داخلی و خارجی ریمپ بنانے کا حکم دیتے ہوئے فوری طورپر پلان طلب کرلیا۔ صوبائی وزراء ڈاکٹر جاوید اکرم،عامر میر،اظفر علی ناصر،صوبائی سیکرٹری سی اینڈ ڈبلیو، سیکرٹری ہیلتھ،کمشنر،ڈپٹی کمشنر اوردیگر حکام بھی موجود تھے۔

ڈپٹی کمشنرز کو ایک بار پھر دفعہ 144 کے نفاذ کا اختیار مل گیا

صوبے بھر میں 34 نئے مریضوں میں ڈینگی کی تصدیق

24 گھنٹے کے دوران صوبے بھر میں 34 نئے مریضوں میں ڈینگی کی تصدیق ہوئی۔سیکرٹری صحت علی جان خان کے مطابق لاہور میں 21 ،گوجرانوالہ ، ملتان میں 4 ،4، فیصل آباد میں ،شیخو پورہ، نارووال اور سرگودھا میں ڈینگی کا ایک ،ایک نیا مریض سامنے آیا۔ پنجاب بھر کے ہسپتالوں میں اس وقت ڈینگی کے کل 42 مریض جبکہ لاہور کے ہسپتالوں میں اس وقت ڈینگی کے کل 30 مریض زیر علاج ہیں ۔رواں سال لاہور میں ڈینگی کے 6938 ، پنجاب بھر میں 15 ہزار 29 کنفرم مریض رپورٹ ہوئے۔سیکرٹری صحت علی جان کا کہنا ہے کہ ڈینگی سے بچنے کے لئے شہری اپنے ماحول کو صاف رکھیں، ڈینگی بخار کے علاج ، معلومات یا شکایات کے لئے محکمہ صحت کی فری ہیلپ لائن پر رابطہ کریں۔

مہنگائی کی شرح میں مسلسل اضافہ، سبزی فروش دام پاؤ میں بتانے لگے

مہنگائی کی شرح میں مسلسل اضافہ ہو گیا۔ سبزی فروش سبزیوں کے دام پاؤ کے حساب سے بتانے لگے۔مہنگائی نے سبزیوں اور پھلوں کی قیمتیں لوگوں کی قوت خرید سے باہر کر دیں۔ مارکیٹ کمیٹی کی لسٹ میں پیاز 150 روپے، مارکیٹ میں 200 روپے کلو تک فروخت ہونے لگا۔ ٹماٹر بھی 105 روپے کے بجائے 160 روپے فی کلو تک بک رہا ہے۔لہسن اور ادرک نے تو حد ہی پار کر دی۔ لہسن چائنہ 590 روپے کے بجائے 850 روپے فی کلو تک دستیاب ہے۔ ادرک تھائی لینڈ 390 روپے کے بجائے 750 روپے کلو تک فروخت ہو رہا ہے۔مارکیٹ میں مچھلی کی فروخت کی وجہ سے برائلر کی کھپت میں کمی آ گئی۔ برائلر گوشت 7 روپے سستا ، نئی قیمت 463 روپے فی کلو مقرر ہو گئی۔ دوسری جانب انڈوں کی قیمت میں 2 روپے فی درجن کا اضافہ ہوا۔ انڈے 346 روپے سے بڑھا کر 348 روپے درجن مقرر ہو گئے۔خریدار کہتے ہیں حکومت ریلیف دے تاکہ لوگ آسانی سے خریداری کر سکیں۔اب تو ریٹ کلو یا دھڑیوں میں نہیں پاؤ میں آویزاں کئے جاتے ہیں۔

حریم فاروق کی سی گرین میکسی میں دلکش اداؤں پر مداح دل ہار بیٹھے

پاکستانی شوبز انڈسٹری کی خوبرو اداکارہ اور فلم پروڈیوسر حریم فاروق کی سی گرین شیفون میکسی میں دلکش اداؤں پر مداح اپنا دل ہار بیٹھے۔حال ہی میں اداکارہ حریم فاروق نے فوٹو اینڈ ویڈیو شیئرنگ ایپ انسٹاگرام پر چند تصاویر شیئر کیں جن میں وہ خوشگوار موڈ میں نظر آرہی ہیں۔ذکورہ تصاویر میں گرین پرنٹڈ شیفون میکسی میں ملبوس اداکارہ حریم بیڈ پر بیٹھی کیمرے کے سامنے پوز دیتی نظر آرہی ہیں جبکہ عقب میں بیڈ پر انکا بیگ اور کچھ سامان بھی موجود ہے۔ان تصاویر میں حریم نے لباس کومکمل کرتے ہوئے جن نازک زیورات کا استعمال کیا ہے وہ بھی سب کی توجہ کامرکز بنے ہوئے تھے، حریم نے نہ صرف غضب ڈھاتے اپنےحسن کا مظاہرہ کیا بلکہ ساتھ ہی ان کی قاتلانہ مسکراہٹ پر مداح ایک بار بھر انکے سحر میں مبتلا ہوگئے۔حریم فاروق کی جانب سے جاری کردہ ان تصاویر پر مداحوں اور ان کے چاہنے والوں کی جانب سے بے حد محبت اور پسندیدگی کا اظہار کیا جارہا ہے۔